Atuarsimanermut uppernarsaat imaqartinneqassaaq:
- Atuartup atuartitsissutini ataasiakkaani karakteerii, ukioq tamaat atuuttut imaluunniit ukioq tamaat aamma misilitsinnermi atuuttut
- Atuartup immikkut sammisaqarnermini suliaanut uppernarsaat
- Ilinniartitsisunit itisiliilluni allakkatigut naliliinerit oqaatigiumasallu allat
- Suut fagit atuartitsissutigineqarsimaneri
Tamakkua saniatigut atuartut 10. klassimi imminnut naliliiffigisussaapput, taannalu imaqassaaq atuarfimmi sunngiffimmilu nukittuffittut isigisaannik aammalu siunissami angorusutaminnik. “Imminut nalilerneq” taanna atuarsimanermut uppernarsaammut ilaassaaq.
Atuarfimmit, atuartunit angajoqqaanillu imminut nalilerneq atsiorneqassaaq. Atuarsimanermut uppernarsaat atuarfiup pisortaanit atsiorneqassaaq.
Malugiuk
Atuartut immikkut pisariaqartitsisut atuarfimmi immikkut atugaqarlutik inaarutaasumik misilitsissinnaapput. Atuarfiup immikkut atugaqarluni misilitsitsittoqarnissaanut aaqqissuussinerata siunertaraa, atuartut timimikkut isumaliortaatsimikkulluunniit piginnaanikillisimasut misilitsinnermi atuartut allat assigalugit atugaqarnissaat. Uani piginnaanikillisoq atuartutulli allatut misilitsinnermi atugaqassaguni taartaasinnaasunik pisariaqartitsinera pineqarpoq.
Atuartunut ataasiakkaanut iliuusissatut pilersaarusiornerup ilaatigut siunertaraa, atuartut ilikkagassatut anguniagassanik ilikkagaqarnissaat qulakkeerniassallugu, kiisalu angajoqqaanik suleqateqarnissaq aqqutissiuutissallugu.