INImi najugaqartunut paasissutissat

INIp inissiat Namminersorlutik Oqartussanit kommuninillu pigineqartut allaffissuussarai. Kitaani immikkoortortaqarfiit katillutik 160-it missaanik amerlassusilinnik sulisoqarput, inissiallu 9.000-ingajannik amerlatigisut allaffissuunneqarlutik.

Inissiami allaffissuussarisatsinni najugaqartutut pisussaatitaavutit betalingsservicemut ilanngussimanissat. Ilanngutereeriaruit akiliisarnitit nammineertumik suliarineqartalissapput. Tamanna 2015-imiilli piumasaqaatigineqalernikuuvoq, najugaqartunullu tamanut atuulluni.
Piumasaqaammiilli pisussaatitaajunnaarsimaguit, akiligassamik nassiussiffigisinnaasatsinnik e-maileqarnissat piumasaqaataavoq. Imminut kiffartuussivitsigut imal. FI-kort INImut aallugu akiliisinnaavutit. Malugiuk INImiit FI-kortimik pigaanni qaavatigut 35 kr-mik akeqarmat. INImiilli FI-kortinik pisalereersimaguit imminut kiffartuussivikkoorlutit FI-kort nammineerlutit anisissinnaavat.

Najugaqartutut imminut kiffartuussivikkut sukkanerusumik ajornannginnerusumillu sullinneqarsinnaavutit – ammasarfigut akissuteqarnissarpullu apeqqutaatinnagit.

Imminut kiffartuussivimmi periarfissat:

• Ineqarnermut akiliineq
• Ineqarnermut akiligassat takusinnaavatit anisillugillu
• Kontornut nalunaarsukkat takusinnaavatit anisillugillu
• Imermut kiassarnermullu naatsorsuutit takusinnaavatit

Imminut kiffartuussivimmut ugguuna isersinnaavutit: INIp imminut kiffartuussivia

Qularnaveeqqusiissut qaammatini pingasuni ineqarnermut akiliutigineqartup annertoqatigaa. Qularnaveeqqusiissut inissiamut nutsinnginnerni akilereersimasussaavat. Isumaqatigiissuteqarnikkut akilersugassanngortinneqarsinnaavoq.
Inissiamut iserterninni inissiami ajoqutinik amigaatinilluunniit immersugassaq immersussavat. Taanna inissiami najugaqarninni ajoqutinik amingaatinillu pilersitsisimannginnermut, taamaalillutillu aningaasartuutiginnginnissaannut uppernarsaataasussaavoq. Taamaammat najugaqarnerit tamaat immersukkap pigiinnarnissaa eqqaamassavat.
Inissiap qimannerani nutsernermut atatillugu misissuisoqareerpat, inissiallu iluarsartuunneqarsimaneranut, paarsinerlunnikkut iluarsaatassat isumagineqareerpata kiisalu iluarsaassisoqarneranut suliaqartoqarsimatillugu akiligassiat naammassereerpata ineqarnermut qularnaveeqqutip sinneri ilinnut utertinneqarumaarput.

Akiligassat piffissaq eqqorlugu akilersimanngikkukkit sap.akunneri marluk missaat qaangiunneranni akileeqqusissummik nassinneqassaatit. Aammattaaq sms-itigut eqqaasitsissummik nassinneqassaatit. Akileeqqusissut 150 kr-mik akeqarpoq.
Akiliinissaq ajornakusoortikkukku, aningaasaqarnermut siunnersorti attavigisinnaavat, ass. akilersuinissamut aaqqiissummik ikiortillutit.

Errorsivimmik, panersaavimmik erruivimmilluunniit inissiami ikkussiniaruit qinnuteqassaatit. Taamaaliorsinnaavutit una immersorlugu "Errorsivimmik/erruivimmik/panersaammik ikkussinissamut akuersissut", immersoreerukku ini@ini.gl-imut nassiutissavat imal. INImut tunniukkiartorsinnaavat.

Ileqqorissaarnermut maleruagassat ineqartunut tamanut, ulluinnarnilu sumiiffinni ingerlatsisunut atuupput. Najugaqartutut periarfissaqarputit sumiiffimmi najugaqarfinni siulersuisut aqqutigalugit maleruagassanut siunniuteqarnissannut.

Nittartakkatsinni annerusumik paasisaqarit: Ileqqorissaarnissamut maleruagassat

Inigisanni oqoqalersimaneranik pasitsaassiguit, ini@ini.gl-imut allassinnaavutit, oqarasuaammut 70 10 00-imut sianerlutit, imaluunniit piffissamik inniminneeqqaarlutit INImut ornigullutit.
Nalunaarutit tigoriarutsigu nakkutilliisoq ornigussaaq oqoqalersimasutut pasitsaaffigisatit misissugassanik tigusiffigiartussallugit. Pingaaruteqarpoq nakkutilliisup misissuiartornissaani inigisap torersarluarsimanissaa, misissuineq pisariinnerusumik sukkanerusumillu piniassammat.
Nakkutilliisup misissugassat ilisimasalimmut ingerlateqqissavai, oqoqarneranillu qulakkiisoqariarpat, nakkutilliisup oquiaanissaq aallartissinnaanngussavaa.

Najugaqarfigisanni uumasuuteqarnissamik akuersisoqarsimappat qimmeqarsinnaavutit qitsuuteqarsinnaallutillu. Uani akuersisoqarsimanersoq takusinnaavat: Uumasuutit

Najugaqarfigisanni akuersisoqarsimappat, uumasuummut ataatsimut immikkut qularnaveeqqusiissummik inissiamut akiligassap qaammatinut pingasunut akeqqataanik akiliissaatit. Tassa imaappoq ass. marlunnik uumasuuteqassaguit qularnaveeqqusiissut marloriarlugu akileqqaarsimassavat.

Uumasuutit allat pillugit qinnuteqaqqaartariaqanngilatit, ass. kikkaasut, imal. timmiaatit, aalisagaaqqat assigisaallu. Pulaartut uumasuutiminnik nassaqqusaanngillat – najugaqarfilluunniit uumasuuteqarfiunissaanut akuersissummik pereersimagaluarpat.

Piffissami peqanngiffigisanni inissiat inummut allamut attartortsikkallarsinnaavat.

Peqanngissutigineqartut:

• Napparsimaneq
• Ilinniarneq
• Inissiisarfimmiittussanngortitaaneq
• Allamut nuukkallarneq, ass. suliffik pissutaalluni.

Qaammatit 12-it siulliit ataaniittunik peqanngissutigineqarsinnaasunik tunngavilersoqqaarneqartariaqanngillat.

 

Inissiaq piffissami aalajangersimasumi attartortikkallarsinnaavat.

• Qaammatinit pingasunik sivikinnerunngitsumi
• Ukiunit pingasunit sivisunerunngitsumik

Inigisappit attartortinnginnerani attartortussarlu isumaqatigiissusiassinnut akuersissummik peqqaassaasi. Attartortitsineq sivitsorumassagussiuk, tamanna uppernarsaaseqqaarlugu qinnutigissavarsi.
Attartornermut maleruagassat naammassisimanngikkukkit attartortitsisinnaanngilatit.

Ineqarneq pillugu maalaarnissamut ataatsimiititaqaliaqarfiup kommunit imaluunniit Namminersorlutik Oqartussat inissiat attartortittagaannut tunngasut aalajangerneqarsimasut suliarisarpai.

Uunga maalaarummik nassiussisinnaavutit: maalaarut@nanoq.gl

Maalaarutinni ilanngutissavatit:

• Aalajangiisoqarneranut sooq maalaaruteqarnerlutit tunngavilersuinitit
• INI A/S-imiit aalajangiisoqarneranut allakkat assigisaalu