Avataasiorluni aalisarnissamut akuersissummik qinnuteqarneq

Inuussutissarsiutigalugu aalisartutut Aalisarnermut Piniarnermullu Naalakkersuisoqarfimmit aalisarnermik ingerlatannut akuersissummik atuuttumik peqassaatit.

Imatut inissisimaguit aalisarsinnaanermut akuersissummik qinnuteqarsinnaavutit:

• inuttut ataasiakkaatut
• ingerlatseqatigiiffittut

Aalisarnermut akuersissut aalisagaqatigiinnut ataatsimut atuuppoq:

• Sumiiffimmi killilikkami ataatsimi
• Ukiumi ataatsimi 1. januar-imiit december 31-nut, imaluunniit
• Piffissami aalisarfiusumi ataatsimi Aalisarnermut Piniarnermullu Naalakkersuisoqarfimmit nalunaarutigineqartumi

Avataasiorluni aalisarnermi akuersissummik piffissamik killilikkamik qinnuteqarsinnaavutit, tamannalu januarip aallaqqaataaniit decemberip naanissaata tungaanut atuutissaaq. Akuersissummi ukiumi akuersissutip atuuffiani qanoq amerlassutsikkut tonsinik annertutigisunik pisaqarsinnaanersutit takuneqarsinnaassaaq.


Inuussutissarsiutigalugu aalisartutut nalunaartarnissamut pisussaaffeqarputit. Pisatit sanitigullu pisarisuukkatit nalunaarutigisartussaavatit. Saniatigut pisarisuukkat tassaapput aalisakkat tunineqarsinnaanngitsut, timmissat, miluumasut imarmiut, pupiit koral-illu.
Pinngortitap eriagineqarnissaanut nammineerlutit aamma akisussaaffeqarput. Imaq ataatsimoorluta isumalluutigaarput ataatsimoorlutalu aamma akisussaaffigalutigu.

Annertunerusumik Kalaallit Nunaata aalisarnera pillugu, pisassiissutit pillugit, aqutsinissamut pilersaarutit pillugit il.il. Aalisarnermut Piniarnermullu Naalakkersuisoqarfiup nittartagaani uani, www.apn.gl.-mi annertunerusunik atuarsinnaavutit.

Inuussutissarsiutigalugu aalisartutut aalisarsinnaanermut akuersissut pillugu qinnuteqarsinnaanermut piumasaqaatit makku naammassisimassavatit:

• Angallatigisat Søfartsstyrelsip angallatinut nalunaarsuiffiani nalunaarsorsimassaaq.
• Kalaallit Nunaanni akileraarutinut akiliisarputit, ukiunilu kingullerni marlunni akiliisarsimallutit
• Kalaallit Nunaanni najugaqartuuvutit, ukiunilu kingullerni marlunni najugaqartuusimallutit

Tamatuma saniatigut ingerlatseqatigiiffinnut makku piumasaqaataapput:

• Ingerlatseqatigiiffik aktiaateqarluni ingerlatseqatigiiffiussaaq, piginneqataassuteqarfiulluni ingerlatseqatigiiffiussaaq, piginneqatigiiffiussaaq imaluunniit piginneqatigiilluni
• umiarsuaatileqatigiiffiussalluni
• Ingerlatseqatigiiffiup aningaasaataasa minnerpaamik 2/3‑ii inunnit ataasiakkaanit toqqaannartumik imaluunniit toqqaannanngitsumik pigineqassapput, taannalu
  
  • Kalaallinut inuiaqatigiinnut aalajangersimasumik attuumassuteqassaaq (piginnittuunermut uppernarsaat aamma inuit allattorsimaffiat)
  • Kalaallit Nunaanni inuit allattorsimaffianni najugaqartuusimassaaq, ukiunilu kingullerni marlunni najugaqartuusimassalluni
  • Ukiuni kingullerni marlunni Kalaallit Nunaanni tamakkiisumik akileraartussaatitaasimassaaq
• Ingerlatseqatigiiffik ukioq naallugu aningaasaqarnikkut piujuartitsinermik tunngaveqarluni aalisarnissamik qulakkeerinnissimassaaq

Aalisarnermut atortunut tunngatillugu piumasaqaatit:

• Aalisarnermut atortuutit piginnittup aqqanik aamma/imaluunniit angallatip taaguutaanik ersarissumik ilisarnaaserneqarsimassapput. Ilisarnaatit imermit arrortinneqarsinnaassanngillat.
• Aalisarnermut atortuutit tamarmik atorneqareeraangata nammineerlutit peerneqartarnissaat akisussaaffigaat. Aalisarnermut atortuutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. 3 sømilip iluani tunngaviusumik killeqarfiup iluani atortuutitit annaasimagukkit tamanna aamma kommunimut nalunaarutigissavat.

Imarpimmi aalisarsinnaanermut akuersissummut qinnuteqarusukkuit (kalallit nunaanni, nunallu tamalaat imartaanni, norskit, islandimiut imaluunniit savalimmiut imartaanni) qarasaasiakkut toortagaq sungaartoq toorlugu nammineq sullinnermi "Maana qinnuteqarit" uani quppernerup qulaani allaqqasoq toorlugu qinnuteqassaatit. Immersuiffissaq qarasaasiakkut immersorniarukku nassiunniarukkulu "Immersoruk nassiullugulu" toqqaruk.

Qinnuteqaatinni ilanngussassat makku ilanngutissavatit:

• Piginnittuunermut uppernarsaat (ingerlatseqatigiiffinnuinnaq attuumassuteqarpoq)
• Angallatigisappit Søfartsstyrelsenip angallatinut nalunaarsuiffiani nalunaarsorsimaneranut uppernarsaat (qinnuteqartunut/angallatinut nutaanut taamaallaat atuuppoq)
• Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (qinnuteqartunut/angallatinut nutaanut taamaallaat atuuppoq)
• Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (qinnuteqartunut/angallatinut nutaanut taamaallaat atuuppoq)
• Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
• Angallatip digitaliusumik qalipaatilerlugu assilineqarnera (angallatinut qinnuteqartunut nutaanut taamaallaat atuuppoq)

Aalisarsinnaanermut akuersissut aalisagaqatigiinnut ataatsinut atuuttarpoq, taamaattumillu aalisagaqatigiit aalisarusutatit ataasiakkaarlugit immikkuutaarlugit qinnutigissavatit.

Toortakkap sungaartup "Ugguuna qinnuteqarit"-mik allaqqasup toorneratigut qarasaasiakkut nammineerlutit immersuiffissamik immersuillutit aallartissaatit.

Imarpimmi aalisarsinnaanermut akuersissummut qinnuteqarusukkuit (kalallit nunaanni, nunat tamalaat imartaanni, norskit, islandimiut imaluunniit savalimmiut imartaanni) qinnuteqarnermut immersugassaq immersoqqaassavat.

Toortagaq sungaartoq "Uani qinnuteqarit" toorneratigut:

• "Immersoruk anisillugulu" toorsinnaavat, immersugassaq qarasaasiatigut immersornissaa aammalu anisinnissaa kissaatigigukku.

Qinnuteqaatinni ilanngussassat makku ilanngutissavatit:

• Piginnittuunermut uppernarsaat (ingerlatseqatigiiffinnuinnaq attuumassuteqarpoq)
• Angallatigisappit Søfartsstyrelsenip angallatinut nalunaarsuiffiani nalunaarsorsimaneranut uppernarsaat (qinnuteqartunut/angallatinut nutaanut taamaallaat atuuppoq)
• Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (qinnuteqartunut/angallatinut nutaanut taamaallaat atuuppoq)
• Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (qinnuteqartunut/angallatinut nutaanut taamaallaat atuuppoq)
• Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
• Angallatip digitaliusumik qalipaatilerlugu assilineqarnera (angallatinut qinnuteqartunut nutaanut taamaallaat atuuppoq)

Immersugaq Aalisarnermut Piniarnermullu Naalakkersuisoqarfimmut tunniutissavat.

• Qinnuteqaatit nassiukkukku, qinnuteqaatit Aalisarnermut Piniarnermullu Naalakkersuisoqarfimmit tiguneqartutut nalunaarsorneqassaaq, qinnuteqaativillu Naalakkersuisoqarfimmit tiguneqarsimaneranut uppernarsaammik tigusaqassaatit.
• Qinnuteqarnissamut ulloq killigititaasup qaangiunneranit qinnuteqaatit Aalisarnermut Piniarnermullu Naalakkersuisoqarfimmit suliarineqalissapput. Avataasiorluni aalisarnissamut qinnuteqarnissamut killiliussaq tassaavoq ulloq 1. november.
• Sulianik sullissineq naammassippat Aalisarsinnaanermut akuersissutit pisassiissutillu pillugit nalunaarut naapertorlugu Naalakkersuisut pisassiissutissat inissereerpagit taava
  
  • qinnuteqarsimasuni akuersissutinik pissarsisimasut pisassiissutissaannik tunineqarumaarput.
  • pisassiissutissanik tunineqarsimanngitsut itigartitsissummik tunngavilersukkamik nassinneqassapput.
• Qinnuteqarninnut akissuteqaat decembarip naalernerani januarilluunniit aallartisimalernerani tigujumaarpat.
• Pisassiissutit Naalakkersuisut.gl-ikkut imaluunniit tusagassiutitigut nalunaarnikkut saqqummiunneqarumaarput.

Aalisarsinnaanermut akuersissummi massakkut pigisanni paasissutissanik allanngortoqarsimappat, tamatuma Aalisarnermut Piniarnermullu Naalakkersuisoqarfimmut paasissutissiissutiginissaanik pisussaaffeqarputit. Assersuutaasinnaapput ingerlatseqatigiiffiutit angallataatilluunniit pillugit allannguinerit.

Allannguutit tiguneqariarpata nutaamik akuersissusiunneqassaatit, tassanilu paasissutissat nutaat ilaatinneqassapput.

Inuussutissarsiutigalugu aalisartutut paasissutissat eqqortut tunngavigalugit aalisarnermik ingerlatannut akuersissummik atuuttumik peqarnissat akisussaaffigivat.

Avataasiorluni aalisarsinnaanermut ukiup tullianut qinnuteqarnissamut piffissaliussaq tassaavoq ulloq 1. november.

Aalisarnermut Piniarnermullu Naalakkersuisoqarfimmit aalajangiussaq Aalisarnermut Piniarnermullu Naalakkersuisoqarfimmut naammagittaalliutiginissaanut periarfissaqanngilaq.