Inuussutissarsiutigalugu piniarnermut allagartaq

Inuussutissarsiutigalugu piniarnermut allagartamik pissarsiniaruit naammassisariaqakkatit makkuupput:

• Qinnuteqarnerup nalaani aqqaneq-marlunnik (12) ukioqalereersimassaatit kiisalu Kalaallit Nunaanni najugaqartutut inuit allattorsimaffianni nalunaarsorsimassallutit
• Inuit allattorsimaffiatigut ukiuni kingullerni marlunni Kalaallit Nunaanni najugaqarsimassaatit
• Ukiuni kingullerni marlunni Kalaallit Nunaanni tamakkiisumik akileraartussaatitaasimassaatit
• Aallaaviatigut ilanngaatit ilaanngaatiginagit isertitat katillugit ikinnerpaamik affai pisanit, piniarnermi aamma aalisarnermiissapput. Pisut immikkut ittuni maleruagassamit tassannga immikkut akuerineqarnissamut qinnuteqarsinnaavutit, assersuutigalugu inuussutissarsiutigalugu piniarnermut allagartamik qinnuteqarninni aatsaat siullermeerlutit ukioq siullermut qinnuteqarsimaguit. Akiliuteqarluni piniarnermit isertitat pisanit, piniarnermit aamma aalisarnermit isertitatut isigineqassapput. Ilisimatusarluni suliniutini atorfinitsitaanermit aamma takornariaqarnermit kiisalu qinikkatut sulinermit inuussutissarsiuteqarnermilu kattuffinni / peqatigiiffinni siulersuisuni sulinermit isertitat katillugit ilanngaatit ilanngaatigereernagit isertitannit naatsorsuinermi ilaatinneqassanngillat.

Isumaginninnermi suliffeqarfiit isumaginninnermi perorsaanikkut sulinerminnut pisassatut piniagassatullu periutsip atornerani inuussutissarsiutigalugu piniarnermut allagartamittaaq immikkut akuerineqarnissamut qinnuteqarsinnaapput.

Piniarnermut allagartat annaaratarsinnaavat:

• Piniarnermut inatsit ilisimaaralugu unioqqutikkukku imaluunniit arlaleriarlutit unioqqutissimagukku
• Piniarnermi akisussaassuseqanngitsumik sakkortuumik iliuuseqarsimaguit
• Piniarnermi inummik ajoqusiisimaguit

Inuussutissarsiutigalugu piniarnermut allagartaq 250 koruuninik akeqarpoq. Inuussutissarsiutigalugu piniarnermut allagartat atuutilissaaq aatsaat girokorti netbank imaluunniit allakkerivik aqqutigalugu akilerukku. Girokorti akilersimaneranut uppernarsaat A4 tassa illit piniarnermut allagartat.

Kommunit piniarnermut allagartanik tunniussisarneq, nutarterineq aamma ukiumoortumik pisanik nalunaaruteqartarneq pillugu sullissineq januaarip aallaqqaataaniit 2017-mi tiguaat. Tamanna pillugu ukiumoortumik pisanik nalunaarsuiffik Aalisarnermut, Piniarnermut Nunalerinermullu Naalakkersuisoqarfimmut nassiunneqartarunnaassaaq, taarsiullugu
illit nammineq www.sullissivik.gl aqqutigalugu imaluunniit najukkanni Sullissivimmi ikiortillutit nalunaarutigisassavatit.

Piniarnermut allagartalersuinermut tunngasut taakku marluk aqqutigalugit iserfigisinnaavatit, tassanilu aamma piniarnermut allagartat ukiup
ingerlanerani tammaassimagukku anillatseqqissinnaavat imaluunniit pdf-tut toqqorsinnaallugu. Netbank aqqutigalugu akiliisimanermiit uppernarsaatip anillatseqqinnissaa eqqaamassavat. Piniarnermut allagartamik immikkut akuerineqarnissaq pillugu qinnuteqaatit Aalisarnermut, Piniarnermut Nunalerinermullu Naalakkersuisoqarfiup suli suliarisarpai.

Piniarnermut allagartat isikkuatigut allanngornikuuvoq maannakkullu pappiaraq A4-tut angissuseqalernikuulluni, asseq takuuk. Allakkerivimmi akiliisimaguit eqqaamallugu illit atit allaqqasortaliup nassarnissaa. Tassa taanna akiliisimanermut uppernarsaat ilanngullugu piniarnermut allagartaasoq. Piniarnermut allagartat suli plastikkimik poorsinnaavat. Tamanna PINIARNEQ-mi pisarpat taakkulu Sullissivimmi tunniunneqartarlutik.

Piniarnermut allagartavit akilersimaneranut uppernarsaatitut akiliisimanermut allagartap toqqornissaa eqqaamassavat. Allagartap nittartakkatigut aningaaserivimmut akilernissaa pitsaasuusarpoq, taamaalillutit tassanngaanniit allagartaq anisittuaannarsinnaagakku.

Toqqaannartumik attaveqaatitigut qinnuteqarfik
Inuussutissarsiutigalugu piniarnermut allagartaq uani aajuk

Uani piniarnermut allagartat nutarsarsinnaavat imaluunniit siullermeeruit piniarnermut allagartamik qinnuteqarsinnaavutit. Imminut sullinneq atorlugu allagartartaarniaruit NemID-mik peqassaatit.

• Ukiup piniarfiusup kingullermit piniarfiusup siulianit pisavit nalunaarutigineratigut inuussutissarsiutigalugu piniarnermut allagartat nutarsarsinnaavat piniarfiusumullu tullianut inuussutissarsiutigalugu piniarnermut allagartat nutarsarlugu

• Inuussutissarsiutigalugu piniarnermut allagartaqanngikkuit imaluunniit allagartat piniarfiusumi kingullermut atuussimappat imaluunniit taassuma siulianut atuussimappat inuussutissarsiutigalugu piniarnermut allagartamik qinnuteqarsinnaavutit
  
  

Piumasaqaatit tamaasa naammassigukkit angerlarsimaffinni piniarnermut allagartassat ingerlaannaq naqitanngorlugu anillatsissinnaavat.

Taakku marluk sullissivik.gl-ikkut toqqaannartumik imminut sullinnikkut suliarineqarsinnaapput imaluunniit najukkami innuttaasunut sullissivimmut imaluunniit nunaqarfimmi kommunip allaffianut saaffiginnissuteqarnikkut suliarineqarsinnaallutik.

Malugiuk
Maluginiassavat ukiumut immersuiffik nassiutinngikkukku, piniarnermut allagartat nutarsarsinnaannginnakku. Piniarnermut allagartat siuliani atuutilersimasoq akilersimanngikkukku, aamma tamatuma akilernissaa pisariaqarpoq, Aalisarnermut, Piniarnermut Nunalerinermullu Naalakkersuisoqarfimmiillu attavigineqassaatit.

NemID-mik atuisunut
Sullissivik.gl-ikkut toqqaannartumik imminut sullinniaruit, NemID atortariaqarpat. NemID atorsinnaasat netbankimut atortakkavit assigivaa.

Paasisaqarnerugit NemID-millu inniminniillutit

NemID-mik atuisuunngitsunut
NemID-mik atuisuunngikkuit, illit inuussutissarsiutigalugu piniartutut erngertumik piniarnermut allagartamik tunineqassaatit, piumasaqaatinik naammassinnikkuit, kommunip innuttaasunut sullissivianut, inuussutissarsiornikkut siunnersortimut imaluunniit nunaqarfimmi kommunip allaffianut saaffiginninnikkut.

Tamanna atuuppoq ukiumut immersuiffik atorlugu piniarnermut allagartat nutarterniarukku imaluunniit siullermeertumik qinnuteqartuuguit.

Ukiup piniarfiusup kingullermit piniarfiusup siulianit pisavit nalunaarutigineratigut inuussutissarsiutigalugu piniarnermut allagartat kommunip nutarsarsinnaavaa, piniarfiusumullu tullianut inuussutissarsiutigalugu piniarnermut allagartat nutarsarlugu.

Piumasaqaatit tamaasa naammassigukkit kommunip ingerlaannaq piniarnermut allagartaq tunniutissavaa.

Maluginiassavat ukiumut immersuiffik angerlarsimaffinni imaluunniit kommunimi immersunngikkukku, piniarnermut allagartat nutarsarsinnaanngilat. Piniarnermut allagartat siuliani atuutilersimasoq akilersimanngikkukku, aamma tamatuma akilernissaa pisariaqarpoq, APNN-imiillu attavigineqassaatit.

Piumasaqaat piumasaqaatilluunniit arlallit naammassinngikkukkit, erngertumik ilisimatinneqassaatit.

Immikkut ittumik akuerineqarnissamut qinnuteqarnermi immersugassaq naqitanngorlugu anillatsissinnaavat immersoriarlugulu kommunimut tunniullugu, kommunip immikkut akuerineqarnissamik qinnuteqaat Aalisarnermut, Piniarnermut Nunalerinermullu Naalakkersuisoqarfimmut suliassanngorlugu nassiutissavaa. Erseqqissassallugu pingaaruteqarpoq immikkut ittumik akuerineqarnissamik qinnuteqaat tunngavilersuutinik aamma qinnuteqaammut tapersiisunik allakkanik uppernarsaatinik attuumassutilinnit imaqarnissaa.

Allakkat uppernarsaatit attuumassutillit ukuusinnaapput:

• Siusinnerusukkut inuussutissarsiutigalugu piniarnermut allagartaqarnikuuit taamalu piumasaqaatit naammassillugit
• Isertitaqarnermut piumasaqaatit naammassisinnaajumallugit isertitanik akileraarutaasussanik uppernarsaanissamut imaluunniit aningaasaqarniarnivit pitsanngoriarsimanerata uppernarsarnissaanut siunissami periarfissaqarpit
• Suna tunngavigalugu isertitatigut piumasaqaatit naammassisimannginneritit, soorlu napparsimasimaneq, nunami suliffeqarneq, nunani allaniissimaneq, pikkorissarneq assigisaallu peqqutigalugit inuussutissarsiut ingerlassimannginnerit
• Piniutinik pisariaqartunik atugaqarsinnaaneq imaluunniit pigisaqarneq
• Aalisartutut/piniartutut misilittagaqarneq, imaluunniit inuussutissarsiummut ilinniartinneqarnissamut periarfissaqarneq

Inuussutissarsiutigalugu piniarnermut allagartamut qinnuteqarnissamut immersuiffissaq

Aamma immersuiffissaq najukkanni innuttaasunut sullissivimmi imaluunniit nunaqarfimmi kommunip allaffiani pissarsiarisinnaavat.

Piumasaqaatinut immikkut ittumik nittartakkatigut sullissivik.gl aqqutigalugu nammineerlutit Aalisarnermut, Piniarnermut Nunalerinermullu Naalakkersuisoqarfimmut qinnuteqarsinnaanngilatit. Immikkut akuerineqarnissamut qinnuteqaateqarniaruit, najugarisanni kommunimut saaffiginnissaatit, periusissarlu qulaani taaneqartoq malinneqassaaq.

Ukiumi pineqartumi 15. oktober sioqqullugu pisavit nalunaarutiginissaanut pisussaaffeqarputit.

Tassa imaappoq, ukioq kingulleq 1. oktober ukioq mannalu 30. september akornanni pisarisimasatit, ukioq manna 1. oktober aallarnerfigalugu kingusinnerpaamillu 15. oktober nalunaarutiginissaanut pisussaaffeqarputit.

Periutsit marluupput:
• NemID-mik atuisunut: Toqqaannartumik sullissivik.gl aqqutigalugu
• NemID-imik atuisuunngitsunut: Kommunimi innuttaasunut sullissivimmut, inuussutissarsiutinut siunnersortimut imaluunniit nunaqarfimmi kommunip allaffianut ukiumoortumik immersugassaq immersorsimasoq nassarlugu ornigunnikkut, taamaasilluni kommunip qarasaasiatigut sullissiviatigut immiunneqarsinnaaniassammat

Paasissutissatut quppersagaq "Piniarneq" aamma inuussutissarsiutigalugu piniartunut Ukiumoortumik immersuiffissaq uani aasinnaavatit:

2019-imut
Paasissutissatut quppersagaq “Piniarneq 2019”

Inuussutissarsiutigalugu piniartunut Ukiumoortumik immersuiffissaq

2020-imut
Paasissutissatut quppersagaq “Piniarneq 2020”

Inuussutissarsiutigalugu piniartunut Ukiumoortumik immersuiffissaq

2021-imut
Paasissutissatut quppersagaq “Piniarneq 2021”

2022-imut
Paasissutissatut quppersagaq “Piniarneq 2022”

2023-imut
Paasissutissatut quppersagaq “Piniarneq 2023”

Inuussutissarsiutigalugu piniarnermut allagartamik pissarsinissamut piumasaqaatit naammassigukkit, girokorti aamma paasissutissatut quppersagaq “Piniarneq” ilinnut nassiunneqassapput. Quppersakkamiipput piniarnermi piffissat piniarfiusut aammalu Namminersorlutik Oqartussanit paasissutissat, aammalu pisat nalunaarutiginissaanut ukiumut immersuiffissaq.

Inuussutissarsiutigalugu piniarnermut allagartat sunngiffimmi piniarnermut allagartanngortissinnaavat toqqaannartumik sullissivik.gl-ikkut imaluunniit kommunimut saaffiginninnikkut. Sunngiffimmi piniarnermut allagartamut allanngortinniarlugu:

• Pisatit toqqagassat Inuussutissarsiutigalugu piniarnermut allagartatigut aamma Pisat aqqutigalugit nalunaarutigineratigut nalunaarutigissavatit. Malugiuk, inuussutissarsiutigalugu piniarnermut allagartavit nutarsarnissaa pisariaqanngimmat

• Tamatuma kingorna imminut sullinnikkut toqqagassaq Sunngiffimmi piniarnermut allagartaq aqqutigalugu sunngiffimmi piniarnermut allagartamik nutaamik qinnuteqassaatit imaluunniit kommunimut saaffiginninnikkut
  
  

Ukiumi piniarfiusup ingerlanerani inuussutissarsiutigalugu piniarnermut allagartap sunngiffimmi piniarnermut allagartamut paarlaanniarukku, kommunip allaffianut nunaqarfimmiluunniit aqutsisut allaffianut saaffiginnissaatit. Allanngortitsineq toqqaannartumik attaveqaatitigut nammineq sullinnikkut isumagineqarsinnaanngilaq.

Imminut sullinniaruit una tuussavat

Ukioq kaajallallugu inuussutissarsiutigalugu piniarnermut allagartamik qinnuteqarsinnaavat. Taamaattorli maluginiassavat:

• Aasaanerani umimmanniarnissamut tuttunniarnissamullu piniarniaruit, piumasaqaammut immikkut akuersissuteqartoqanngippat, inuussutissarsiutigalugu piniarnermut allagartat 2. maj nallertinnagu akilereersimassagakku
• Ukiumut piniarfiusoq aallartittartoq ulloq 1. oktober, taavalu ulloq tassanngaanniit inuussutissarsiutigalugu piniarnermut allagartat atuutilissaaq
• Pisatit 15. oktober sioqqullugu nalunaarutigissagakkit. Pisatit nalunaarsorneqareerpata, ukiumut piniarfiusumut tullermut atuuttussamik inuussutissarsiutigalugu piniarnermut allagartamik namminerisamik pappialanngorlugu anillatsitsisinnaavutit imaluunniit kommunimi allagartaq anillatsissinnaavat. Pisatit nalunaarutigisimanngikkukkit piniarnermut allagartat nutarterneqarsinnaanngilaq

Inuussutissarsiutigalugu piniarnermut allagartamik qinnuteqarsimaguit itigartitaallutillu, immikkut akuerineqarnissamik qinnuteqarsinnaavutit imaluunniit naammagittaalliuutiginissaanut periarfissaqarputit. Naammagittaalliuteqarsinnaavutit isumaqaruit eqqunngitsumik tunngaveqarluni itigartitsisoqarsimasoq, aammalu qinnuteqaatit pillugu nutaanik paasissutissanik saqqummertoqarsimappat.

Itigartitsissutigineqartoq naammagittaalliutiginiarukku, ukiup piniarfiusup naannginnerani taamaasiussaatit. Suliaq ilinnut tunngasoq pillugu, najukkanni KNAPP-mi aalisarnermut piniarnermut peqatigiiffimmit oqaaseqaammik pinissannut periarfissaqaruit, naammagittaalliutip nassiunnerani ilanngullugu nassiutissavat. Naammagittaalliuut uunga nassiutissavat:

Aalisarnermut, Piniarnermut Nunalerinermullu Naalakkersuisoqarfik
Att. Piniarnermut aallaaniarnermullu immikkoortortaqarfik
Postboks 269
3900 Nuuk
Fax: (+299) 34 53 40
E-mail: jagtbeviser@nanoq.gl

Naalakkersuisoqarfik suli apeqqutissaqassappat atassuteqarfigineqassaatit. Naammagittaalliuutit suliarineqareerpat akissutisissaatit.

Naalakkersuisoqarfiup aalajangiinera naammaginngikkukku, suliassaq Ombudsmandimut imaluunniit eqqartuussivinnut saqqummiussinnaavat.