Meeqqamik ernumagisaqarneq aallaavigalugu isumaginnittoqarfiup pigaartuanut attaveqarneq

Isumaginnittoqarfiup pigaartuata innuttaasunik meeraq imaluunniit inuusuttoq pillugu ernummateqarluni saaffiginnissutit suliassarai.

Isumaginnittoqarfiup pigaartuata makkua qulakkeertussaavai:

• Meeraq/inuusuttoq ajunnginnersoq
• Meeraq/inuusuttoq toqqissisimanartunik avatangiiseqarnersoq
• Meeraq/ inuusuttoq kisimiinnginnersoq
• Meeraq/ inuusuttoq persuttartissimannginnersoq
• Meeraq/ inuusuttoq kinguaassiuummigut atornerlunneqarsimannginnersoq

Meeraq imaluunniit inuusuttoq pillugu tassanngaannaq pasitsaasaqaruit imaluunniit ernummateqaleruit isumaginnittoqarfiup pigaartua attavigissavat.

Kommunit tamarmik isumaginnittoqarfiisa pigaartui ernummateqarnermi attavigineqarsinnaasunik oqarasuaateqartinneqartarput.
Kommunip ammasarfiisa avataatigut isumaginnittoqarfiup pigaartuanut attaveqarsinnaavutit.

Illit kommunerisanni najukkavit oqarasuaatai attavigineqarsinnaasut toorlugit takukkit

Ernummatigineqartoq pinartuussaaq. Tassa imaappoq; meeqqamik inuusuttumilluunniit sumiginnarneqartumik takusaqaruit, tusaasaqaruit imaluunniit pasitsaassaqaruit.
Pinartumik ernumaleriasaarneq qanoq paasisariaqarpa?
Pinartumik ernummateqalernerit makkuusinnaapput:

Meeraq inuusuttorluunniit paarineqarnerluttoq imaluunniit paarineqarnerlussimasoq.

• Paarsinerlunneq tassaavoq: Paarsinissamik paaqqutarinninninnissamillu pisussaaffiup sumiginnangaatsiarneri.
  Paarsinerlunnerup nalinginnaasumik ersiutai makkuupput; meeraq nerisassaqanngitsoq, ipertusoq, eqqiluisaanngitsoq, kigutiluttoq aamma ukiup qanorilineranut naleqqutiginngitsunik atisaqartoq, soorlu ukiukkut oqorsaateqanngitsoq.
• Persuttaanerit aamma siorasaarneqarnerit: Inuit arlaata meeraq imaluunniit inuusuttoq timaatigut persuttarsimagaa. Persuttartinnermut aamma siorasaartinnermut ilisarnaatit kimillannerusinnaapput aamma tungujornerusinnaapput, avatit nallugasinnaapput aamma taakkua pillugit naapertuutinngitsumik nassuiaanerusinnaapput.
  Aamma timikkut ersiuteqanngitsuusinnaapput meeraq qanilliumanngitsoq, inersimasunit meeqqanillu allanit tunuartertarluni imaluunniit aallaamanermut qanittuulluni, inuinnik allanik persuttaasartoq aamma sakkortuumik pissusilersortartoq.
• Kinguaassiuutitigut atornerluineq: Inersimasoq iliuuseqarluni, meeraq alla imaluunniit inuusuttoq atoqatigiinnermi meeqqamik peqataatitsilluni atornerluisoq.
  Imaluunniit meeraq timaatigut, atisaqartoq imaluunniit atisaqanngitsoq, attuualaarinninnerusinnaavoq.
  Imaluunniit utsukkut, itikkut imaluunniit qanikkut atoqatiginiarneqarneq imaluunniit atoqateqarneq.
  Imaluunniit timikkut attuualaarinnani aamma kinguaassiuutinik atornerluisoqarsinnaavoq, soorlu meeraq inuusuttorluunniit atoqateqassasoq kajungissaarinninnerusinnaavoq, atoqatigiittunik aalasulianik isiginnaaqatigiinnerusinnaavoq, kannguttaatsuliortup pisariaqartitaanik sunniiniarnermi assilisinnerusinnaavoq imaluunniit aalasuliarineqarluni. Aamma kinguaassiuutinik atornerluineq ima pisinnaavoq; meeraq inuusuttorluunniit inuusuttumik imaluunniit inersimasumik tissarsartumik imminulluunniit atoqatiginninniarpalaartutut pissusilersortumik isiginnaartitsineq.