Biilit – nalunaarsuineq, nalunaarsuinermik allannguineq aammalu atuiunnaarnermik nalunaaruteqarneq

Biilit nalunaarsortinniarukku politiinut saaffiginnissaatit. Makku nassassavatit:
• Biilit – nalunaarsuinermi biilit ajoquteqannginnersoq politiit nalilissavaat. Annermik qulliit, unittaatit aquutaalu politiit eqqumaffigissavaat.
• Sillimmasiisimanermut uppernarsaat
• Akileraarutip akilersimaneranut uppernarsaat
• Nalunaarsuinermi immersugassaq immersorsimasoq aammalu atsiorsimasoq. Piginnittoq pillugu paasissutissat immersugassami aammalu sillimmasiisimanermut uppernarsaammi assigiissapput.

Biilit innaallagiartortoq nalunaarsortinniarukku politiinut saaffiginnissaatit. Makku nassassavatit:
• Biilit – nalunaarsuinermi biilit ajoquteqannginnersoq politiit nalilissavaat. Annermik qulliit, unittaatit aquutaalu politiit eqqumaffigissavaat.
• Sillimmasiisimanermut uppernarsaat
• Nalunaarsuinermi immersugassaq immersorsimasoq aammalu atsiorsimasoq. Piginnittoq pillugu paasissutissat immersugassami aammalu sillimmasiisimanermut uppernarsaammi assigiissapput.
• Kiisalu biilip typeata akuerineqarnera, tassani allaqqassammata biilip nammineq oqimaassusaa kiisalu katillugu tamaat oqimaassusaa.


Nalunaarsuinermi immersugassaq

Malugiuk
Malugiuk stelnummer politiinut takutinnerani salinneqarsimassammat aammalu ersarissammat.

Illoqarfimmi politeeqarfeqanngitsumi najugaqaruit politeeqarfik qaninnerpaaq attavigissavat, isumaqatigiissutigissavarsilu qanoq ilillutit biilit nalunaarsortissanerlugu aammalu nummerpladenik pissarsissanerlutit.


Atuiunnaarluni nalunaaruteqarneq
Biilinik atuiunnaarnerup nalunaarutiginissaa inatsisitigut piumasaqaataavoq.
Biilit allap pigilerpagit atuisuujunnaarlutit nalunaarutigissavat.
Biilinik piginnittup nutaap imminut nalunaarsoreersimalerpagit, biilit ilinnut nalunaarsorsimajunnaarnerannut politiit nalunaarfigissavaatsit.

Biilitit tunigukkit akileraarutip akilersimanissaanut aammalu sillimmasiinissamut akisussaasuunissat eqqumaffigissavat
• piginnittup nutaap biilimik imminut nalunaarsuinissaata tungaanut
• imaluunniit nummerpladet politiinut tunniunnerisigut atuiunnaarlutit nalunaaruteqarnissavit tungaanut


Akileraarutip imaluunniit sillimmasiisimanerup akilersimannginneri pissutigalugit politiit biilit atorunnaartut nalunaarutigippassuk, biilit nutaamik nalunaarsorneqassapput nalunaarsuinermilu piumasaqaataasut nalinginnaasut atuutissapput.

Tamatuma saniatigut biilit nalunaarsorneqaqqitsinnagit sillimmasiisimanermut aammalu akileraarummut akiitsut tamarmik akilerneqareersimassapput.

Nalunaarsuinermi uppernarsaat
Politiit nalilerpassuk suut tamarmik pissusissamisoortut, nalunaarsuinermi uppernarsaat politiit ilinnut tunniutissavaat aammalu assinganik sillimmasiisarfiit nassissallugu.

Sillimmasiininni normut imaluunniit policenummer nalunaarsuinermi uppernarsaammi allaqqavoq.

Nalunaarsuereernermi paasissutissat, biili pillugu immersukkami nalunaarsorneqarsimasut, allanngorsimappata, allannguineq politiinut nalunaarutigineqassaaq. Tamatuma kingorna politiit nutaamik nalunaarsuinermi uppernarsaasiussapput. Taamaattorli najukkamik allannguinermi atunngilaq.

Piginnittoq allanngorpat piginnittup nutaap qamutit pillugit piaarnerpaamik nalunaartussaatitaavoq kingusinnerpaamillu sapaatip akunneri pingasut qaangiutsinnagit.


Akileraarut
Akileraarutip akilernissaa inatsisitigut piumasaqaataavoq. Akileraarut Namminersorlutik Oqartussanut – Akileraartarnermut pisortoqarfimmut – akilerneqassaaq, Kalaallit Nunaata Politiivinuunngitsoq.

Akileraarut pillugu apeqqutissaqaruit tassanngalu utertussaqaruit, Akileraartarnermut pisortaqarfik attaveqarfigissavat.

Kalaallit Nunaanni qamutit nalunaarsorneqartarnerat pillugu Nalunaarut nr. 573 31. maj 2013-imeersoq.