Qamutit motoorillit eqqunneqarneranni akitsuut

Qamutinik motoorilinnik Kalaallit Nunaata avataani pisinermi Kalaallillu Nunaannut eqqunneranni akitsuummik akiliissaatit. Qamutit motoorillit Kalaallit Nunaannut tikiunneqarneranniit, imaluunniit Aalborgimi Umiarsualivimmut tunniunneqarnerannit eqqunneqarneranni akitsuut ullut 14-it qaangiutsinnagit akilissavat.

Akiliineq
Inuinnaat biilinik eqqussisut umiarsuaatileqarfiit/nioqqutissanillu naammassinnittartut, akiliinermut malittarisassaat, tunngavigalugit akiligassinneqartarput aammalu suliffeqarfiutillit assigiinngitsunik akiliinermut malitassaqartarlutik.

Qamutinik motoorilinnik pisininni kingoraartissaanik pisiguittaaq akitsuutai akilissavatit.

Qamutit motoorillit eqqunneqartut qanoq ittuuneri apeqqutaallutik eqqunneqarneranni akitsuuteqartarput. Inuit biilinik aamma biilit nioqqutissanik assartuutit 4 tonsit ataallugit oqimaassusilinnik pisinermi, qamutit motoorillit akii malillugit eqqunneqarneranni akitsuut naatsorsorneqartarpoq, taannalu akileeqqusinermi naliusumik taaneqartarpoq.

Qamutit motoorillit ilaat eqqunneranni akitsuuteqartinneqanngillat.

 

Akileeqqusinerup allagartaani ilaatigut makku allaqqapput:
• Nunami pisiffigisami angallanneqarnerini aningaasartuutit
• Quersuarmiitinnerani aningaasartuutit
• Umiarsuarmut usissunnerani aningaasartuutit
• Sillimmasiinerit
• Allaffissornikkut aningaasartuutit
• Kingoraartissat
• Iluarsarnerani aningaasartuutit

Akileeqqusinerup allagartaani allaqqanngitsut:
• Akitsuutit allat
• Akitsuut moms
• Umiarsuarmik angallannerani akia

Qamutit motoorillit taakkulu eqqunneqarnerani akitsuutaat imaapput:
• Knallertit – Akitsuutaavoq 2.530 kr.
• Inuit biilii – Minnerpaamik akitsuutaavoq 50.000 kr. Akileeqqusinermi naliusoq 50.000 aamma 150.000 kr.-it akornaniippat, akileeqqusissummi naliusup akitsuut angeqqatigissavaa. Akileeqqusissummi naliusup 150.000 kr.-it sinnersimappagit, akileeqqusissutip nalingata sinneranit 125% qaavatigut ilassutaassaaq
• Biilit nioqqutissanik assartuutit 4 tons ataallugit oqimaassusillit – Minnerpaamik akitsuutaavoq 50.000 kr. Akileeqqusissummi naliusup 50.000 kr.-it sinnerpagit, akileeqqusissutip nalingata sinneranit 50 % qaavatigut ilassutigineqassaaq
• Lastbil-it, bussit aamma biilit nioqqutissanik assartuutit 4 tons sinnerlugu oqimaassusillit – Akitsuutaavoq 50.000 kr.
• Qamuteralaat – Akitsuutaavoq 22.000 kr.
• Vandscooter-it – Akitsuutaavoq 30.000 kr.
• Qamutit motoorillit nunakkoorutit minnerusut – Akitsuutaavoq 5.000 kr.

Naatsorsuiniarluni immersuiffikkut inuit biilii imaluunniit biilit nioqqutissanik assartuutit 4 tons ataallugit oqimaassusillit eqqunneqarnerini akitsuutai naatsorsorsinnaavatit.

Naatsorsuinermi immersuiffik (Excel)

Assersuut 1
Inuit biilii, fakturami akia kr. 145.000
Akitsuut aalajangersimasoq			50.000
+ (145.000 - 50.000) x 100 % =			95.000
Akitsuut, tamarmiusoq			145.000
Assersuut 2
Inuit biilii, fakturami akia kr. 215.000
Akitsuut aalajangersimasoq			50.000
+ (150.000 - 50.000) x 100 % =			100.000
+ (215.000 - 150.000) x 125 % =			81.250
Akitsuut, tamarmiusoq			231.250

Inuit biiliat tassaavoq biili issiaveqartoq saarliit saniatigut aamma tunorlerni.

Biili nioqqutissanik assartuut tassaavoq biili issiaveqartoq taamaallaat saarlerni usisaataallunilu.

Qamutit motoorillit nunakkoorutit tassaapput, assersuutigalugu ATV-nik taaneqartartut aamma qamutit assakaasuusamik ingerlatillit.

Qamutip motoorillip suunera qamummik piginnittup aamma Akileraartarnermut Aqutsisoqarfiup isumaqatigiinngissutigippassuk, suliassaq politiit aqqutigalugit trafikstyrelsenimut ingerlatinneqassaaq, taakkulu aalajangiissapput.

Qamutit motoorillit eqqussinermi akitsuuserneqartussaatitaanngitsut makkuupput:

• Innaallagissamik,brintimik,hybridimik ingerlatillit akitsuuserneqartussaanngillat – 1. januar 2026 tungaanut
• Ambulance-t
• Politiit biilii
• Qatserisartut biilii
• Nunat allat aallartitaasa biilii
• Qamussuit maskiinallit sanaartornermi atorneqartartut
• Qamutit motoorillit ilisinermi assartuutit
• Traktor-it