Inatsisit naapertorlugit ingerlatsivinnut Digitalimik Allakkerineq

Suliffeqarfiit pisortaqarfiillu Kalaallit Nunaanniittut pisortaqarfinnit digitalimik allagarsisartissaapput.

Suliffeqarfiit digitalimik allagarsianik pisussaajunnaarsinneqarnissamut qinnuteqarsinnaapput. Qinnuteqaat tunngavilersorneqassaaq.

Pisortani Digitalimik Allakkerineq pillugu Inatsisartut inatsisaanni § 4-mi imm. 8-mi allassimasut malillugit allakkatigut tunngavilersuilluni atsiornikkut pisussaajunnaarsinneqarneq pisinnaavoq. Pisussaajunnaarsinneqarnissamut tunngavilersuutit immikkuullarissuusariaqarput.

Immikkuullarissutut taaneqarsinnaavoq suliffeqarfik internetimut attaveqarsinnaannginnera. Taamaattoqassappat aamma uppernarsaasersorneqartariaqarpoq suliffeqarfik internetimut attavilersinnaanngitsoq.

Suliffeqarfiit digitalimik allagarsianik pisarunnaarnissaannut tunngavissat immikkuullarissutut taasat annikitsuaraapput. Tassami naatsorsuutigineqarpoq suliffeqarfiit suleqatigisartakkaminnik attaveqarnissaminnut internetimik pisariaqartitsinissaat.

Taamaakkaluartoq suliffeqarfiit ataasiakkaat interneteqanngikkaluarlutik sumiiffiit ilaanni ingerlatsisinnaapput. Taakkualu pisussaajunnaarsinneqarnissaminnut periarfissaqassapput. Taamaattoqassappallu tamanna tunngavilersuutigineqartariaqarpoq.

Pisortaqarfimmi suliffeqarfimmiluunniit sulisoq atsiorsinnaatitaasoq, pisortaqarfinnit allakkanik digitaliusunik pisussaajunnaarsinneqarnissamut tunngavilersuilluni allakkatigut digitalimik qinnuteqarsinnaavoq.

Pinerlunniartoqarsinnaanera pinaveersaartinniarlugu, atsiorsinnaasutut qinnuteqartitaq CVR-imi nalunaarsuiffimmi allassimassaaq, namminerlu MitID-ni atorlugu qinnuteqassalluni, suliffeqarfimmilu atsiorsinnaanini uppernarsassallugu.

Una toorlugu pisortaqarfik suliffeqarfilluunniit pisortaqarfinnit allakkanik digitaliusunik pisussaajunnaarsinneqarnissaanut qinnuteqartoqarsinnaavoq.

Pisortaqarfimmi suliffeqarfimmiluunniit sulisoq atsiorsinnaatitaasoq, pisortaqarfinnit allakkanik digitaliusunik pisussaajunnaarsinneqarnissamut tunngavilersuilluni allakkatigut tigussaasumik qinnuteqassaaq.

Suliffeqarfiup pisortaqarfiulluunniit pisussaajunnaarsinneqarnissamut qinnuteqaammini ataani allassimasut ilanngutissavai:

1. Pisussaajunnaarsinneqarnissaminut tunngavilersuinissaq
2. Tunngavilersuilluni qinnuteqaat suliffeqarfik pillugu atsiorsinnaasoq atsiorsimassaaq
   
   

Qinnuteqaat tunngavilersugaq allaganngorlugu uunga nassiunneqassaaq:
Digitalinngortitsinermik Aqutsisoqarfik
Imaneq 1
3900 Nuuk

Pisortani Digitalimik Allakkerinermit pisussaajunnaarsinneqarnissamut qinnuteqaat Digitalinngortitsinermut Aqutsisoqarfimmut tunniutereerukku piffissaq sivitsunngitsoq akissutisissaatit.

Suliffeqarfiup qinnuteqaataa akuerineqarpat, taava pisortanit digitalimik allagarsisarunnaarlutit allakkanik tigussaasunik nassinneqartalissaatit.

Tassunga tunngatillugu suliffeqarfiup qulakkiissavaa suliffeqarfik allakkanik tigussaasunik nassinneqarsinnaanissaa. Suliffeqarfiup misissortariaqarpaa allakkat najukkamut apuunneqartarnersut imaluunniit allatigut pissarsiarineqartariaqartassanersut.

Suliffeqarfiup qinnuteqaataa itigartitsissutigineqarsimappat, taava Digitalinngortitsinermut Aqutsisoqarfimmit allakkamik nassinneqassaatit.

Pisussaajunnaarsinneqarnissamut qinnuteqaammut akissuteqarnissamut killiliussaq
Qinnuteqaat Digitalinngortitsinermut Aqutsisoqarfimmut tunniutereerukku piffissaq sivitsunngitsoq akissutisissaatit.

Pisussaajunnaarsinneqarnerup sivisussusaa
Suliffeqarfik pisortaqarfilluunniit Allakkanut Digitaliusunut pisisussaajunnaarsinneqarnera piffisalersugaavoq.
Ukiup tulliani novembarip aallaqqaataa akuersissut atorunnaassaaq.

Suliffeqarfik Kalaallit Nunaanni ingerlanneqarunnaassagaluarpat pisussaajunnaarsinneqarnermut akuersissut killeqanngitsoq tunniunneqassaaq.

Suliffeqarfiup pisussaajunnaarsinneqarnissamut akuersissutigisaminik taamaatitsiniarluni qaqugukkulluunniit Digitalinngortitsinermut Aqutsisoqarfik saaffigisinnaavaa.

Digitalinngortitsinermik Aqutsisoqarfiup aalajangiussaat allanngortinneqarsinnaanngilaq. Aalajangiussaq pillugu maalaaruteqartoqarsinnaanngilaq, takuuk Pisortani Digitalimik Allakkerinermut ilanngunnermit inunnik pisussaajunnaartitsineq pillugu Namminersorlutik Oqartussat nalunaarutaat nr. 34 23. september 2020-meersumi §§ 5 imm. 5.

Allakkat Digitaliusut

e-Boks-ikkut allakkat digitaliusut

e-Boks imatut atussavat