AMA-mi pikkorissarnerit

Inuussutissarsiutit ilaat piorsaaffiullutillu annertusaaffiusut allat ingerlariaqqiffiunatillu appariartorfiupput. Suliffeqarneq allanngoriartorfiujuartoq naleqqussaaffigiumallugu pisariaqarsinnaasarpoq ilinniagaqaqqittoqartarnissaa. AMA ilinnut neqerooruteqarfiuvoq ilinniagaqaqqikkumaguit.

AMA tapiissuteqarnermik aaqqissuussineruvoq suliffeqarnermut akitsuut aqqutigalugu aningaasalersorneqartoq. AMA aqqutigalugu inuussutissarsiutinut pikkorissartitsisarnernut ilinniagaqaqqinnissamullu pikkorissartitsisarnernut tapiissuteqartoqartarpoq.

Aaqqissuussineq pineqartoq aqqutigalugu illit sulisitsisut imaluunniit kommune inuussutissarsiutinut ilinniartitaanermik pikkorissartitsinernut atatillugu, angalanissanut aningaasaliissutinik qinnuteqarsinnaapput. Imaappoq suliffeqarnermi pisinnaasassat piginnaasassallu noqqaassutigineqartut ingerlaavartumik pissarsiarisinnaavatit.

AMA-mi pikkorissarnerit misilitsinnermik naggaserneqarajuttarput. AMA-mi pikkorissarnerit naammassereerukku pikkorissarsimaninnik uppernarsaat pissarsiarissavat, taannalu assersuutigalugu atorsinnaassavat nutaamik suliffissarsiorninni.

 

Siunnerfiusut tassaapput suliamik ilinniagaqarsimanngitsut, suliamik ilinniagaqarsimasut, inuit suliffillit aamma suliffissaaleqisut.

AMA-mi pikkorissartitsisarnerit Qitiusumik Ilinniarfinnit neqeroorutigineqartarlutillu taakkunani ingerlanneqartarput. Sivikinnerpaamik ullunik sisamanik sivisussuseqartarput sapaatillu-akunneranik ataatsimit sisamat tikillugit sivisussuseqartarlutik. AMA-mi ilaatigut makku iluanni pikkorissartitsinernik neqerooruteqartoqartarpoq:

• Sanaartorneq
• Aatsitassarsiorneq
• Saviminilerineq
• Niuertarfiit
• Takornariaqarneq
• Aalisakkanik suliffissuit
• Oqaatsit
• Nerisassat aamma akunnittarfiit/neriniartarfiit
• Isumaginninnerup iluani perorsaanermut tunngasut
• Peqqinnissaq

 

AMA-mi pikkorissartitsinernut qinnuteqarsinnaanissannut piumasaqaataavoq 18-inik ukioqalereersimanissaq. Tamatuma sanitigut pikkorissartitsinernut ataasiakkaanut pineqartunut suliatigut piumasaqaataasut naammassisimassavatit.

AMA-mi pikkorissaqataaniaruit takkuttarnissamut pisussaaffeqarputit.

 

Angalanermi aningaasartuutit
AMA-mi pikkorissariartorlutit illoqarfimmut allamut angalassaguit angalanerit, najugaqarnerit, najugaqarninnilu nerisaqartinneqarnerit sulisitsisuit imaluunniit kommunip akilissavai. Tamatuma kingorna sulisitsisut imaluunniit kommune aningaasartuutigisimasat AMA-mi aningaasaatit aqqutigalugit utertissutigineqarnissaat pillugu qinnuteqarsinnaapput.

Aningaasartutaasimasunut utertitsinissamut qinnuteqaat

Pikkorissarnermut tapiissummik (AMA-p iluani) qinnuteqarnissamut immersuiffissaq aajuk

Pikkorissarnermut aningaasartuutit
Pikkorissartitsinermut aamma akiliuteqartoqartussaavoq. Pikkorissarnermut akiliutit pikkorissarnermit pikkorissarnermut assigiinneq ajorput. Kiap akilissaneraa apeqqutaassaaq suliffeqarnersutit imaluunniit suliffissaaleqisuunersutit:

• Suliffeqaruit sulisitsisut taannaavoq akiliuteqartussaq
• Suliffissaaleqisuuguit pikkorissartitsinissamut akiliutissaq kommunip akilissavaa

Pikkorissarnerup nalaani isertitat
Suliffeqaruit nalinginnaasumik aningaasarsiatit pikkorissarnerup nalaani isertitarisassavatit. Sulisitsisut pikkorissarninnit taartisianik pissarsisinnaassanngilaq, taamaattumik AMA-mi pikkorissaqataalersinnak sulisitsisut akuersiteqqaarsimassavat.

Suliffissaaleqisuuguit suliffeqanngikkallarnermi ikiorsiissutit imaluunniit pisortanit ikiorsiissutit pisartagarissavatit.

 

Suliffeqareeruit sulisitsisut taannaavoq taakku ilaannut nalunaarutiginnittussaq. AMA-mi pikkorissartitsinermi peqataanissat soqutigigukku sulisitsisut saaffigissavat. Sulisitsisut taannaammat pikkorissartitsinermut akiliutissamik pikkorissarnerullu nalaani aningaasarsiannik akiliillunilu matussusiisussaq, taannaavoq akuerseqqaartussaq AMA-mi pikkorissarnissannik aallartitsinnak.

Suliffissaaleqisuuguit suliffissarsiuussisarfimmut nalunaaruteqassaatit.

Sulisitsisuit imaluunniit suliffissarsiuussisarfiup peqataanissat pillugu arlaat nalunaarutiginnikkaluarpalluunniit qinnuteqarnissamut immersuiffissaq peqatigiillusi immersortussaavarsi.

Qinnuteqarnissamut immersuiffissaq najukkami suliffissarsiuussisarfimmi pissarsiarisinnaavarsi imaluunniit Qitiusumik Ilinniarfiit pikkorissartitsinissat pillugit nalunaarsuiffissiaasigut, ilinniarfiit nittartagaasigut pissarsiarineqarsinnaasut. Pikkorissartitsinissat pillugit nalunaarsuiffissiani aamma paasissutissaapput pineqartumut akuerineqarnissamut suliatigut piumasaqaatit pikkorissartitsinissanullu ataasiakkaanut pineqartunut qinnuteqareersimanissamut piffissaliussat.

 

Qinnuteqaat pikkorissarnissap aallartinnissaanut ullut 14-it sioqqullugit nassiunneqareersimassaaq.