Atinik allannguineq

Aqqit immikkoortinneqartarput imatut: siuliaqtutit, ateq taaguutaanngitsoq, kinguliaqut. Siuliaquteqarlutillu aternik taaguutaanngitsunik arlalinnik ateqarsinnaavutit, kisianni ataasiinnarmik kinguliaqarsinnaavutit.

Kalaallit Nunaanni najugaqaruit atillu allanngortikkusullugu, taava najugaqarfinni palasip allaffianut saaffiginnissaatit imalt. Naalagaaffiup Sinniisoqarfianut (Rigsombudet).

Danmarkimi najugaqaruit, inuit allattorsimaffiannik atuagarsuarnik isumaginnittumut (palasimut ikiortaanulluunniit (kordegnimut)) najugaqarfinni palaseqarfimmut saaffiginnissaatit. Qinnuteqaat nammineq aamma immersoriarlugu borger.dk aqqutigalugu nassiussinnaavat.

 

Kalaallit Nunaanni inunngorsimaguit sulilu tassani najugaqarlutit
Siuliaqutit allanngortinniarukku, peerniarukku ilaniarukkuluunniit illoqarfigisanni palasip allaffianut saaffiginnissaatit.

Kalaallit Nunaanni inunngorsimanngikkuit
Siuliaqutit allanngortinniarukku, peerniarukku ilaniarukkuluunniit Kalaallit Nunaanni Naalagaaffiup Sinniisoqarfianut saaffiginnissaatit.

Kalaallit Nunaanni inunngorsimaguit sulilu tassani najugaqarlutit
Ateq taaguutaanngitsoq peerniarukku angajoqqaavilluunniit atiisa ilaat taaguutaanngitsoq kinguliaaluunniit atitut taaguutaanngitsutut atertaariniarukku, taava najugarisanni palaseqarfimmut saaffiginnissaatit.

Kalaallit Nunaanni inunngorsimanngikkuit
Siuliaqutit allanngortinniarukku, peerniarukku ilaniarukkuluunniit Kalaallit Nunaanni Naalagaaffiup Sinniisoqarfianut saaffiginnissaatit.

 

Kalaallit Nunaanni inunngorsimaguit sulilu tassani najugaqarlutit
Kinguliaqutit angajoqqaavit angajoqqaarsiavilluunniit kinguliaqutaattut allanngortinniarukku, siusinnerusukkulluunniit kinguliarisimasat, taava najugarisanni palaseqarfimmut saaffiginnissaatit.

Kinguliaqut aanakkuit/aatakkuit iml. aanaqqiikkuit/aataqqiikkuit kinguliaqutigisimasaat atertaarerusukkukku Kalaallit Nunaanni Naalagaaffiup Sinniisoqarfianut saaffiginnissaatit.

Kalaallit Nunaanni inunngorsimanngikkuit
Kinguliaqutit allanngortikkusukkukku, taava Kalaallit Nunaanni Naalagaaffiup Sinniisoqarfianut saaffiginnissaatit.

 

Kalaallit Nunaanni katissimaguit
Aappartaarpit kinguliaqutaa kinguliaqutigerusukkukku assigiimmit kinguliaquteqalerniarlusi, taava pisortanut katinnissinnik isumaginnissimasunut saaffiginnissaatit. Tamanna aamma atuuppoq aapparisavit kinguliaqutaa peerusukkukku namminerlu kinguliaqutigisimasat atoqqilerusukkukku.

Illit aapparisallu kinguliaqutisi tapertariisillugit kinguliaqutitaarerusukkussigit, kittoraateeqqamik akunnilerlugit atorsinnaavasi. Tamanna kissaatigigussiuk taava Kalaallit Nunaanni Naalagaaffiup Sinniisoqarfianut saaffiginnissaatit.

Aapparisap akunnequtaa pigilerneqarsinnaanngilaq, akunnequtitut imaluunniit kinguliaqutitut - aammattaaq aapparisap kinguliaqutaa akunnequtitut pigilerneqarsinnaanngilaq.

Kalaallit Nunaata avataani katissimaguit
Aappartaarpit kinguliaa kinguliaqutigilerusukkukku assigiimmik kinguliaquteqalerlusi, iml. aapparisallu kinguliaqutisi kittoraateeqqamik akunnilerlugit kinguliaqutitaarerusukkussigit taava Kalaallit Nunaanni Naalagaaffiup Sinniisoqarfianut saaffiginnissaatit.

 

Najugarisanni palaseqarfimmut atit allanngortinniarlugu saaffiginnikkuit, taava inunngornermut kuisinnermulluunniit allagartaq iml. inunngornermut atermulluunniit allagartaq originaleq nassassavatit. Taava immersugassamik immersugassannik tunineqassaatit.

Kalaallit Nunaanni Naalagaaffiup Sinniisoqarfia aqqutigalugu atermik allanngortitsiniarlutit qinnuteqarniaruit immersugassamik immersuissaatit.

Atermik allannguinissamut immersuiffissaq

Uppernarsaatinik inniminniineq imaluunniit atermik allannguinissamik qinnuteqaat

 

Ilitsersuummi matumani eqqartorneqarpoq innuttaasutut 2019-imi januaarip aallaqqaataata kingorna ilagiinnut uppernarsaammik nutaamik atermilluunniit allannguiniaruit uppernarsaatissamik nutaamik piumagaangavit qanoq iliussanersutit. Ilitsersuut manna ilagiinni atorneqartartumut FORMULAR 3-A-mut (Uppernarsaatinik inniminniineq atermilluunniit allannguiniarluni qinnuteqaammut) tapiliussaavoq, uumalu kinguneraa: Atuagarsuarni allattuisarneq aamma atinik allannguinermi uppernarsaatillu ilaasa tunniunnerini akiliuteqartarneq pillugit Namminersorlutik Oqartussat nalunaarutaat nr. 17, 14. september 2015-imeersoq.
Suleriaasissaq nutaaq atuutilissaaq januaarip aallaqqaataani 2019-imi, imatullu isikkoqarpoq:


Inniminniilluni immersugassap aallaqqaataasumik pinngitsooranilu immersornissaa
Pisarnertut najugarisanni palaseqarfimmut ajoqimulluunniit suli saaffiginnittassaatit. Tassani
qinnuteqaatitut immersugassiaq pisortatigoortoq (FORMULAR 3-A) immersussavat. Uppernarsaatit arlallit nutarteqqikkusukkukkit, uppernarsaatit nutartertinniakkat tamaasa immikkut qinnuteqaammut immersugassiamut immersussavatit. Pisortatigoortumik immersugassiamut tassunga suna kissaatiginerlugu krydsilersinnaavat (x):
• Immikkoortoq 1-4-miipput uppernarsaatissat nutartigassat aalajangersimasut sisamat (kalaallisut allassimasut)
• Immikkoortoq 5 aamma 5b-c atermik allannguinissamik kissaateqarnermut attuumassuteqarput
(Immik. 5b aamma 5c imarai katinnermut atatillugu kinguliartaarnerup, nammineq kinguliarisap katinnermi atoqqinnissaanut angajoqqaarsiaasullu kinguliaanik kinguliartaarnissamik akiliinissamut pisussaaffiup avaqqutiinnarneqarsinnaaneranut tunngassuteqarpoq)
• Immik. 6-8-mi pineqarput uppernarsaatit aalajangersimasut tuluttut allassimasussat

FORMULAR 3-A-mi uppernarsaatit taaguutaasa suussusii immikkoortuni ataasiakkaani allaqqapput.
Ilagiinnit Kalaallinit uppernarsaammik piumaguit atilluunniit allanngortinniarukku, tamatigut FORMULAR 3- A immersortassavat, tamanna aamma atuuppoq immikkoortup 5b-c-p iluani ilaanngitsutut nalunaarfissat marlussuit arlaannulluunniit nalunaarsimagaluaruit.

Atermik allannguiniarluni immersuivissap immersornerata saniatigut immersuisarnissaq
Nr. 1-ip ataani qinnuteqaatit atermik allannguiniarnermik imaqarpat, taava atermik allannguiniarluni immersugassaq nalinginnaasoq qaavatigut suli immersussavat (FORMULAR 2 imalt. FORMULAR 3, atermik allannguiniarlutit qinnuteqaatit qanorpiaq ittuunersoq apeqqutaatillugu).
Nunaqarfimmiuuguit, ajoqip FORMULAR 3-A aamma FORMULAR 2-3 illoqarfimmi palaseqarfimmut nassiutissavai.


Akiliisariaaseq, uppernarsaatissanik nutaanik aallertarneq sullinneqartarnerullu sivisussusia
Tamatuma kingorna uppernarsaammik nutaamik piniaruit 150 kr.-mik akiliisassaatit uppernarsaatissanik nalinginnaasunik kalaallisut allassimasunik piniaruit, imalt. tuluttut allassimasunik nutaanik piniaruit, imalt. 300 kr.-mik akiliissaatit aterminik allannguiniaruit.

Akiliutit Grønlandsbankimut konto 6471-1002764-imut akilerneqarTASSAPPUT. Qaqugukkulluunniit kontantimik palaseqarfimmiluunniit akiliisarnermut atortut terminalit atorlugit akiliisoqarsinnaanngilaq.

Ilagiit Kalaallit akiliutigisimasat nalunaarsoreerpassuk, taava uppernarsaammik piniarnerit atermilluunniit allanngortitsiniarnerit ingerlanneqalissaaq. Atermut qinnuteqaatigisaq akuerineqanngippat, malugeqquarput akiliutitit utertinneqarsinnaanngimmata, sullissinermut matussutissatut taakku naatsorsuutigineqartarmata.

Sullissinermut naggasiullugu oqarasuaatikkut attavigineqassaatit, imalt. mailittut nalunaarutigisimasannut allaffigineqassaatit, uppernarsaat palaseqarfimmut aaneqarsinnaasoq unnerlugu, nunaqarfimmiuuguit ajoqimut aaneqarsinnaasoq ilinnut nalunaarutigineqassaaq. EQQAAMALLUGU kinaassutsimut uppernarsaat assitalik aalleruit takuteqqaassagakku.

Suliat taamatut ittut sivisunerpaamik ingerlanneqartarput ullut pingasut tallimallu akornanni.
Uppernarsaatissat allakkatigut nassiunneqassappat, naatsorsuutigisariaqarpat ullut arlaqarnerusut aatsaat qaangiuppata uppernarsaatissat apuutissammat.

 

Inuit aqqi pillugit inatsit nr. 193 29. april 1981-imeersoq