Atuartut angerlarsimaffii

Inoqarfiit minnerit ilaanni meeqqat atuarfii ukiut atuarfiusussat tamakkerlugit atuartitsinissamut neqerooruteqanngillat. Tamatuma kingunerisaanik inoqarfinni minnerusuni atuartut meeqqat atuarfiat, 8. klassimiit, illoqarfinnut anginerusunut naammassiartortariaqartarpaat. Atuartut najugartik qimallugu atuarnerminni atuartut angerlarsimaffiini najugaqarsinnaapput.

Atuartunut angerlarsimaffiup siunertarivaa, atuartunut pisussaaffilimmik, killiliisumik naleqartinneqartumillu najugaqartitsinissaq, taamaaliornikkut atuartut atugaqarnerat, peqqissusiat, toqqissisimanerat aamma ilinniarnissamut inuttullu ineriartornissamut killissat patajaatsuullutik. Atuartut angerlarsimaffianniinnermi atuartut atuarnerat aamma ilinniakkaminnik naammassinnissinnaanissaat tunngavissinneqartarpoq. Atuartut angerlarsimaffianniinnissaq atuartunut 9. aamma 10. klassini atuartunut namminneq illoqarfigisaminni nunaqarfigisaminniluunniit Meeqqat atuarfiat pillugu Inatsisartut inatsisaat naapertorlugu atuarnissamik neqeroorfigineqarsinnaanngitsunut neqeroorutaassaaq. Illoqarfigisami nunaqarfigisamiluunniit imatut paasineqassaaq, illoqarfik nunaqarfilluunniit atuartut maannakkut atuarfigisaat. Atuartut angerlarsimaffiini inersimasunik atuartunik isumaginnittussanik atorfeqartitsisoqarpoq. Atuartut angerlarsimaffiini najugaqartitsineq akeqanngilaq, atuartullu taakkunani najugaqarnerminni nerisaqartinneqartarput. Angajoqqaalli meeqqamik atisassaat ulluinnarnilu pisariaqartitaat allat namminneq isumagisassaraat.

Atuartut angerlarsimaffiini najugaqartussanngortitsisarneq
Namminersorlutik Oqartussat nalunaarutaanni nr. 76 21. decembari 2021-imeersumi atuartut angerlarsimaffianni najugaqarnermi kommunit tulleriissaarinermut ataatsimiititaliaqarnissamik pilersitsinissamik pisussaaffiligaapput.
Nalunaarut malillugu kommunip atuartunut angerlarsimaffiini atuartunik tigooraanermi tulleriissaarinermut suliat ingerlanneqartarnerat pillugu sinaakkusiussat kommunip nittartagaanut tamanit takuneqarsinnaasunngorlugit ilineqartussaapput.