Meeqqat atuarfianni anguniakkat

Anguniagaq tassaavoq inerniliussassatut kissaatigisaq, suliassaq imaluunniit ingerlaasissaq pillugu nassuiaat. Kissaatigisat aalajangersimanerugaangata aamma piviusorsiortuugaangata imaluunniit inernerusussatut piumasaqaataasoq nassuiarneqarsimagaangat, sulinermi tunaartarisaq angujuminarnerusarpoq. Anguniakkanik suliaqarnermi qulakkeerneqartarpoq, kissaatigisat piumasaqaatilluunniit naatsorsuutigisaasut eqquutsinneqarnissaat.

Meeqqat atuarfiannut anguniakkat assigiinngitsorpassuit arlallit piumasaqaataapput, assersuutigalugu:

• Fag-ini anguniakkat
• Alloriarfinni anguniakkat
• Ilinniagassatut anguniakkat

Anguniakkani nassuiarneqartarput atuartut atuarnerminni suliassaat imaluunniit ilikkagassaat tamaasa.

Meeqqat atuarfianni anguniakkat pigineqarput, illit meeqqavit pitsaanerpaamik ilinniartinneqarnissaa siunertaralugu. Atuartoq, angajoqqaat ilinniartitsisulllu, atuartut inuttut ataasiakkaatut anguniagassaannik peqatigiillutik suliaqartussaapput.

Meeqqat atuarfiini atuartut atuartitsissutini assigiinngitsorpassuarni atuartinneqartarput. Atuartitsissutit immikkoortunut tallimanut agguagaapput:

• Oqaatsit
• Kulturi Inuiaqatigiilerinerlu
• Matematikki Pinngortitarlu
• Sumiiffimmi toqqakkat
• Inuttut ineriartorneq

Atuartitsissutinut tamanut assersuutigalugu matimatikkimut, kalaallisut, upperisarsiornermut, fysikkimut, tuluttut imaluunniit filosofiimut siunertaqarpoq. Atuartitsissutini piumasaqaataavoq atuartitsissutini ataasiakkaani atuartut suut ilinniassaneraat, assersuutigalugu:

• Kalaallisut paasisinnaallutillu oqalussinnaassasut
• Misigissutsitik paasisatillu isummerfigisinnaalerlugillu oqaatigisinnaalissagaat
• Namminneq allallu inissisimanerat paasisinnaalissagaat
• Oqaatsit kulturillu assigiinngitsut qanoq ataqatigiinnersut paasisinnaassagaat

Atuartitsissut Sumiiffinni toqqagassaq ilaatigut atuartitsissutinik nipilersornermut tunngasunik timersornernillu imaqarpoq, najukkallu ataasiakkaat piffimmi atugassarititaasut tunngavigalugit neqeroorutigisinnaasaannik. Atuartitsissutit taamaattut ilagisinnaavaat piffinni naluttarfilinni nalunnermik ilinniartitsineq imaluunniit ilinniartitsisussaqaraanni najukkamilu periarfissaqarpat sisorarnermik ilinniartitsineq.

Atuartitsissutini ataasiakkaani ilinniartitsisut atuartitsissutissamik siunertaliornissaat taakkualu eqquutsinnissaat anguneqarnissaallu akisussaaffigaat.

Meeqqat atuarfiat ukiuni qulini alloriarfinnut pingasunut agguagaavoq:

• Nukarlernut alloriarfik 1. - 3. klasse
• Akullernut alloriarfik 4. - 7. klasse
• Angajullernut alloriarfik 8. - 10. klasse

Alloriarfinni pingasuni tamani alloriarfinnut anguniagaqarpoq. Alloriarfinni anguniakkat tassaapput atuartunut immikkoortuni tamani atuartitsinissanut anguniagassat. Alloriarfinni tamani tallimani immikkoortoqarpoq, taakkualu atuartut inerikkiartorfigalugillu ilinniarfigissavaat:

• Ilisimasat piginnaasallu, soorlu oqaatsiminnik atuilluarnerulissapput, allannermikkut oqaluttariarsornermikkullu
• Inuttut piginnaasat, soorlu imminnut tatiginerulissapput
• Inuttut inooqatigiinnermilu piginnaasat, soorlu isumaqatigiinnginnernik qaangiisinnaanerulissapput
• Ilinniarnermi sulinermilu piginnaasat, soorlu namminneq suliaminnik naliliisinnaanerulissapput suleqataalluarsinnaanerulissallutillu
• Ilinniagassanik suliffissanillu toqqaaneq, soorlu ilinniarfiusinnaasut suliffiusinnaasullu assigiinngitsut ilinniassavaat

Immikkoortuni taakkunani tallimani imarisaasut piumasaqaataasulluunniit alloriarfimmit alloriarfimmut annertusiartuaassapput. Alloriarfinni anguniakkat pilersinneqarput atuartut pitsaanerpaamik inerikkiartornissaannut periarfissaqarlutillu ikiorneqarsinnaanissaat qulakkeerniarlugu.

Alloriarfinni tamani atuartitsissutit tamarmik ilinniagassatut anguniagalersugaapput, atuartut alloriarfinnik naammassinninnermi minnerpaamik ilikkareersimasassaannik imalinnik. Ilinniagassatut anguniakkat tassaapput, anguniakkat aalajangersimasut atuartut atuartitsissutini ataasiakkaani naammassisassaat. Soorlu ukunaniusinnaavoq:

• Oqaasilerineq oqaatsinillu piginnaanngorsarneq – naqinnerit nipaannik, ilusaannik, taaguutaannik atorfiinillu ilisimasaqarneq
• Attaveqaqatigiinneq – allatamik oqaluttuareqqiisinnaaneq
• Kulturi inuunermilu atukkat – kalaallit oqaluttuatoqaannik ilisimasaqalerneq
• Paasissutissanik ujartuineq – qarasaasiakkut paasissutissanik ujartuisinnaaneq

Ilinniagassatut anguniakkat imarisaat atuartut alloriarfinnut annerusunut nuuttarnerat ilutigalugu annertusiartortarput. Tamatuma qulakkiissavaa atuartup atuarnini tamaat imminut piginnaasamilu inerikkiartortinnissaa annertusiartortittuarnissaalu.