Akileraarutinit utertoorutissat tunniunneqarnissaannik qinnuteqarneq

Ukiup siuliani akileraarutinik amerlavallaanik ikippallaanilluunniit akiliisimanerlutit paasiniarukku, ukiut tamaasa kingusinnerpaamik 1. maj nammineerlutit nalunaarsuiffimmik immersuissaatit. Nammineerlutit nalunaarsuiffiit tunngavigalugu Akileraartarnermut Aqutsisoqarfik augustip qaammataani inaarummik naatsorsuummik suliaqartarpoq. Pisortanut akiitsoqanngikkuit Akileraartarnermut Aqutsisoqarfimmi akileraarutitsippuutaat tunniunneqassapput. Pisortanut akiitsoqaruit akiitsutit akileraarutit sippuutaat tunniunneqarnissaat sioqqullugit ilanngaatigineqassapput, tamatumalu kingorna allagarsissutigiumaarlugit.

Nammineerlutit nalunaarsuiffimmik suliaqarninni akileraarutinik amerlavallaanik akiliisimallutit paasigukku, akileraaruseriffiup inaarummik naatsorsuinissaa sioqqullugu akileraarutit sippuutaat ilinnut utertinneqarnissaat qinnuteqaatigisinnaavat. Tamanna ima paasineqassaaq aningaasat tunniunneqarnissaat siuartissinnaagit.

Akileraarutit sippuutaat tunniunneqarnissaat siuartinniarukku, akiliuteqarpallaarnermut ajunngitsorsiaq erniaannilluunniit pissanngilatit.

Akileraarutit sinneqartoorutaasut tunniunnissaat taamaallaat siuartissinnaavatit 5.000 koruuninik imaluunniit amerlanerusunik pissarsiassaqaruit. Nammineerlutit uppernarsassavat 5.000 koruunit sinnerlugit pissarsiassaqartutit. Taama iliussaatit qinnuteqarnermut immersugassap immersorneratigut, tassani isertitatit aningaasartuutitillu ilanngaatigineqarsinnaasut kiisalu ukiup siuliani akileraarutit akilersimasatit paasissutissiissutigigukkit.

Taamaattorli inuttut atukkatigut siumut piareersimaffiginngisamik annertuumik aqqusaagaqarsimaguit, akileraarutit sinneqartoorutaasunit 5.000 koruunit ataallugit amerlassusillit tunniunneqarnissaasa siuartinnissaat qinnuteqaatigisinnaavat.

Akileraarutit sippuutaasa tunniunneqarnissaasa siuartinnissaat qinnuteqaatiginiarukkit, qinnuteqarnermut immersugassaq immersussavat.

Qinnuteqarnermi immersuiffissaq

Akileraarutinit utertoorutissaqarnersutit paasiniarlugu akileraarutivit naatsorsornissaannut naatsorsuiffissaq atorsinnaavat.

Naatsorsuiffissaq (PDF)

Naatsorsuiffissaq (Excel)

Akileraarutinit utertoornissamut qinnuteqaat immersugassaq immersoreerukku, Akileraartarnermut Aqutsisoqarfimmut nassiutissavat imaluunniit tunniukkiartorlugu.

Qinnuteqarnermi ilanngutissavatit:

• Nammineerluni nalunaarsukkap kopiia
• Ukiumut akissarsiat allagartaasa kopiia
• Saniatigut isertitarisamasat takussutissartaat
• Akileraaruteqaataasussanit ilanngaatit takussutissartai
• Nammineerluni nalunaarsuummut uppernarsaatit allat ilanngukkumasat
• Inuttut inissisimanermut tunngatillugu nassuiaat (Qinnutigineqartut 5.000 kr. ataappagit)

Inuussutissarsiummik ingerlataqartut ilanngullugit nassiutissavaat:

• Naatsorsuutit (Ukiumi aningaasarsiorfimmi naatsorsuutit inerneri)
• Ukiumut pisiarisimasat nalikilliligassat uppernarsaatai

Akileraarutit sinneqartoorutaasut tunniunneqarnissaat qinnuteqaatigisinnaavatit kingusinnerpaamik nammineerlutit nalunaarsuiffiit Akileraartarnermut Aqutsisoqarfimmit tiguneqarneranit qaammat ataaseq qaangiutinnginnerani.