Piniarnermik aalisarnermillu nakkutilliisut

Piniarnermik aalisarnermillu nakkutilliisuutitanut pingaarnertut siunertaavoq, pisuussutit uumassusillit piujuaannartitsinissamik tunngaveqarluni iluaquteqarnissamut isumannaarinneqataanissaq. Nakkutilliisut piniarnermik aallaaniarnermillu nakkutilliinermik ingerlatsisuupput, taakkununnga ilaallutik kapisilinniarnerup eqalunniarnerullu nakkutiginissaa.

Nakkutilliisut suliassaannut ilaapput aamma piniarnermut aallaaniarnermullu tunngasunut suliassat allat, paasititsiniaanerit soorlu assersuutigalugu Pinngortitaleriffik suleqatigalugu arfanniarnerit, aarrinit, nannunillu pisanik misissorneqarnissaannut misiligutissanik tigusisinnaaneq, kiisalu tuttunik umimmannillu kisitsisarnernut atatillugu suleqataaneq.

Innuttaasutut piniarnermut aalisarnermut allatulluunniit pinngortitamiinnermut atatillugu nakkutilliisunut saaffiginnissuteqarsinnaavutit. Assersuutigalugu makkuusinnaapput:
• Piniagassanik aalisakkanillu unioqqutitsisumik piniarneq pillugu pasitsaassaqarnikkut
• Uumasunik napparsimasunik ikilersimasunilluunniit soorlu arferit aniguinissaannik ilimanaateqanngitsunik siumuisoqartillugu
• Piniagassat pillugit ilitsersuinerit, apeqquteqaatit assersuutigalugu piniarnermut piffissarititaasut uumasullu suussusaasa ilaat malillugit pisassiissutit agguataarneri pillugit

Piniarnermik aalisarnermillu nakkutilliisuutitap peqqussutaa naammassinngikkukku imaluunniit piniarnermik aalisarnermillu nakkutilliisuutitap suliniarneranik akornusersuiguit akiliisitsissummik kinguneqartinneqarsinnaavoq.

Ingerlatsiveqarfiit aalisarnermik piniarnermillu nakkutilliisoqarfiusut tassaapput Upernavik, Uummannaq, Ilulissat, Kangaatsiaq, Sisimiut, Maniitsoq, Nuuk, Ivittuut aamma Ittoqqortoormiit. Ingerlatsiveqarfiillu nakkutilliisoqarfeqanngitsut piniarnermik aalisarnermillu nakkutilliisunit pisariaqartitsineq naapertorlugu angalaffigineqartarput.

Piffissat eqqissisimatitsiviusut malittarisassallu allat eqqortinneqarnerat isumannaarniarlugu ingerlatsivimmi tamarmi ingerlaavartumik nakkutilliisunit aallaaniarneq piniarnerlu nakkutilliinermik ingerlatsissapput. Uumasut suussusaasa ilaat malillugit uumasut ataasiakkaat piniagaaffiini nakkutilliinerit annertusineqartarput. Nakkutilliinerit illoqarfiit qanittuini ungasissunilu ulluinnartumik imaluunniit ulluni arlalinni ingerlanneqarsinnaasarput.

Nakkutilliinerit ilaatigut makkuusinnaapput:
• Piniarnermut allagartat akuersissutillu atuuttuunerinik nakkutilliineq
• Piffissat eqqissisimatitsiviusut aallaaniarnermullu aalajangersakkat kiisalu piniarnermut, aallaaniarnermut aalisarnermullu tunngatillugu malittarisassat allat eqqortinneqarnerannik nakkutilliineq

Tamakku saniatigut eqqissisimatitsivinnik, nunanik allanngutsaaliukkanik allanillu pinngortitami illersorneqartut eqqarsaatigalugit nakkutilliinernut peqataasarput. Assersuutigalugu innani timmiaqarfiusuni allunaasat innartornermi atugassiat innartornermilu atortut allat inerteqqutaapput, timmissanillu piniarnermi piniutit akuerisaasunik taamaallaat atuinissaq aallaaniarnermut nakkutilliisup isumannaartussaavaa.

Piniarnermik aalisarnermillu nakkutilliisut sapinngisaq naapertorlugu ilitsersuinikkut paasititsiniaanikkullu ikiuuttassapput kiisalu uumasunik nungutsaaliuinernut pinngortitamullu tunngatillugu suliassanut allanut peqataasassallutik pisortat kiisalu ingerlatsisut erseqqinnerusumik isumaqatigiissuteqarneq naapertorlugu.

Uumasut killilersugaasut piniarneqarnerannut atatillugu nakkutilliinermi piniarnermik aalisarnermillu nakkutilliisoq nalunaaruteqartarnermi pisanillu nalunaaruteqartarnermi ilitsersuisinnaavoq.

Piniarnermik aalisarnermillu nakkutilliisoq nakkutilliinernik suliaqartilluni kinaassutsimik uppernarsaatimmik nassataqartarpoq, tassaasoq kinaassutsimut uppernarsaat.

Piniarnermik aalisarnermillu nakkutilliisoq eqqartuussiviit siumut akuersiseqqaarnagit piniarsinnaanermut aalisarsinnaanermulluunniit uppernarsaammik atuuttumik takutitaqarnissat piumasaqarfigisinnaavaa.

Nakkutilliinermut atatillugu piniarnermik aalisarnermillu nakkutilliisoq makkununnga pisinnaatitaaffeqarpoq:
• Piniarnermut, aallaaniarnermut aalisarnermullu angallatigisannut ikisinnaatitaapput
• Piniarnermut, aallaaniarnermut aalisarnermullu assartuutigalugit angallatinnut ikisinnaatitaapput
• Angallatinni inissiiviusinnaasunut aamma toqqorsivinnut, pisanik inissiiviusinnaasunut isersinnaatitaavoq
• Aalisakkat piniakkallu pisarineqarsimasut kiisalu piniarnermut, aallaaniarnermut aalisarnermullu atortut misissuiffigisinnaallugit
• Inatsisinik unioqqutitsigunarluni pisanik imaluunniit piniarnermut, aallaaniarnermut aalisarnermullu atortunik assiliinikkut video-mulluunniit immiussinikkut nalunaarsuisinnaatitaavoq
• Inatsisinik unioqqutitsilluni pisarineqarsimagunartunik misissugassanik annikinnerusunik uppernarsaatissatut atugassanik tigusisinnaatitaavoq

Piniarnermik aalisarnermillu nakkutilliisoq inatsisinik unioqqutitsisoqarneranik ilimasunnermut uppernarsaatissatut piniarfinni, sumiiffinni kalaalimineerniarfinni kiisalu tunitsivinni uumassusillit misissugassaannut misiligutissanik tigusisinnaavoq.

Aammattaaq uumasunik qularnanngitsumik pissatamik napparsimasumilluunniit, uumaannassasutut ilimagineqarsinnaanngitsumik takunnittoqartillugu, piniarnermik aalisarnermillu nakkutilliisoq pisinnaatitaavoq uumasoq toqussallugu.

Piniarnermut nakkutilliisoqarneq aaqqissuussaanikkut Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA) ataani inissisimavoq, ulluinnarnilu allaffissornikkut ingerlatsisuulluni.