Suliffissaaleqisunik sulilersitsineq

Arlaannik pissuteqartumik suliffiit annaasimagukku imaluunniit ilinniagaqareernerpit kingorna suliffissaaleqiguit, suliffissaaleqisutut nalunaarsorneqarnissat isumagissavat. Taamatut nalunaarsugaaguit pisinnaatitaaffeqarlutillu pisussaaffeqassaatit. Pisussaaffivit ilagissavaat suliffeqarnermut piareersimasussaatitaanissat. Ilaatigut tamanna isumaqarpoq suliffissaaleqisut sulisinneqarnerannut peqataatinneqarsinnaasutit.

Sulilersinneqarnermut aamma ilaasinnaapput:

• Ilinniagaqarneq ilinniagaqaqqinnerlu
• Kommunip aaqqissugaanik sulilersitsinermut suliniummi suliffissaqartinneqarneq

Kommunip suliffissaaleqisunut sulilersitsinermut suliniutigisai pilersinneqarlutillu, ingerlanneqarlutillu aningaasalersorneqartarput kommunimit pineqartumit imaluunniit kommunit arlallit ataatsimoorlutik suleqatigiinnerisigut.

Suliffissaaleqisut sulisinneqarnerannut suliniuteqartunut peqataaniartillutit piumasaqaataavoq:

• Peqqissutsikkut ajornartorsiuteqannginnissat
• Inuttut pissutsit allat pissutigalugit aporfeqannginnissat

Patsisissaqanngitsumik sulilersitsinissamut neqeroorutigineqartoq itigartitsissutigissagukku, sapaatit akunnerini sisamani suliffissarsiortunut ikiorsiissutisiassavit affaannai tunniunneqartassapput. Tamanna killilersuiffigisaalernermik taaneqartarpoq.

Inuit suliffissaaleqisut sulisinneqarnerannut peqataatinneqartut suliniutip ingerlanerani suliffeqarnermut piareersimasussaatitaassapput. Tamannali suliniutip ingerlanerani ilinniagaqarnermik ingerlataqartunut atuutinngilaq.

Piffissami suliffissaaleqisut sulisinneqarnerannut peqataaguit akissarsiaqassaatit. Akissarsiaqartillutit suliffissarsiortunut ikiorsiissutinik pissarsisinnaanngilatit.