INImi inissarsiortunut paasissutissat

INIp inissiat Namminersorlutik Oqartussanit kommuninillu pigineqartut allaffissuussarai. Kitaani immikkoortortaqarfiit katillutik 160-it missaanik amerlassusilinnik sulisoqarput, inissiallu 9.000-ingajannik amerlatigisut allaffissuunneqarlutik

Inissarsiortutut INIp utaqqisuinut allatsissinnaavutit.

Utaqqisunut allattorsimaffimmi sivisunerusumik utaqqisuniissimasut pingaarnerutinneqarnissaannut qulakkeerutaavoq. Utaqqisuniinnissamut arlalinnut akiliillutit allatsissinnaavutit. Utaqqisut allattorsimaffii illoqarfikkaarlugit/nunaqarfikkaarlugit, immikkoortortaqarfikkaarlugit kiisalu Namminersorlutik Oqartussanit kommuninillu pigineqartunut agguagaapput.

Inissarsiortutut allatsikkusullutit immersuinikkut utaqqisunut allatsissinnaavutit: "Utaqqisut allattorsimaffiannut allatsinneq"
Immersugaq ini@ini.gl-imut nassiutsissavat, imal. INImut ornigullutit tunniukkiartorlugu. 15-inik ukioqalereersimaguit inissarsiortutut allatsereersinnaavutit. Aatsaalli 18-ileereeruit inissiamut neqeroorfigineqarsinnaalissaatit.

 

Imminut kiffartuussivik aqqutigalugu inissarsiorsinnaavutit, inissarsiortooreeruilluunniit inissiat kissaatitit nutartersinnaallugit.

INIp inissarsiortunut imminut kiffartuussivia

Utaqqisunut allatsinneq ataaseq 100 kr-qarpoq. Akiliut ukiumut akiliiffiusumut atuuppoq. Tassa imaalluni januarimi novembarimiluunniit akiliigaluaruit, ukiumi nutaami utaqqisut allattorsimaffiat nutarterneqarpat akileeqqissaatit. Ukiup naanerani akiligassaq nassiunneqartarpoq. Inissarsiortuuginnarumallutillu decembarip 31-ani akileereersimassaatit.

Qanoq INIp imminut kiffartuussiviani atuisunngorsinnaanerlutit uani takuuk: INIp imminut kiffartuussivia

Inissarsiortutut imminut kiffartuussivikkut sukkanerusumik ajornannginnerusumillu sullinneqarsinnaavutit – INIp ammasarfii akissuteqartoqarnissaalu apeqqutaatinnagit:

• Utaqqisunut allatsillutit
• Utaqqisuni qassimiinnerlutit
• Inissianut neqeroorutit
• Inissiat inoqanngitsut
• Utaqqisuniinnerit unitsikkallarlugu

Qanoq ilillutit imminut kiffartuussivimmi atuisutaarsinnaanerlutit uani takuuk: Imminut kiffartuussivik

Inissiaq inueruppat, utaqqisuni sivisunerpaamik allatseqqasimasoq, inueruttumilu najugaqarfeqarfimmut allatseqqasoq siulliunniarlugu neqeroorfigisarparput. Neqeroorfigineqartuni soqutiginnillutik nalunaartuni sivisunerpaamik utaqqisuniissimasoq neqeroorfigineqassaaq.
Inissiamut neqeroorut e-mailikkut tigungukku aamma imminut kiffartuussivikkut takusinnaalissavat.

Inissiamut neqeroorut ataatsikkut arlalinnut nassiuttarparput, inissarsiortunut sukkanerusumik inissaqalersitsinissaq utaqqisuniinnerullu sivikinnerulernissaa qulakkeerniarlugit.

Inissiamik neqeroorfigitikkuit ulluinnaat arfineq-marluk qaangiutsinnagit akereersimasussaavutit. Killigititap iluani akissutisinngikkutta neqeroorummut soqutiginninngitsutut tiguneqassaaq. Neqeroorutigineqartunut pingajussaat akissuteqanngikkuit utaqqisuniinnerit unitsikkallarneqassaaq.

Qularnaveeqqusiissut qaammatini pingasuni ineqarnermut akiliutigineqartup annertoqatigaa. Qularnaveeqqusiissut inissiamut nutsinnginnerni akilereersimasussaavat. Isumaqatigiissuteqarnikkut akilersugassanngortinneqarsinnaavoq.
Inissiamut iserterninni inissiami ajoqutinik amigaatinilluunniit immersugassaq immersussavat. Taanna inissiami najugaqarninni ajoqutinik amingaatinillu pilersitsisimannginnermut, taamaalillutillu aningaasartuutiginnginnissaannut uppernarsaataasussaavoq. Taamaammat najugaqarnerit tamaat immersukkap pigiinnarnissaa eqqaamassavat.
Inissiap qimannerani nutsernermut atatillugu misissuisoqareerpat, inissiallu iluarsartuunneqarsimaneranut, paarsinerlunnikkut iluarsaatassat isumagineqareerpata kiisalu iluarsaassisoqarneranut suliaqartoqarsimatillugu akiligassiat naammassereerpata ineqarnermut qularnaveeqqutip sinneri ilinnut utertinneqarumaarput.