Aallarteqqinnissamut tapiiffigineqarnissamut qinnuteqarfissaq

Aallarteqqinnissamut tapiissutit siunertaraat, pissutsit pissutigalugit imaluunniit pisoqarnera pissutigalugu inuussutissarsiutit attassinnaanissaa ajornakusuulissappat illit aalisartutut, piniartutut nunalerisutulluunniit inuussutissarsiutit erngertumik ingerlateqqilersinnaassagit. Taamaattumik aallarteqqinnissamut tapiissutinik tigusaqarnikkut pisortanit ikiorsiissutinut ikaarsaarnissat pinaveernissaa qulakkeerniarneqarpoq. Annaasat nammineq sillimasiinikkut matussuserneqarsimasinnaappata pilersitseqqinnermut tapiissutinik tunniussisoqarsinnaanngilaq. Aallarteqqinnissamut tapiissutit taamaallaat sillimmasiisinnaasimanngikkuit tunniunneqarsinnaapput.

Taamaattorli ukiuni kingullerni pingasuni ukiumut isertitatit 250.000 kr.-usimappata appasinnerusimappataluunniit peqatigalugulu ukiuni kingullerni pingasuni agguaqatigiissillugu 100.000 kr.-nik ataallugilluunniit nalilinnik pigisaqarsimaguit sillimmasiisimanngikkaluarlutit aallarteqqinnissamut tapiissutinik tunniunneqarsinnaavutit.

Aallarteqqinnissamut tapiissutit minnerpaamik 2.000 kr. annerpaamillu 50.000 kr. ataasiaannarluni tapiissutitut tunniunneqartarput. Tassa imaappoq, annaasaqarnermut atatillugu tapiissutit pineqarput, annaasat tamakkiisumik matussuserneqarnissaat pineqanngillat. Aningaasat tassunga illikartinneqarnikut nungunnissaasa tungaanut tapiissutinik tunniussisoqarsinnaavoq.

Kalaallit Nunaanni aalisartut, piniartut nunalerisullu ukuninnga peqquteqartumik inuussutissarsiutitigut annaasaqarsimatillutik imaluunniit annaasaqarnissamut aarleqquteqartillutik aallarteqqinnissamut tapiissutinik tunniunneqarsinnaapput:

1) Pigisat ajoquserneratigut, assersuutigalugu motoori, illu, umiatsiaq atortulluunniit aserorsimagunik imaluunniit ajoqusersimagunik (nungullarneq imaluunniit aserfallatsaaliuisimannginneq pissutigalugu ajoqusernernut aallarteqqinnissamut tapiisoqarsinnaanngilaq),
2) Inuussutissarsiummut tunngasut atortut tammarneratigut, assersuutigalugu qassutinik annaasaqarneq
3) Ilungersunartumik napparsimaneq allatigulluunniit sulisinnaajunnaarneq tunngavigalugu pigisanik annaasaqarnermi imaluunniit pigisat aserfallanneranni.
4) Inuussutissarsiornikkut nalinginnaasumik akornuteqarneq, soorlu pissutsit immikkuullarissut atuutillugit imaluunniit immikkuullarissumik pisoqartillugu, assersuutigalugu isumalluutit naammannginnerat imaluunniit akit nalinginnaasuunngitsumik qaffanneri pissutigalugit qimminut nerukkaatissaqannginneq.

Malugiuk, ajoqusernerup imaluunniit pisup uppernarsarnissaa piumasaqaataavoq.
Silap pissusaata allanngorneranik allatigulluunniit ajunaarnersuarmik pisoqarneranik peqquteqartumik inuussutissarsiornikkut isertitat tamakkiisut imaluunniit annertuut sivikitsumik ilimasaarneqarnikkut annaaneqarpata aningaasatigut aallarteqqinnissamut tapiissutinik tunniussisoqarsinnaavoq, assersuutigalugu makku kingunerisaanik:

• Piteraq,
• imaluunniit silaannap kiassusaata qaffannerata kingorna naatitat uumasuaqqanik nalinginnaanngitsunik imaluunniit nalinginnaasunik pissuteqartumik naanerlussimagunik,
• imaluunniit aalisartut piniartullu sikukinneq sikuallaarnerluunniit pissutigalugu aalisarsinnaanngikkunik piniarsinnaanngikkunilluunniit,
• imaluunniit piniagassat nappaateqarnerat pissutigalugu piniarneq ajornakusoornarpat imaluunniit pisinnaanngippat.

Aallaaviatigut inuk ataasiinnaq pisumit sunnertissimaguni pisoq tassaasimassanngilaq ajunaarnersuartut ittoq tassanngaannartumik pisimasoq.

Atortut assingisa aseroqqinnerannut tammaqqinnerannulluunniit siusinnerpaamik tunniussinerup kingorna ukiut pingasut qaangiunneranni aallarteqqinnissamut tapiiffigineqarnissamut qinnuteqarsinnaavutit.

Aallarteqqinnissamut tapiissutinut qinnuteqarnissamut piumasaqaatinik ukuninnga naammassinnissaatit:

• Kalaallit Nunaanni aalisarsinnaanermut atuuttumik akuersissuteqarlutit inuussutissarsiutigalugu aalisartuussaatit, inuussutissarsiutigalugu piniarnermut allagartaqarlutit inuussutissarsiutigalugu piniartuussaatit imaluunniit uppernarsaatilimmik inuussutissarsiutigalugu nunalerisuussaatit.
• Annaasaqarnerit imaluunniit pissutsit atuuttut/pisoq tunngavigalugit annaasatit sillimmasiisarfimmit matussuserneqarsinnaanngillat.
• Immikkut pisoqartillugu ukiuni kingullerni pingasuni 250.000 kr.-nik imaluunniit inorlugit isertitaqarsimanermik aammalu 100.000 kr.-nik imaluunniit inorlugit nalilinnik pigisaqarnermut uppernarsaassaatit, taamatullu tapiiffigineqalersinnaassaatit sillimmarsimanngikkuilluunniit.
• Atortunik ajoqusertoqarsimatillugu annaasoqarsimatilluguluunniit aallarteqqinnissamut tapiissutinik qinnuteqartoqassappat qinnuteqaat ajoqusiinerup annaassinerulluunniit kingorna kingusinnerpaamik qaammatisiutip ulluisa 30-t qaangiunneratigut nassiunneqassaaq.

Kommunimi inuussutissarsiornermut siunnersortimit imaluunniit KONFIFA aqqutigalugu aallarteqqinnissamut tapiiffigineqarnissamut qinnuteqarnissannut ikiortinneqarsinnaavutit. www.konfifa.gl imaluunniit email: info@aapisi.gl

Aallarteqqinnissamut tapiiffigineqarnissamut qinnuteqarniaruit immersugassiamik immersuissaatit. Qinnuteqaat Aalisarnermut Piniarnermullu Naalakkersuisoqarfimmut nassiunneqassaaq: esu@nanoq.gl

Malugiuk, atortunik ajoqusertoqarsimatillugu annaasoqarsimatilluguluunniit aallarteqqinnissamut tapiissutinik qinnuteqartoqassappat qinnuteqaat ajoqusiinerup annaassinerulluunniit kingorna kingusinnerpaamik qaammatisiutip ulluisa 30-t qaangiunneratigut nassiunneqassaaq.

Qinnuteqarnissamut immersugassaq AAJUK Aallarteqqinnissamut tapiissutinut

Aamma sumiiffigisanni sullissivimmi kiisalu Aalisarnermut Piniarnermullu Naalakkersuisoqarfimmi imaluunniit KONFIFA aqqutigalugu qinnuteqarnissamut immersugassaq pissarsiarisinnaavat.

Qinnuteqaatinnut ilanngutissavatit:

Inuussutissarsiutigalugu aalisartuunermut, inuussutissarsiutigalugu piniartuunermut imaluunniit inuussutissarsiutigalugu nunalerisuunermut uppernarsaat. Kommuninni inuussutissarsiornermut siunnersorti imaluunniit siunnersorteqarfik ilinnut tapersiissutimik allagaqarsinnaavoq.

• Ukiuni kingullerni pingasuni isertitanut takussutissat,
• Inuussutissarsiutigalugu aalisartuunermut, inuussutissarsiutigalugu piniartuunermut imaluunniit inuussutissarsiutigalugu nunalerisuunermut uppernarsaatit.
• Atortussanik tunisinermut iluarsaassinermulluunniit pilersuisumit neqeroorut,
• Tapiissutissatut qinnutigineqartut annertussusaat,
• Susoqarsimaneranik nassuiaat tassungalu uppernarsaatit, tamatumani ajoqusersimanermi annaasaqarsimanermiluunniit ulloq ilanngullugu,
• Sillimmasiisimanermut uppernarsaat imaluunniit,
• 100.000 kr.-nik taakkuluunniit inorlugit nalilinnik pigisaqarnermut uppernarsaat.

Malugiuk: Pilersitseqqinnermut tapiissutit ataasiartumik tunniunneqartarput imatut annertussusilerlugit: 2.000,00 - kr. 50.000,00

Kommunimi inuussutissarsiornermut siunnersortimit imaluunniit KONFIFA aqqutigalugu aallarteqqinnissamut tapiiffigineqarnissamut qinnuteqarnissannut ikiortinneqarsinnaavutit. www.konfifa.gl, imaluunniit email: info@aapisi.gl

Qinnuteqaatit nassiukkukku, Aalisarnermut Piniarnermullu Naalakkersuisoqarfimmit nalunaarsorneqassaaq, qinnuteqaativillu tiguneqarsimaneranik uppernarsaammik nassinneqassaatit.

• Qinnuteqaat Aalisarnermut Piniarnermullu Naalakkersuisoqarfimmit suliarineqassaaq.
• Qinnuteqaatit amigaateqarpat Aalisarnermut Piniarnermullu Naalakkersuisoqarfik attaveqarfigissavaatit. Uppernarsaatit tamarmik ilanngunneqarsimappata qinnuteqaatip suliarineqarnera aallartissinnaalissaaq.
• Ajunaarnersuartut ittumik pisoqarsimatillugu imaluunniit silap pissusaanik peqquteqartumik qinnuteqartoqarpat inatsimmi piumasaqaatit naammassineqarnersut naliliiffiginiarlugu qinnuteqaatit assingusut tamarmik ataatsikkut suliarineqassapput.
• Suliap suliarineqarnera naammasseriarpat

o Piumasaqaatinik naammassinnittunut tapiissutinik tunniussisoqassaaq
o Piumasaqaatinik naammassinninngitsunut tunngavilersuutilerlugit itigartitsissutinik nassiussisoqassaaq

Qinnuteqaat amigaateqanngikkuni nalinginnaasumik ullut suliffiusut qulit iluanni suliarineqartarpoq.
Ajunaarnersuartut ittumik pisoqarsimatillugu imaluunniit silap pissusaanik peqquteqartumik qinnuteqarnermi sullissineq sivisunerusinnaavoq, qinnuteqaatit tamarmik ataatsikkut naliliiffigineqassammata.

Qinnuteqaammi nassiussanni paasissutissanik allanngortoqarsimappat tamatuma Aalisarnermut Piniarnermullu Naalakkersuisoqarfimmut paasissutissiissutiginissaanik pisussaaffeqarputit.

Allannguutit tiguneqarpata qinnuteqaatip suliarineqarnera nanginneqarsinnaassaaq.

Aallarteqqinnissamut tapiissutinut qinnuteqaatinni paasissutissat ilumoornissaannut inissisimaninnullu eqqortumik takutitsinissaannut illit akisussaavutit.

Aallarteqqinnissamut tapiissutinut qinnuteqarnissamut killeqanngilaq, ukiup ingerlanerani sutigulluunniit qinnuteqaatit suliarineqarsinnaapput. Maluginiassavalli, atortunik atortorissaarutinilluunniit ajoqusersimaguit annaasaqarsimagaluaruilluunniit qinnuteqaatit ajoqusernerup imaluunniit annaasaqarnerup kingorna kingusinnerpaamik ullut 30-t qaangiunneranni qinnuteqaateqassagavit.

Aalisarnermut Piniarnermullu Naalakkersuisoqarfiup aalajangiinera allaffissornikkut oqartussaasunut allanut naammagittaalliuutigineqarsinnaanngilaq.