Sulinngiffeqarnissamut taperneqartarneq

Kalaallit Nunaanni suliffissaqartitsineq pisortanit aamma namminersortunit ingerlatsivigineqarpoq. Namminersortut aamma pisortat ingerlassaanni sulinermi atugassarititaasut inatsisit aqqutigalugit maleruagassiorneqarput. Pisortani atorfilinnut atorfeqarnermi atugassarititaasut, inunnut ataasiakkaanut atuuttut aamma matumani isumaqatigiissutit malillugit maleruagassiorneqarlutik. Kinguliini allassimasut pisortani atorfilinnut taamaallaat atuupput.

Sulinngiffeqarneq akisusinnaavoq. Assersuutigalugu timmisartumut ikissutissat akunnittarfimmiinnissallu akilertariaqartut. Taamaammat pisortani atorfillit ilaat sulinngiffeqarluni angalanissamut tapiiffigineqarnissamik qinnuteqarsinnaapput.

Sulinngiffeqarluni tapiiffigineqarnissamik pisortani atorfillit tamarmik pisinnaatitaanngillat. Isumaqatigiissummi ilinnut tunngasumi aalajangerneqartarpoq:

• Suliffeqarnermut tapiissutinik qinnuteqarnissamut pisinnaatitaanersutit
• Qanoq annertutigisunik qinnuteqarsinnaanersutit
• Aaqqissuussinermut kina akisussaanersoq. Nalinginnaasumik illit sulisitsisut taannaasarpoq qaammatit tamaasa aningaasanik aalajangersimasunik amerlassusilinnik akiliuteqartartoq

 

Tapiissuteqartarnermik aaqqissuussinerit tapiissutinik qinnuteqarfigisinnaasatit assigiinngitsut pigineqarput. Aaqqissuussinerit agguataarneqarsinnaapput ukununnga:

• Sulinngiffeqarnermut aningaasaateqarfiit
• Sulinngiffeqarluni angalanernut tapiissuteqaatit
• Sulinngiffeqarnermi akiliunneqarluni angalaneq

Illit akissarsiavit allagartaani imaluunniit isumaqatigiissutini aaqqissuussinermut sorlermut ilaanersutit atuarneqarsinnaavoq, taamaalillunilu sulinngiffeqarnissamut tapiiffigineqarnissamik sumut qinnuteqarsinnaanersutit takuneqarsinnaalluni.

Isumaqatigiissummut taama ittumut ilaanerlutit paaserusukkukku, akissarsiavit allagartaat misissortariaqarpat imaluunniit isumaqatigiissutit atuarlugu.

Suli nalornissuteqaruit, suliffinni sinniisoq imaluunniit kattuffik ilaasortaaffiit aperisinnaavat.