Utoqqarnut inissiat aamma innarluutilinnut inissiat tassaapput, inunnut tamanut timikkut piginnaanikillisimasunut inuup timikkut piginnaasaanut naleqqussakkamik inissiamik pisariaqartitsisunut inissiat. Utoqqarnut inissianut aamma innarluutilinnut inissianut sulisunik attuumassuteqartoqarneq ajorpoq. Taamaammat annertunerusumik ikiorneqarnissamik piariaqartitsinermi angerlarsimaffimmi ikiorti imaluunniit immikkoortortaqarfik assingusoq kommunimit pigineqartoq attavigineqarsinnaavoq.
Qinnuteqarneq
Utoqqarnut inissiamik imaluunniit innarluutilinnut inissiamik qinnuteqarniaruit, angerlarsimaffimmi ikiorti imaluunniit kommunimi sulianik suliarinnittartoq peqatigalugu kommunip utoqqarnut immikkoortortaqarfiani qinnuteqarnermut immersuiffissaq immersorsinnaavat. Qinnuteqarnermi immersuiffissaq kommunimi pissarsiarisinnaavat.
Qinnuteqarnermi immersuiffissamut ilanngussatut ilanngutissavatit:
- Peqqissutsimut aamma nakorsamiit paasissutissat
- Atortut ikiorsiissutaasartut atortarnerannut uppernarsaat
Qinnuteqarnermi immersugassaq ilanngussassanik ilaqartoq kommunimi illit sulianik suliarinnittartunnut tunniutissavat.
Nalilersuineq
Qinnuteqaatit kommunip tigoriaruniuk, nalilersuinermut ataatsimiititaliap illit nammineq angerlarsimaffinniiginnarsinnaanersutit nalilersussavaa. Ikiorsiissutinik allanik pissarsinikkut, assersuutigalugu inissiap allanngortiternissaanut ikiorsiineq, atortut ikiorsiissutit, angerlarsimaffimmi ikiorti imaluunniit ulluunerani paaqqutarineqarnissamik neqeroorut, imminut isumagisinnaanersutit ilaatigut nalilersuinermut ataatsimiititaliamit pingaartinneqassaaq.
Utaqqisut allattorsimaffiat
Utoqqaat ataatsimoorlutik najugaqarfiinut, utoqqaat angerlarsimaffiinut aamma paaqqutarineqarluni angerlarsimaffinnut utaqqisut allattorsimaffii pigineqarsinnaasarput. Tamatuma kingunerisaanik inissamik erngersumik tunineqarnissat naatsorsuutigisinnaanngilat, naak nalilersuinermut ataatsimiititaliap inissamik innersuussimagaluaraatit. Inissaqanngippat utaqqisut allattorsimaffiannut allanneqassaatit. Utaqqisut allattorsimaffianni inissisimanerit tikkuussisuuginnassaaq, tassa utoqqaat angerlarsimaffianni imaluunniit paaqqutarineqarluni angerlarsimaffimmi inissaq pisariaqartitsinerpaamut neqeroorutigineqartarmat.
Inissiamik utaqqinivit nalaani ikiorsiissutinik allanik neqeroorfigineqassaatit, illit ulluinnarisanni pitsaanerusunik atugaqarsinnaaniassagavit.