Piginnaanngorsaqqinneq

Piginnaanngorsaaqqinnerup siunertaraa inuup sulisinnaassusilittut ukioqartup killilimmilli sulisinnaassuseqalersimasup suliinnarnissaanut sulilernissaanulluunniit ikiuinissaq, taamaaliornikkut pineqartup imminut ilaquttaminullu pilersuisinnaassusia pitsaanerulersinniarlugu.

Inuit kikkuuneri
Piginnaanngorsaaqqinnissamut ikiorserneqartassapput inuit peqqissutsimut tunngasut, inuttut atugarisanut tunngasut, tamatumani ilanngullugit sivisuumik suliffissaarusimaneq, sumiiffimmi pissutsinut tunngatillugu inuttut ilaqutariittulluunniit artorsaateqarnerit pissutigalugit imaaliallaannarlugit sulilernissamut naleqqussarneqarsinnaanngitsut imaluunniit naleqqussaqqinneqarsinnaanngitsut.

Qulaajaanermik ingerlatsineq
Piginnaanngorsaaqqinnissamik ingerlassaq aallartinneqartinnagu qinnuteqartoq qulaajaanermik ingerlassaqassaaq, tassani qinnuteqartup sulisinnaassusia qulaajarneqassalluni.

Qulaajaaniarluni ingerlassaq tassaavoq atuagarsornermik assassornermillu immikkoortortalik, qinnuteqartup tarnikkut timikkullu sulisinnaassusia qulaajarneqarluni.

Qulaajaaniarluni ingerlassap nalaani qinnuteqartoq pisortanit manna tikillugu pilersugarisatut tunngavigisaminik pisinnaatitaavoq.

 

Piginnaanngorsaaqqinneq tassaasinnavoq aningaasarsianut tapiissutit (suliffeqarfimmi piginnaanngorsaaqqinneq), suliffimmi namminersortumi imaluunniit pisortat suliffianni inuk sungiusarneqarluniluunniit ilinniartitaalluni. Sulisitsisup aningaasarsiat ilai akilerpai, aningaasarsiallu sinnerinut kommune aamma Namminersorlutik Oqartussat tapiissuteqarput, aningaasarsiat suliassaqarfimmut pineqartumut isumaqatigiissutinut tunngasutut aningaasarsiaasussaallutik.
Piginnaanngorsaaqqinneq aamma allamik ilinniagaqarnerusinnaavoq, pikkorissarnertut, nangitsilluni ilinniarnertut imaluunniit ilinniagaqavinnertut iluseqarsinnaalluni.

Piginnaanngorsaaqqinnermut aningaasartuutit
Assersuutigalugu innarluuteqarnermik tunngaveqartumik suliffigisamik immikkut ittumik ilusilersuinissamut akiliuteqarnernut pisarialittut aningaasartuutinut ataasiakkaanut akiliuteqartoqarsinnaavoq. Pisarialittut aningaasartuutit ataasiakkaat aamma tassaasinnaapput atuakkat imaluunniit pikkorissartitsinermut aningaasartuutit.

Sivisussusia
Piginnaanngorsaaqqinneq sapinngisamik piffissami sivikinnerpaami naammassineqassaaq, piffissamullu sivisunerpaamik ukiunut marlunnut piginnaanngorsaaqqittoqarsinnaavoq. Piffissaq pissutsini immikkut illuinnartuni sivitsorneqarsinnaavoq, assersuutigalugit tamakku tassaappata erninermi sulinngiffeqarneq, sivisunerusumik nappaateqarneq, imaluunniit napparsimmavimmut unitsitaaneq.

Eqaannerusumik suliffeqarneq
Atugassarititani nalinginnaasuni qulaajaaniarluni ingerlassap nalaani, imaluunniit piginnaanngorsaanermik suliaqarnerup kingornatigut pineqartoq suliffimmik pissarsinissamik imaluunniit attassinissamik angusaqarsinnaanngitsoq paasineqarpat inuk eqaannerusumik suliffeqalersillugu atorfinitsinneqarsinnaavoq.
Atugassarititani pissusissamisoortuni suliffeqareersimalluni inuup sulisinnaassutsimi ilaanik tassanngaannartumik annaasaqartoq sulisitsisoq peqatigalugu sioqqutsisumik piginnaanngorsaaqqinneq ingerlateqqaarnagu sulisitsisumi tassani eqaannerusumik suliffeqarnissamut qinnuteqarsinnaavoq.

Inuit piginnaanngorsagaaqqinnissamut aamma eqaannerusumik suliffeqarnissamut ikiorneqarnissamik kissaateqartut Majoriaq saaffigissavaat, taassumalu qinnuteqaat nalilersorlugulu suliarissavaa.