Akileraarutinit utertoorutissat tunniunneqarnissaannik qinnuteqarneq

Ukiup siuliani akileraarutinik amerlavallaanik ikippallaanilluunniit akiliisimanerlutit paasiniarukku, ukiut tamaasa kingusinnerpaamik 1. maj nammineerlutit nalunaarsuiffimmik immersuissaatit.

Nammineerlutit nalunaarsuiffiit tunngavigalugu Akileraartarnermut Aqutsisoqarfik augustip qaammataani inaarummik naatsorsuummik suliaqartarpoq.

Pisortanut akiitsoqanngikkuit Akileraartarnermut Aqutsisoqarfimmit akileraarutit sippuutaat tunniunneqassapput.
Pisortanut akiitsoqaruit akiitsutit akileraarutit sippuutaat tunniunneqarnissaat sioqqullugit ilanngaatigineqassapput, tamatumalu kingorna allagarsissutigiumaarpatit.

Nammineerlutit nalunaarsuiffimmik suliaqarninni akileraarutinik amerlavallaanik akiliisimallutit paasigukku, akileraaruseriffiup inaarummik naatsorsuinissaa sioqqullugu akileraarutit sippuutaat ilinnut utertinneqarnissaat qinnuteqaatigisinnaavat. Tamanna ima paasineqassaaq, aningaasat tunniunneqarnissaat siuartissinnaavat.

Akileraarutit sippuutaat tunniunneqarnissaat siuartinniarukku, akiliuteqarpallaarnermut ajunngitsorsiamik imaluunniit erniaannik pissanngilatit.

Akileraarutit sinneqartoorutaasut tunniunnissaat taamaallaat siuartissinnaavatit 5.000 koruuninik imaluunniit amerlanerusunik pissarsiassaqaruit.

Nammineerlutit uppernarsassavat 5.000 koruunit sinnerlugit pissarsiassaqarlutit. Taama iliussaatit qinnuteqarnermut immersugassap immersorneratigut, tassani isertitatit aningaasartuutitillu ilanngaatigineqarsinnaasut, kiisalu ukiup siuliani akileraarutit akilersimasatit paasissutissiissutigigukkit.

Taamaattorli inuttut atukkatigut siumut piareersimaffiginngisamik annertuumik aqqusaagaqarsimaguit, akileraarutit sinneqartoorutaasunit 5.000 koruunit ataallugit amerlassusillit tunniunneqarnissaasa siuartinnissaat qinnuteqaatigisinnaavat.

Akileraarutit sippuutaasa tunniunneqarnissaasa siuartinnissaat qinnuteqaatiginiarukkit, qinnuteqarnermut immersugassaq immersussavat.

Akileraarutinit utertoorutissaqarnersutit paasiniarlugu akileraarutivit naatsorsornissaannut naatsorsuiffissaq atorsinnaavat.

Akileraarutit sippuutaasa aningaaserivimmut nuunneqarnissaannik qinnuteqaat (PDF)

Naatsorsuiffissaq (PDF)

Naatsorsuiffissaq (Excel)

Akileraarutinit utertoornissamut qinnuteqaat immersugassaq immersoreerukku, Akileraartarnermut Aqutsisoqarfimmut nassiutissavat imaluunniit tunniukkiartorlugu.

Qinnuteqarnermi ilanngutissavatit:

• Akissarsiat allagartaat ukiumoortut
• Ilanngaateqarnermut uppernarsaatit
• Ukiup siuliani akileraarutit B-t akilernerannut uppernarsaatit
• Nammineerluni nalunaarsuut

Akileraarutit sinneqartoorutaasut tunniunneqarnissaat qinnuteqaatigisinnaavatit kingusinnerpaamik nammineerlutit nalunaarsuiffiit Akileraartarnermut Aqutsisoqarfimmit tiguneqarneranit qaammat ataaseq qaangiutinnginnerani.