Aqutsiveqarfik 47-mi; Upernavik; Uummannaq aamma Qeqertarsuup Tunuani umiatsiaararsorluni PNNP-mik qinnuteqaat

Aqutsiveqarfik 47-mi; Upernavimmi, Uummannami aamma Qeqertarsuup Tunuani umiatsiaararsorlutik aalisartut Pisassiissutinut Nammineq Pigisanut Niuerutigineqarsinnaasut (PNNP) 1. januaari 2025-mit nuussinnaapput. Kajumissutsimik nuuttoqarsinnaavoq. Paggatassanik aalisaannarniaraanni allannguuteqanngilaq.

PNNP isumaqarpoq pisassiissutit nammineq pigisaasut niuerutigineqarsinnaasullu. Pisassiissutinik pigisanik pisariaqartitsinerit malillugit pisinissamut tunisinissamullu periarfissaqarputit.

Naalakkersuisut aqutsiveqarfinnut ataasiakkaanut Qeqertarsuup Tunuanut, Upernavimmut aamma Uummannamut annertunerpaamik pisarineqarsinnaasutut akuerineqartunik (TAC-mik) ukiut tamaasa aalajangiisarput. TAC illillu pigisatit tunngavigalugit tonsinik qanoq annertutigisunik aalisarsinnaanerit (ukiumut pisassiissutinik) ukiut tamaasa naatsorsuisoqartarpoq. PNNP-mut pisassiissutit pisassiissutinik pigisaqartunut assigiinngitsunut pisassiissutinit qanoq annertutigisunik pigisaqarnerat malillugu agguaanneqartarput. Pisassiissutinit pigisaqaruit atuisinnaatitaavutit, tassa ukiumut pisassiissutinik allanngortinneqarnikunik atuisinnaatitaavutit. Akerlianik atuisussaatitaavutit, tamassumalu kinguneraa ukiumut pisassiissutit minnerpaamik 75%-ii pisarissagitit.

Pisassiissutinit pigisat kingornunneqarsinnaapput assersuutigalugulu aningaaserivimmi taarsigassarsinermi qularnaveeqqutitut atorneqarsinnaallutik.

PNNP-mi aamma pisassiissutinik ukiumit ukiumut nuussinissamut periarfissaqarpoq, tassani ukiumut pisassiissutit 25%-iinik ukiup tullianut nuussisinnaavutit. Taamaalillutit ukiumut pisassiissutit pisarineqanngitsut 25%-ii tikillugit ukiup tulliani pisarisinnaavatit. PNNP-mi aamma ukiumut pisassiissutit 10%-ii tikillugit tunisisinnaatitaavutit. Periarfissaq taanna atorukku pisassiissutinit pigisat 10%-ii takku ukiup tullianut nuussinnaasannit ilanngaatigineqassapput. Tassa ukioq manna ukiumut pisassiissutit 10%-ii tunigukkit 15%-it tikillugit ukiup tullianut nuussinnaavatit.

Umiatsiaaraq atorlugu PNNP atorlugu aalisarneq kajumissutsimik pisarmat, nuunnissamut qinnuteqaammik nassitsissaatit. Taamaallaat ukiup nikinnerani PNNP-mut nuussinnaavutit – aatsaallu aqutsiveqarfik 47-mi qaleralinniarsinnaanermut akuersissummik peqaruit. PNNP-mut nuunnissamut ukiut tamaasa qinnuteqarsinnaavutit, taamaalillutit maannakkut qinnuteqarnissamut pisaaffeqanngilatit

Pisassiissutinit pigisatit aalisarneq pillugu ukiuni kingullerni tallimani ukiut pingasut pisaqarfiginerpaasatit tunngavigalugit naatsorsorneqassapput. PNNP-mut nuukkuit paggatassanik aalisarnermut uteqqissinnaanngilatit, aamma pisassiissutinit pigisatit tunisimagukkit.

Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarnikkut malinnissaannut pisussaaffeqarputit.

Kalaallit Nunaanni suliffeqarfittut, kisimiillunilu ingerlatsisutut, tassalu aamma umiatsiaararsortut
Kalaallit Nunaanni suliffeqarfiit Qitiusumik Suliffeqarfinnik Nalunaarsuiffiannut(CVR) nalunaarsussaatit. Uani nalunaarsorsinnaavutit CVR normumillu pillutit: https://virk.dk/myndigheder/stat/ERST/selvbetjening/Start_groenlandsk_virksomhed/ 

Aqutsiveqarfik 47-mi; Upernavimmi, Uummaannami aamma Qeqertarsuup Tunuani, umiatsiaaqqat atorlugu Pisassiissutinit Pigisat Niuerutigineqarsinnaasunut (PNNP-mut) nuunnissamik qinnuteqarsinnaajumallutit, illit/suliffeqarfivit piumasaqaatit uku eqqortissavatit/-vai:

• Aqutsiveqarfik 47-mi umiatsiaaraq atorlugu aalisarsinnaanermut akuersissuteqassaatit
• Suliffeqarfiit Qitiusumik Suliffeqarfinnik Nalunaarsuiffimmi nalunaarsorneqarsimassaaq; CVR normut uani pissarsiariuk: https://virk.dk/myndigheder/stat/ERST/selvbetjening/Start_groenlandsk_virksomhed/

Aqutsiveqarfik 47-mi; Upernavimmi, Uummaannami aamma Qeqertarsuup Tunuani, umiatsiaaqqat atorlugu Pisassiissutinit Pigisat Niuerutigineqarsinnaasunut (PNNP-mut) nuunnissamik qinnuteqarsinnaajumallutit, illit/suliffeqarfivit piumasaqaatit uku eqqortissavatit/-vai:

• Aqutsiveqarfik 47-mi umiatsiaaraq atorlugu aalisarsinnaanermut akuersissuteqassaatit

• Suliffeqarfiit Qitiusumik Suliffeqarfinnik Nalunaarsuiffimmi nalunaarsorneqarsimassaaq; CVR normut uani pissarsiariuk: https://virk.dk/myndigheder/stat/ERST/selvbetjening/Start_groenlandsk_virksomhed/ 

Aqutsiveqarfimmi 47-mi; Upernavimmi, Uummannami aamma Qeqertarsuup Tunuani umiatsiaaraq atorlugu PNNP-mut nuunnissamik qinnuteqarniaruit, qinnuteqarnermi immersugassaq immersussavat.

Tuugassaq sungaartoq “Uani qinnuteqarit” toorlugu:

• Immersugassaq attaveqaatikkut immersorniarukku anisillugulu tooruk “Immersuigit anisillugulu”.

 

Immersugassaq immersorneqarnikoq najukkanni kommunip allaffianut imaluunniit Aalisarnermut Piniarnermullu Naalakkersuisoqarfimmut, aalisa@nanoq.gl  tunniutissavat.

Qinnuteqaatit nassiutereerukku, qinnuteqaatit Aalisarnermut Piniarnermullu Naalakkersuisoqarfimmi nalunaarsorneqassaaq, qinnuteqaativillu tiguneqarnerata uppernarsarneqarneranik nassinneqassallutit:

• Qinnuteqaatit qinnuteqarnissamut piffissarititaq naappat Aalisarnermut Piniarnermullu Naalakkersuisoqarfimmi suliarineqassapput. Sumiiffik 47-mi paggatassanik aalisarnermit PNNP-mut nuunnissamik qinnuteqarnissamut piffissarititaq tassaavoq ulloq 1. oktober.

• Aalisarnermut Piniarnermullu Naalakkersuisoqarfiup pisassiissutinit pigisatit ukiuni kingullerni tallimani ukiut pingasut pisaqarfiginerpaasatit tunngavigalugit naatsorsussavai. Ukiuni tallimani paggatassanik aalisarsimanngikkuit pisassiissutinit pigisatit ukiut pingasut pisaqarfiginerpaasatit tunngavigalugit naatsorsorneqassapput.

• Naatsorsuisoqareerpat tusarniarneqassaatit, tassani naatsorsuineq misissorsinnaavat pisassiissutiniillu pigisassavit missingernerinik nalunaarfigineqassaatit.

• Aalisarnermut Piniarnermullu Naalakkersuisoqarfiup qinnuteqartut tusarniaaffigineqareerpata naatsorsuinerit tamaasa misissoqqissavai inaarutaasumillu naatsorsuilluni. Tusarniaaneq allannguinissanik kinguneqarsimappat assigiinngissuteqartoqarsinnaanera eqqumaffigiuk.

• Suliarinninneq naammassippat ukuninnga pisoqassaaq

o Aalisarsinnaanermut akuersissutit ukiumullu pisassiissutit pillugit nalunaarutit qinnuteqartunut tunniunneqassapput, tassani pisassiissutinit pigisatit nutaat ukiumullu pisassiissutit atorsinnaasatit takusinnaavatit.

• Qinnuteqaatit pillugu akissummik kingusinnerpaamik decembarip qaammataata naanerani tigusaqassaatit.

Aalisarsinnaanermut akuerissutinni paasissutissat allanngorsimappata Aalisarnermut Piniarnermullu Naalakkersuisoqarfimmut paasissutissiinissamik pisussaaffeqarputit. Assersuutigalugu tassaasinnaapput suliffeqarfivit angallativilluunniit allanngornera.

Allannguutit tiguneqarpata aalisarsinnaanermut akuersissummik nutaamik paasissutissanik nutaanik imaqartumik tunineqassaatit.

Aalisarsinnaanermut akuersissutivit paasissutissanik eqqortunik imaqarnissaa inuussutissarsiutigalugu aalisartutut akisussaaffigivat.

Aqutsiveqarfik 47-mi; Upernavimmi, Uummannami aamma Qeqertarsuup Tunuani umiatsiaaraq atorlugu PNNP atorlugu aalisarnermut nuunnissamut qinnuteqarnissamut piffissaliussaq tassaavoq ulloq. 1. oktober.

Qinnuteqaatit 1. oktober tikitsinnagu nassiussimanngikkukku, aatsaat ukiup kininnerata tulliuttup kingorna PNNP-mut nuussinnaavutit.

Aalisarnermut Piniarnermullu Naalakkersuisoqarfiup aalajangigai oqartussanut allanut maalaarutigineqarsinnaanngillat.