Qitornavissiartaarneq

Qitornavissiartaarnermi meeraq nammineq meerarisatut inatsisitigut tiguneqartarpoq.

Tamanna ilaatigut imatut isumaqartarpoq:
• Meeraq kingornussisussanngortarpoq qitornavissiartaartunillu kingornunneqartarluni tunngaviatigullu angajoqqaajusut kingornussisussaajunnaarlutik
• Angajoqqaajusut meeqqap pilersornissaa pisussaaffigiunnaartarpaat. Akerlianilli qitornavissiartaartut meeqqap pilersornissaa pisussaaffigilertarlugu
• Qitornavissiartaartut meeqqamut angajoqqaatut oqartussaassuseqalersarput
• Qitornavissiartaartut kinguliaqutaat kinguliaqutigilissallugu meeraq pisinnaatitaaffeqalersarpoq

Qitornavissiartaarnermi periutsit assigiinngitsut pingasuupput:

• Qitornassamik qitornavissiartaarnermi qinnuteqaateqartup massakkut siusinnerusukkulluunniit aapparisami (imaluunniit nalunaarsukkatut aapparisami) qitornaa qitornavissiaaluunniit qitornavissiartaarisarpaa
• Ilaquttamik qitornavissiartaarnermi qinnuteqaateqartoq meerarlu ilaqutariittut attuumassuteqavissuusarput. Pisarnertut qinnuteqaateqartup meeraq ernutarissavaa, qatanngutigalugu imaluunniit soraluaralugu (nukappiara/niviarsiararluunniit). Aamma tunngaviatigut ilaquttamik qitornavissiartaartoqartarpoq meerarsiaq ukiuni pingasuni paarisimasaq qitornavissiartaariumallugu qinnuteqaateqartoqarpat
• Ilisarisimanngisamik qitornavissiartaarnermi meeraq qinnuteqaateqartorlu ilaqutariittut attuumassuteqavissuussanngillat

Aamma inersimasut qitornavissiartaarineqarsinnaapput.

Qinnuteqaateqannginnermi qitornavissiartaarnissamut periuseq sorleq piumanerlugu misissoqqissaarnissaa pingaaruteqarpoq.

Qitornavissiartaarnissamut periutsit assigiinngitsut Naalagaaffiup Sinniisoqarfiata nittartagaani atuarneqarsinnaapput

Qitornavissiartaarnissamut akuerineqassagaanni piumasaqaatit arlariiupput.

Piumasaqaatit Naalagaaffiup Sinniisoqarfiata nittartagaani takukkit.

Qitornavissiartaarnissamik qinnuteqassaguit qinnuteqaatitut immersuiffissaq immersussavat. Qitornavissiartaarnissamut periuseq sorleq pineqarnersoq apeqqutaatillugu qinnuteqaatitut immersuiffissaqarpoq.

Ilaquttamik qitornavissiartaarnissamik qinnuteqaat

Qitornavissiartaartussatut akueritinnissamik qinnuteqaat

Qitornassamik qitornavissiartaarnissamut qinnuteqaat

Aamma immersuiffissat Kalaallit Nunaanni Naalagaaffiup Sinniisoqarfianut aaneqarsinnaapput imaluunniit Nuummiinngikkaanni politiinut aaneqarsinnaallutik.

Uppernarsaatit pisariallit tamaasa qinnuteqaammut ilanngunneqassapput. Uppernarsaatit sorliit ilanngunneqassanersut immersuiffissami allassimapput. Uppernarsaatit eqqortut tamaasa ilanngussimanngikkukkit suliaq ilinnut tunngasoq Naalagaaffiup Sinniisoqarfiata suliarisinnaanngilaa.

Qinnuteqaat uppernarsaatillu pisariallit Kalaallit Nunaanni Naalagaaffiup Sinniisoqarfianut imaluunniit Nuummiinngikkuit politiinut nassiutissavatit tunniukkiartorlugilluunniit.

Qitornavissiartaarnissamik suliap ilinnut tunngasup suliarineqarnera sivisoorujussuusinnaanera malugeqquarput. Pingaartumik ataatassarsiuinermi apeqqutip paasineqarnissaa kommuniniillu paasissutissanik pissarsiniarneq suliamik suliarinninnermut sivitsorsaataasinnaavoq.

Qitornavissiartaarnissamut periutsip qanoq ittuunera apeqqutaalluni Kalaallit Nunaanni Naalagaaffiup Sinniisoqarfianit suliaq ilinnut tunngasoq suliarissavaa.

Naalagaaffiup Sinniisoqarfiata sulianik suliarinnittarnera pillugu Naalagaaffiup Sinniisoqarfiata nittartagaani annertunerusumik paasisaqarsinnaavutit

Qinnuteqaatit akuersissutigineqassappat qitornavissiartaarneq pillugu akuersissummik tunineqassaatit tamatumalu kingorna qitornavissiartaarisaq illit qitornavigisattut inatsisitigut inissisimalissaaq.

Qitornavissiartaarneq pillugu inatsisip allanngortinnissaa pillugu inatsisip aamma inatsisit assigiinngitsut allat Kalaallit Nunaannut atuutilersinneqarnissaanut peqqussut

Kalaallit Nunaanni qitornavissiartaartarneq pillugu nalunaarut

Kalaallit Nunaanni qitornavissiartaartussat akuersissutigineqartarnerat pillugu nalunaarut