Kalaallit Nunaanni piniakkat aallaaviatigut suli pinngortitami pissuseqatigiinnermik taaneqarsinnaasunik atugassaqarlutik uumasuupput.
Tamanna atuisunit iluaqutigineqaannartariaqarpoq. Isumaqartoqassanngilarli qangalili piniariaatsit imaluunniit neqinik pisarnertut passussisarneq ullumikkut atuisut eqqiluisaarnissamik neqillu pitsaassusissaannik piumasaqaataannut naleqquttuusut. Taamatuttaaq inuussutissat pinngortitami uumasuneersut tunillannartukinnerusinnaasut imaluunniit inuussutissanit pinngortitameersuunngitsunit taamaattunit asiujaannerusartut.
Piniartup assammini ikiinit naarlunneranilluunniit nappaatit inuussutissat aqqutigalugit pisisartunut tunillaassinnaapput.
- Iluaqutaasinnaavoq: Naarlukkuit pisatit allamut pilatsikkukkit.
- Assakkut kilerneqaraanni pisat passunneranni eqqiluitsunik aaqqateqartoqassaaq.

Uumasut qasoqqasut annikilliortitaasullu aaviarneqarluanngitsullu neqaat pitsaasuusanngillat.
- Iluaqutaasinnaavoq: Nersutit ataasiakkaat sivisuallaamik piniarsaarinaveersaarukkit.
- Pisatit aaviarluakkit qungasianni taqarsuit marluusut tamaasa kipillugit.
Naavisigut inalugaasigulluunniit aallaanerlioraanni neqaat mingutsitaasarpoq.
- Iluaqutaasinnaavoq: Uumasoq akuaatigut aallaanngikkukku.
Assaat ameersinermullu, saliinermut nagguarsiuinermullu atortut ipertuut neqi mingutsittarpaat.
- Iluaqutaasinnaavoq: Pisat passunneqalersinnagit assatit, savitit atortutillu allat imermik kissartumik qaqorsaatilimmik errorukkit.
- Assaat asanneqartariaqarput ameersereeraanni saliilersinnanilu taamatullu saleereernermi nagguarsiuilinnginnermilu.
Nunamit pisallu amianit avatangiisinilluunniit mingutsitsinerup, pingaartumik siallersumi, neqi bakteriaqalersissavaa.
- Iluaqutaasinnaavoq: Pisap passunneqarnerani nivinngaavik tingerlaatissiarluunniit akuerisaasoq eqqiarneqarsimasut atorukkit.
- Aaqqissuussamik suleriaaseqalerit taamaalilluni mingunnartulerineq (ameersineq, erlaveersineq, niaquiineq isigaarsinerlu) naammassineqassammata mingoqanngitsumik sulineq (nagguarsiuineq) pilersinnagu.
- Mingunnartulerinerup mingunnanngitsulerinerullu akornanni assatit saviillu asakkit.
Erlaveersinerlioraanni neqi bakteriaqalersinneqarsinnaavoq.
- Iluaqutaasinnaavoq: Aqajaata ammarnerani erlaveerneranilu peqqissaarussiguit.
- Erlaviisa imaannik assatit atortullu mingutsinneqarsimappata asakkit.
Neqi imermik errortoraanni bakteriat errortorneqartumut tamarmut siaruaassinnaapput.
- Iluaqutaasinnaavoq: Neqi imermik errortorneqanngisaannarpat.
- Taarsiullugu neqi mingutsinneqartoq peerneqassaaq iginneqassallunilu.
Kingusinaartumik erlaveersigaanni assersuutigalugu inalukkap bakteriai neqimut akulerussinnaapput.
- Iluaqutaasinnaavoq: Pisaqarnerpit kingornatigut sivisunerpaamik minutsit 60-it qaangiunneranni erlaveersisaruit.
Neqip pissusissamisuunngitsumik suliarineqarnera assartorneqarneralu neqip bakterianitsinneqarneranik kinguneqarsinnaapput.
- Iluaqutaasinnaavoq: Pisap neqaa peqqissaarukkukku. Neqit stocking netinut eqqiluitsunut poortukkit karsillu/baaliallu plastikkit eqqiluitsut assartuinermi atukkit.
Atuisut naatsorsuutigisarpaat inuussutissat pisiniarfinni pisiarineqartut nerissallugit isumannaatsuusut inunnullu inuussutigissallugu naleqquttuullutik. Nappaatit inuussutissaneersut inuiaqatigiit aningaasaqarnerat eqqarsaatigalugu arlalinnik sunniuteqartarput ajunngikkaangat peqqiilliornarsinnaallutik ajornerpaagaangalli toqussutaasinnaallutik. Nappaatit inuussutissaneersut sulisinnaassutsimik isertitarisartakkanillu annikillisitsisinnaapput taamaammallu inuiaqatigiinnut sunniuteqartussaallutik.
Inuussutissat asiusimasut nappaatillu inuussutissaneersut inuussutissanik niuernermut, takornariaqarnermut taamatullu atuisut inuussutissat isumannaatsuunissaannik tatiginninnerannut ajoquseerujussuarsinnaapput.
