Umiarsuarmik tunitsivimmik inissiinissamut akuersissummik qinnuteqarit

”Umiarsuaq tunitsivik” tassaavoq angallatit sinerissap qanittuani aalisartunit toqqaannartunik pisiortortartut. Tassa umiarsuaq tunitsivik angallataavoq tunitsivittut atortoq, aalisakkanik tamakkiisumik ilaannakortumilluunniit suliareqqaagassanik imaani tunitsiviusartoq.

Umiarsuarmik tunitsivimmik atuinissamut akuersissummik qinnuteqassaatit:,

• Aalisakkanik tamakkiisumik ilaannakortumilluunniit suliareqqaagassanik imaani tigusat
• Aalisakkat nunamiit umiarsuarmut suliareqqaagassanngorlugit nuussisoqartillugu:
  • Nunami tunisassianik qerititsineq
  • Umiarsuaq sikkussaatillugu tunitsivittut ukiitillugu

Tunngaveqarpoq umiarsuarnut tunitsivinnut tamanut atuuttut aamma aalisakkanut assigiinngitsunut umiarsuarnik tunitsivileerusukkuit tunngaviit aalajangersimasut arlaliupput.

Tunngavigisat nalinginnaasumik:

• Umiarsuaq tunitsivik Kalaallit Nunaanni nalunaarsorneqarsimassaaq.
• Akuersissutit umiarsuarni angallatinik nakkutilliissutitalinnut tunisisarnerit aallartinneqannginneranni taamaallaat tunniunneqartarput.
• Inuttalersuisarnermik nalunaarummi malittarisassat naapertorlugit umiarsuarnut tunitsivinnut inuttat katitigaasimassapput.
• Umiarsuarnik tunitsiviliinissamut akuersissut sumiiffimmut aalajangersarneqarsimasumut kommunip killigi malittarinagit killilerneqartarpoq.
• Umiarsuarmik tunitsiviliisinnaavutit, aalisarnermik siaruartitsisinnaasoq naliliivigineqarsimappat.
• Ingerlatseqatigiiffinnut nunami tunitsiviuteqareersunut, nunami tunitsivik tunitsiviunissamut naatsorsuutigisamit naammassisaqarsinnaassutsimut naammassinnittoqarsinnaanngitsoq Naalakkersuisunit nalilerneqarpat akuersissummik immikkut ittumik aatsaat akuersissuteqartoqarsinnaavoq.

Saarulliit:

• Ingerlatseqatigiiffik qinnuteqaateqartoq tunitsiviuteqariissaaq.
• Sumiiffimmi pineqartumi nunami tunitsivimmi tunisanik tigusinnaasartussutsikkut Naalakkersuisuniit naammanngittutut nalilerneqarpat umiarsuaq tunitsivik taamaallaat oqilisaatitut atorneqassaaq.
• Aalisaruttulerfiup nalaani maaji – septembari akornanni taamaallaat akuersissummik tunniussisoqarsinnaavoq .
• Umiarsuit tunisassiorfiutigisut taamaallaat akuersissummik tunineqarsinnaapput.
• Saarullinnik umiarsuarmik tunitsiviliinissamut akuersissut aalisakkanut allanut qeeqqanut suluppaakkanullu aamma atuutissaaq.

Malugiuk: Qeqertarsuup Tunuata, Upernaviup aamma Uummannap aqutsiveqarfiisa kujataa´tungaanni akuersissut qaleralinnut aamma atuuppoq.

Nipisat:

• lngerlatseqatigiiffik qinnuteqaateqartoq tunitsiviuteqariissaaq.
• Umiarsuarmut tunisassiorfeqanngitsumut akuersissut assartuinermut taamaallaat tunniunneqartarpoq.
• Ingerlatseqatigiiffiup qinnuteqartup namminerisaminik nunami tunitsiviutillip nipisanik assartuinermut nammineq angallatit attartorsinnaavai, kisianni ingerlatseqatigiiffiussaaq assartuinissamut umiarsuarmik tunitsiviliinissamut qinnuteqartoq.

Saattuat:

• lngerlatseqatigiiffik qinnuteqaateqartoq tunitsiviuteqariissaaq.
• Akuersissut assartuinermut taamaallaat tunniunneqartarpoq.

Qalerallit:

• Qaleralinnut angallammik tunitsiviliinissamut sumiiffinni aqutsiveqarfiusuni utaqqiisaagallartumik akuersissuteqartoqarsinnaavoq Upernavimmi aamma Uummannami; tunisisitsinermi akitigut unammillertoqarnissaanik kissaatiginnittoqassappat. Nunami aalisakkerivimmik nutaamik aningaasalersuisoqarnissaa siunertarineqarpat taamaallaat taamaasiortoqarsinnaavoq.
• Umiarsuit tunisassiorfiutigisut akuersissummik taamaallaat tunineqarsinnaapput.
• Ingerlatseqatigiiffinnut aqutsiveqarfiusumi nunami tunitsiveqanngitsuinnarnut akuersissummik taamaallaat tunniussisoqartarpoq.
• Upernavimmi Uummannamilu qaleralinnut umiarsuarmik tunitsiviqalersitsinissannut qinnuteqarniaruit, tunitsivinnut pioreersunut piumasaqaatit atuuttut assigalugit, qinnuteqaatinni nunami tunitsiveqalernissamut ukiunut marlunnut iliuusissatut pilersaarusiamik ilanngussissaatit. Uppernarsaatit uku aamma ilanngutissavatit; innaallagissamik imermillu pilersuineq, uumasut nakorsaannit akuersissut, nunaminertamik tunineqarsimanermut allagartaq, illussanik titartakkat il.il..

Umiarsuarmik tunitsivissamik inissiiniaruit qinnuteqaatimmersussavat.

Una tooruk umiarsuarmik tunitsiviliinissamut akuersissummik qinnuteqarniarlutit

• Angallammut tunitsiviusussamut atorneqartussamut uppernarsaatit soorlu ukuninnga, ilanngussaqassaatit:
• uuttuutinut allagartaq (målebrev), angallatip uuttuutaanut takutitsisoq, aammalu
• angallatip angerlarsimaffianut uppernarsaat (nationalitetsbevis), angallat nunami sorlermi
  angerlarsimaffeqarnersumut takutitsisoq.

Nunami tunisassiorfimmik pilersitsiniarlutit upernarsaatit uku piumasarineqarput:

• Nunami tunisassiorfimmik pilersitsinissamut pilersaarusiaq
• inaallagissamut imermullu pilersuinissaq
• uumasut nakorsaanit akuersissut
•  nunaminertamik agguaassineq
• arkitektinit titartakkat

Una tooruk umiarsuarmik tunitsiviliinissamut akuersissummik qinnuteqarniarlutit

Naalakkersuisut umiarsuarnik tunitsiviliinissanut tunngaviit aalajangikkat 2013-imeersut tunngavigalugit tunitsivinnik umiarsualiinissanut akuersissutinik tunniussisartuupput. Piumasaqaatit takukkit.

1. Aalisarnermut Piniarnermullu Naalakkersuisoqarfik qinnuteqaatip tigusimaneranut uppernarsaammik nassissavaatsit aammalu qinnuteqaativit suliarinissaanut amigaateqarpat attavigiumaarlutit
2. Qinnuteqaatit umiarsuarnik tunitsiviliinissamut piumasaqaatit aallaavigalugit naliliiffigineqartarpoq
3. Qinnuteqaat Aalisarneq pillugu Siunnersuisoqatigiinnut kommunimullu tusarniaassutigineqartarpoq
4. Aalisarnermut Piniarnermullu Naalakkersuisoqarfik Naalakkersuisunut inassuteqaasiortarpoq
5. Naalakkersuisut qinnuteqaammut isummertarput
6. Qinnuteqaammut akuersissummik itigartitsissummilluunniit tigusaqassaatit
7. Suliassamik suliarinninneq, Aalisarneq pillugu Siunnersuisoqatigiinnut aamma kommunimut tusarniaassut ilanngullugu, aamma Naalakkersuisunut inassuteqaat sivisuumik suliarineqartarput. Qinnuteqaammut akissutisinissamut qaammatip ataatsip missaani utaqqisoqartarnissaa naatsorsuutigineqarsinnaavoq

Qinnuteqaammik suliarinnittariaaseq pillugu apeqqutissaqaruit Aalisarnermut Piniarnermullu Naalakkersuisoqarfimmut attaveqarnissannut tikilluaqqusaavutit.

Angallammut tunitsiviusut qinnuteqarsinnaavutit ukioq kaajallallugu.

Oqartussat aalajangeeriaasiat aallaaviatigut maalaarutigisinnaanngilat.. Qinnuteqaatilli akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut Piniarnermullu Naalakkersuisoqarfimmut maalaaruteqarsinnaavutit, taassumalu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku Aalisarnermut Piniarnermullu Naalakkersuisoqarfimmut piaarnerpaamik maalaarutit nassiutissavat.

Maalaarutit allakkatiguussaaq aamma sooq sunalu pillugu maalaaruteqarnerlutit allassavat. Eqqaamajuk maalaarutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut Piniarnermullu Naalakkersuisoqarfiup maalaarutit nalilersussavaa suliarlu ilinnut tunngasoq ingerlanneqareerpat attavigineqarumaarputit.