Paasissutissiinissamut pisussaaffeqarneq il.il.

Paasissutissiinissamut pisussaaffeqarneq isumaqarpoq, allannguutit ilinnut ikiorsiissutinik allannguinermik aamma/imaluunniit unitsinneqarnerannik kinguneqarsinnaasut pillugit kommunimut paasissutissiinissamut pisussaaffeqartutit.

Ikiorsiissutit allanngortinneqarneri
Allannguutit, pisortanit ikiorsiissutit allanngortittariaqarnerannik unitsittariaqarneranilluunniit isumaqartut, assersuutigalugu makkuusinnaapput:

• suliffeqalertutit,
• ilinniagaqarnermik aallartitaqartutit,
• utoqqalinersiaqalertutit,
• kisermaatut inissisimajunnaartutit imaluunniit katissimallugu assingisaanilluunniit aappaqalersutit imaluunniit
• kingornussisutit.

Allannguutinik nalunaarutiginninneq oqarluni imaluunniit allalluni pisinnaavoq. Oqartussaasut piumasarisinnaavaat, immersugassaq aalajangersimasoq atorlugu paasissutissat tunniunneqassasut. Taamatut iliortoqassappat kommunip/oqartussaasut tamanna pillugu ilitsersuutissavaatit. Nalunaarutiginninnerit pillugit kommunip tigusimaneranut uppernarsaammik tamatigut pissarsisinnaavutit.

Pisortanit ikiorsiissutit tiguneqartut pillugit utertitsilluni akiliuteqarnissaq pillugu kommuni aalajangiissaaq, ima pisoqarpat:

- paasissutissanik, ikiorsiissutit annertussusaannik sunniuteqartussamik, kommunimut tunniussisussaallutit ilisimaarereerlugu tunniussisimanngikkuit,
- ilisimareeraluarlugu, illit pisinnaatitaaffiginngisannik, ikiorsiissutinik eqqunngitsumik tigusaqarsimaguit,
- kingusinnerusukkut taarsiissutinik, pisortanit soraarnerussutisianik, meeqqamut akilersuutinik assigisaanilluunniit, piffissami pisortanit ikiorsiissutinik tunniunneqartussanik tassunga tunngasunik, imaluunniit
- illit pisortanit ikiorsiissutinik tigusisareerlutit, aningaasaqarnikkut imaluunniit sulinermut tunngatillugu illersorneqarsinnaanngitsumik iliuuseqarnikkut, saniatigut ikiorsiissutinik qinnuteqartariaqalerlutit.

Aningaasaqarnikkut imaluunniit sulinermut tunngatillugu illersorneqarsinnaanngitsumik iliuuseqarnerit
Ima pisoqarsinnaavoq, illit piffissap sivikitsup ingerlanerani ikiorsiissutit tamaasa nungullugit atoritit taamaattumillu piffissap sinneranut inuuniarnermut pisariaqartitanut akissaarullutit. Assersuut alla tassaasinnaavoq, suliffimmi unioqqutitsillutit sulinngitsoornerit pissutigalugu illit suliffinniit soraarsitaasutit.
Aningaasaqarnikkut imaluunniit sulinermut tunngatillugu illersorneqarsinnaanngitsumik iliuuseqarnerit pissutigalugu, pisortanit ikiorsiissutinik utertitsilluni akiliuteqarnissaq pillugu kommuni aalajangiippat, tamanna ilinnut kingusinnerpaamik pisortanit ikiorsiissutit tunniunneqarneri peqatigalugit allakkatigut nalunaarutigineqassaaq.
Pisortanit ikiorsiissutit pillugit utertitsilluni akiliuteqarnissaq pillugu piumasaqaateqarneq matumani pisumi tunniussinerup kingorna ukiut marluk qaangiuppata pisoqalissaaq.
Aalajangiineq pillugu isumaqataanngikkuit, Isumaginninnermi Naammagittaalliuuteqartarfimmut aalajangiineq naammagittaalliuutigisinnaavat.

Kommuni politiinut unnerluutiginnissaaq illit aappalluunniit pillugu kommuni naapertuuttumik tunngavissaqarsorippat, makkua pillugit:

- ilisimaaralugu paasissutissanik kukkusunik nalunaaruteqarsimaguit, imaluunniit
- pisortanit ikiorsiissutit tunniunneqarnissaannut pingaaruteqartunik allannguutinik paasissutissanik tunniussisimanngikkuit.