Meeqqat atuarfii tamarmik aqutsisoqarput kommunimi ingerlatsiviup, ilinniartitsisut, atuartut angajoqqaallu akornanni attaveqaataasunik.
Atuarfimmi aqutsisuukkajupput atuarfiup pisortaa, atuarfiup pisortaata tullia alloriarfimmilu aqutsisut. Atuarfiup aqutsisuisa ulluinnarni atuartitsineq allaffissornikkullu aqutsineq akisussaaffigaat, soorlu:
- Nalunaaquttap akunneri atuartitsivissat kommunalbestyrelsip aalajangersagai maleruarneqarnersut
- Atuartitsinissamut pilersaarusiat maleruarneqarnersut
- Suliassat atuarfimmi atorfeqartut akornanni agguataarlugillu aqussavai, atuartitsinerullu pilersaarusiorneqarnermigut aaqqissuunneqarnermigullu atuartunut tamanut unammillernartoqarteqqullugu
- Missingersuutissatut siunnersuusiortoqarsimanissaa
Atuarfiup aqutsisuisa atuarfimmi suliassanik aaqqissuussisarnerat agguataarisarnerallu maleruagassat aalajangersimasut malillugit ingerlanneqartassaaq. Maleruagassat Suleqatigiinnissamut Ataatsimiititaliamit politikkikkulluunniit aalajangerneqartarput.