ATV – nalunaarsuineq, nalunaarsuinermik allannguineq aammalu atuiunnaarnermik nalunaaruteqarneq

Nalunaarsortinneri
ATV inatsit malillugu nalunaarsorsimasussaavoq, ATV aqqusinertigut angallannermut inatsimmi biilitut nassuiarneqarmat.

ATV’t nalunaarsortinniarukku politiinut saaffiginnissaatit. Makku nassassavatit:
• ATV’t – nalunaarsuinermi ATV ajoquteqannginnersoq politiit nalilissavaat. Annermik qulliit, unittaatit aquutaalu politiit eqqumaffigissavaat.
• Sillimmasiisimanermut uppernarsaat
• Nalunaarsuinermi immersugassaq immersorsimasoq aammalu atsiorsimasoq. Piginnittoq pillugu paasissutissat immersugassami aammalu sillimmasiisimanermut uppernarsaammi assigiissapput.

Nalunaarsuinermi immersugassaq

Malugiuk
Malugiuk stelnummer politiinut takutinnerani salinneqarsimassammat aammalu ersarissammat.

Illoqarfimmi politeeqarfeqanngitsumi najugaqaruit politeeqarfik qaninnerpaaq attavigissavat, isumaqatigiissutigissavarsilu qanoq ilillutit ATV’t nalunaarsortissanerlugu aammalu nummerpladenik pissarsissanerlutit.


Atuiunnaarluni nalunaaruteqarneq
ATV’p atorunnaarnerata nalunaarutiginissaa inatsisitigut piumasaqaataavoq.
ATV’t allap pigilerpagu atuiunnaarlutit nalunaarutigissavat.
Piginnittup nutaap ATV imminut nalunaarsortereersimalerpagu, ATV ilinnut nalunaarsorsimajunnaartoq politiit ilinnut nalunaarutigissavaat.

Nalunaarsuinermi uppernarsaat
Politiit nalilerpassuk suut tamarmik pissusissamisoortut, nalunaarsuinermi uppernarsaat politiit ilinnut tunniutissavaat aammalu assinganik sillimmasiisarfiit nassissallugu.

Sillimmasiininni normut imaluunniit policenummer nalunaarsuinermi uppernarsaammi allaqqavoq.

Nalunaarsuereernermi paasissutissat, qamut pillugu immersukkami nalunaarsorneqarsimasut, allanngorsimappata, allannguineq politiinut nalunaarutigineqassaaq. Tamatuma kingorna politiit nutaamik nalunaarsuinermi uppernarsaasiussapput. Taamaattorli najukkamik allannguinermi atunngilaq.

Piginnittoq allanngorpat piginnittup nutaap qamutit pillugit piaarnerpaamik nalunaartussaatitaavoq kingusinnerpaamillu sapaatip akunneri pingasut qaangiutsinnagit.

Kalaallit Nunaanni qamutit nalunaarsorneqartarnerat pillugu Nalunaarut nr. 573 31. maj 2013-imeersoq.