Politikkikkut suleqatigisat

Meeqqat atuarfiannut tunngasuni meeqqat atuarfiata politikkikkut suleqatigisai tassaapput, Namminersorlutik Oqartussat aamma kommunip ingerlatsivia meeqqat atuarfiannut suliassaqarfimmik suliaqartoq. Namminersorlutik Oqartussat meeqqat atuarfiannut tunngasut pillugit pingaarnertut inatsisit aamma maleruagassat isumagisarpaat, matumanilu suliassaqarfimmi sinaakkusiussat eqqorlugit meeqqat atuarfiata aqutsivigineqarnissaa pisinnaaqqullugu atuarfimmi siulersuisut aqutsinissamut maleruagassaat kommunip ingerlatsiviata suliarisarpai.

Atuarfiup aningaasaqarneranut atatillugu politikkikkut sinaakkutit perorsaariaaseqarnikkullu piumasaqaatit eqquutsinneqarnissaat qulakkiissallugu atuarfiup ingerlatsiviata aamma atuarfiup aqutsisuisa pingaarnertut suliassaraat.

Kommunimi atuarfiit tamarmik atuarfeqarnermut ingerlatsivimmit akisussaaffigineqarput. Tamatuma kingunerisaanik assersuutigalugu meeqqat ukioqarnertik malillugu atuartitaasussaatitaanerat malinneqarnersoq qulakkeernissaa.

Ilutigisaanik atuarfinnik nakkutilliineq ingerlattussaavaa, tamatumani ilaatigut uku qulakkeerneqassallutik:

• Missingersuutinut sinaakkutit aalajangersarneqarsimasut aamma akunnerit atugassiissutigineqarsimasut aallaavigalugit atuarfiup pilersaarusiornera pissasoq
• sulinerup sivisussusissaatut isumaqatigiissutigineqarsimasut eqquutsinneqassasut, assersuutigalugu ilinniartitsisut piareersarnissamut aamma ilinniartitsinissamik ingerlatsinissaannut akunnerit atugassaat
• Sulinermi avatangiisit pillugit inatsit eqquutsinneqarnersoq, tassaasinnaapput avatangiisit qaamaneri naammannersut, avatangiiserisat atuartunut atorfeqartunullu atoruminartuunersut
• Sullissinermut inatsit eqquutsinneqarnersoq, tamatumani assersuutigalugu aalajangersimasumik piffissaliunneqartup iluani angajoqqaat apeqqutaannut akissutissarsinissap qulakkeernissaa pineqarsinnaavoq

 

Aningaasaliinissamut piginnaasaqartoq aamma sulisitsinissamut piginnaasaqartoq tassaavoq Kommunalbestyrelse. Tassa imaappoq atuarfinnut ataasiakkaanut aningaasanik sinaakkusiinerit aamma atorfinitsitsinerit soraarsitsinerillu Kommunalbestyresimit aalajangerneqartarput.

Taamaattoq atorfinitsitsinissamut piginnaatitsissut Atuarfeqarnermut Ingerlatsivimmut imaluunniit atuarfimmi aqutsisumut tunniutissallugu Kommunalbestyrelsimit aalajangiunneqarsinnaavoq, kisianni atuarfimmi siulersuisunut tunniunneqarsinnaanani.

Soraarsitsisinnaanermut piginnaatitsissut tunniunneqarsinnaanngilaq.