Akileraarutit pillugit naammagittaalliuuteqarneq

Akileraartarnermut Aqutsisoqarfiup augustip naalernerani inaarummik naatsorsuinermik, ukiup siuliani illit akileraartarninnut tunngasut pillugit naatsorsuummik takutitsisoq, ilinnut nassiuttarpaa. Inaarummik naatsorsuummi takuneqarsinnaavoq, ukiup siuliani akileraarutinik akiliivallaarsimanersutit, akiliinikippallaarsimanersutit imaluunniit taaneqartut arlaannik inerneqanngitsumik.

Akileraartarnermut Aqutsisoqarfiuttaaq ukiup ingerlanerani aningaasarsiavit akileraarutaasussat allannguutissaannut siunnersuummik nassissinnaavaatit, assersuutigalugu paasissutissanik nutaanik takkuttoqarsimappat imaluunniit Akileraartarnermut Aqutsisoqarfiup isertitatit misissuataarsimagunigit.

Aningaasarsiatit akileraarutaasussat pillugit Akileraartarnermut Aqutsisoqarfiup angissusiliinera imaluunniit inaarutaasumik akileraarutigisassavit naatsorsornerat isumaqatiginngikkukku, Akileraartarnermut Aqutsisoqarfimmut saaffiginneqqaassaatit.

Akileraarutit eqqortuunngitsumik naatsorsorneqarsimaneranik suli isumaqaruit, Akileraartarnermut Aqutsisoqarfiup aalajangigaa pillugu naammagittaalliuuteqarsinnaavutit. Naammagittaalliuutigisinnaavatit assersuutigalugu:
• Ilinnut tunngatillugu inaarummik naatsorsuineq
• Aningaasarsianik akileraaruteqaataasussanik angissusiliineq. Tassa imaappoq, akileraarutissavit naatsorsorneqarnissaanut tunngavissaq
• Akileraartarnermut Aqutsisoqarfiup akileraarutissanik naatsorsuinera

Naammagittaalliuuteqarniaruit allaganngorlugu tunngavilersorlugulu naammagittaalliussaatit. Tassa ima paasillugu, suut pillugit naammagittaalliuuteqarnerlutit nassuiassavat tunngavilersorlugulu kiisalu sooq naammagittaalliuteqarnerlutit. Tassa immikkoortuni suni Akileraartarnermut Aqutsisoqarfik isumaqatiginnginnerit paasissutissiissutigissavat.

Ilanngussat pisariaqartut tamaasa naammagittaalliutinnut ilanngutissavatit. Ilanngussat sorliit pingaaruteqarnersut naammagittaalliuutigisannut tunngaveqartut, matumani pineqarput, assersuutigalugu makkuusinnaapput:
• Akissarsiat allagartaat
• Inaarummik naatsorsuutit
• Akileraartarnermut Aqutsisoqarfimmit allakkat
• Akileraarutit B-t akilikkat aamma nammineq piumassutsimik akileraarutit akilikkat uppernarsaataat

Naammagittaalliuutit pisariaqartunik tamanik ilanngussartalik nassiutissavat uunga:

Akileraarusiinernik Aalajangiisartut
Postboks 1037
3900 Nuuk

Aalajangiinerup naammagittaalliutigiumasavit tiguneranit kingusinnerpaamik qaammatit pingasut qaangiunneranni, naammagittaalliuut Akileraarusiinernik Aalajangiisartut tigoreersimassavaat. Piffissaliunneqartoq suli qaangiutinngitsoq Akileraarusiinernik Aalajangiisartut naammagittaalliuut tigusimanngippassuk, naammagittaalliuutivit suliarineqarnissaa itigartitsissutigineqarsinnaavoq.

Suliamik suliarinninneq
Naammagittaalliuutit Akileraarusiinernik Aalajangiisartut tigoreerunikku, suliassap tiguneqarnera pillugu allagarsissaatit. Malitsigisaanik suliassiissutinnut aalajangiinissamut siunnersuut tigujumaarpat. Siunnersuummut akissuteqarnissaannut nalinginnaasumik sivikinnerpaamik sapaatit-akunnerinik sisamanik periarfissaqarputit.

Tamatuma kingorna Akileraarusiinernik Aalajangiisartut suliassaq suliarissavaat, kingornatigullu Akileraarusiinernik Aalajangiisartunit aalajangiussaq tigussavat.

Eqqartuussivimmut suliassiineq
Akileraarusiinernik Aalajangiisartut aalajangiinerat isumaqatiginngikkukku, suliassaq Nunatta Eqqartuussivianut suliassiissutigisinnaavat. Akileraarusiinernik Aalajangiisartut inerniliussaata tiguneranit kingusinnerpaamik qaammatit arfinillit qaangiunneranni suliassaq Nunatta Eqqartuussivianut suliassiissutigisinnaavat.

Naammagittaalliuutivit tiguneranit qaammatit aqqaneq-marluk ingerlaneranni naammagittaalliuutit Akileraarusiinernik Aalajangiisartut suli suliarisimanngippassuk, toqqaannartumik suliassaq Nunatta Eqqartuussivianut suliassiissutigisinnaavat, naak Akileraarusiinernik Aalajangiisartut suliassaq suli aalajangiiffiginngikkaluaraat.

Naammagittaalliuuteqarnissamut piffissaliunneqartoq qaangiutereersoq pisut immikkut ittut atuukkaangata naallu suliaq aalajangiiffigineqareeraluartoq, Akileraarusiinernik Aalajangiisartut suliaq qaqileqqissinnaavaat. Suliaq ilinnut tunngasoq qaqileqqinneqarsinnaassappat, paasissutissanik nutaanik saqqummiussaqarsinnaasariaqassaatit aamma paasissutissat nutaat taakku Akileraarusiinernik Aalajangiisartut naliliippata, paasissutissat siusinnerusukkut saqqummiunneqarsimagaluarpata Akileraarusiinernik Aalajangiisartut allaanerungaatsiartumik aalajangiisimassagaluartut.

Suliassiissutiginiakkat qaqileqqinneratigut suliarineqarnissaa qinnuteqaatiginiarukku, tamanna allakkatigut tunngavilersukkamillu qinnuteqaatigissavat. Qinnuteqaatit paasissutissanik nutaanik ilaqartillugu Akileraarusiinernik Aalajangiisartunut nassiutissavat:

Akileraarusiinernik Aalajangiisartut
Postboks 1037
3900 Nuuk

Akileraarusiinernik Aalajangiisartunut suliassap qaqileqqinneqarnissaanut piffissaliussami, naammagittaalliuummi suna pineqarnersoq apeqqutaasarpoq:
• Naammagittaalliuutit akitsuutinut tunngappat, qinnuteqaatit kingusinnerpaamik ukiut sisamat qaangiutsinnagit aamma akitsuutip akilerneqarfissaata qaammatit pingasut qaangiunneranni Akileraarusiinernik Aalajangiisartut tigoreersimassavaat
• Naammagittaalliuutit akileraarutinut allannut tunngappat, ukiup aningaasarsiorfiusup qaangiunnerata kingorna ukiut tallimassaanni 31. oktober nallertinnagu qinnuteqaatit Akileraarusiinernik Aalajangiisartut tigoreersimassavaat