Assigiinngitsunik suliallit suleqatigisat

Meeqqat atuarfiannit suleqatigisat assigiinngitsorpassuussapput atuartut pitsaanerpaamik atuartinneqarnissaat qulakkeerniarlugu. Atuarfimmit suleqatigineqartartut allanik piginnaasaqarfeqarput atuarfimmit pigineqartunit allaanerusunik. Tassaasinnaapput tarnip pissusiinik ilisimasallit, nakorsat politikerillu.

Piginnaasaqarfiit assigiinngitsut kattutsinnerisigut atuartup atuartitaanera tamakkiinerusoq qulakkeerneqassaaq – atuagarsornermut tunngasut, aammali atuartup iluarisimaarinninnera, atuartunut allanut attaveqarnera aamma atuarfiup angerlarsimaffiullu akornanni attaveqarnera.

Assigiinngitsunik piginnaasaqartut akornanni suleqatigiinneq assigiinngitsutigut suleqatigiinnermik taasarpaat. Assigiinngitsunik suliallit suleqatigisat assersuutigalugu tassaasinnaapput:

• Perorsaanikkut siunnersuisoqatigiit
• Perorsaanermik tarnip pissusiinillu siunnersuisarfik (PPR)
• Atuarfik, Inunnik Isumaginnittoqarfik, Peqqinnissaqarfik, Politiit kiisalu Pinerluttunik Isumaginnittoqarfik (SSSPK)
• Suli atualersimanngitsunut susassaqartut

Meeqqat atuarfimmi ajornartorsiuteqaruni, assersuutigalugu atuagarsornikkut inuuniarnikkulluunniit, atuarfimmi suleqatigineqartut aqqutigalugit meeqqallu ikiorserneqarsinnaavusi.

Assersuutigalugu meeqqat atuartitsinermi malinnaaniarnissaminik ajornartorsiuteqarpoq, meeqqat timikkut tarnikkulluunniit innarluuteqartoq atuarfimmit pasitsaassutigineqarluni, imaluunniit meeqqat inuttut ajornartorsiuteqartoq atuarfimmit pasitsaassutigineqarluni.

Assigiinngitsutigut suleqatigiittoqarneratigut atuartut tamaasa qanorluunniit tunuliaquteqaraluarpata tunngaveqaraluarpatalu, perorsaanikkut suliatigullu assigiimmik periarfissaqarnissaat qulakkeerneqassaaq. Tamannalu isumaqarpoq:

• Atuartut ilisimasassanik piginnaasassanillu tamanik aqqusaagaqassasut
• Atuartut peqqinnartumik toqqissisimanartumillu ilinniarnermi avatangiiseqassasut
• Atuartut atuarnerminni iluarisimaarinninnerminnilu akisussaaqataanissartik ilinniassagaat

Atuartut ikiortariallit pineqartillugit atuarfiup qanimut suleqataasa ilagaat PPR. PPR tassaavoq Perorsaanermik tarnip pissusiinillu siunnersuisarfik.

PPR-ip meeqqat malittarisinnaavaa misissorsinnaallugulu. PPR-imi siunnersorti isumaqaruni meeqqat ajornartorsiuteqartoq atuarfiup illilluunniit ikiorsersinnaanngisannik, taava iluaqutaasinnaasorisaminut meeqqavit ikiorserneqarnissaanut innersuussaqarsinnaavoq.

Meeqqavit atuarfiata PPR attavigisinnaanngilaa illit angajoqqaatut akuliunneqaqqaartinnak. Angajoqqaat namminneerlutik PPR saaffigisinnaavaat.

Atuarfiup suleqataa alla tassaavoq SSSPK. SSSPK suleqatigiinnit immikkoortunit assigiinngitsorpassuarnit naalisagaavoq: Atuarfik, Inunnik Isumaginnittoqarfik, Peqqinnissaqarfik, Politiit kiisalu Pinerluttunik Isumaginnittoqarfik.

Atuarfiup SSSPK-mik suleqateqarnera ajornartorsiutit pinaveersaartinnissaannik imaqarpoq. Tassaasinnaapput:

• Politeeq pinerlunnaveersaarnissaq pillugu atuartunut oqalugiartinneqartoq
• Peqqissaasoq atuartut qanoq ilillutik kinguaassiuutitigut nappaatinik tunillatsinnaveersaarnissaannik naartulinnginnissaannillu ilinniartitsisoq
• Kigutigissaasoq meeqqanik kigutigissarnermik ilinniartitsisoq
• Peqqissaasoq meeqqanik peqqinnissamik, soorlu nerisassanik peqqinnartunik timillu aalatilluartarnissaanik ilinniartitsisoq

Aallaavittut oqaatigineqarsinnaavoq atuarfiup SSSPK-mik suleqateqarnera ukiumut pilersaarutinut ilaareersoq. Taamaattorli ilinniartitsisup assersuutigalugu paasileruniuk atuartoq ikiaroortalersimasoq naamaartalersimasorluunniit, taava ilinniartitsisup SSSPK-mi atornerluinermut siunnersorti attavigisinnaavaa qinnuigalugulu atuartunut atornerluineq pillugu paasititsiniaaqqullugu.

Meeraqaruit meeqqerivimmiittumik ulluuneraniluunniit angerlarsimaffimmi paarineqartartumik atualingajalersumik meeqqavillu atualernissaminut piareersimanera nalornissutigigukku, taava ilinnik meeqqannillu ikiuisinnaasunik suleqatigiissitaliortoqarsinnaavoq.

Suleqatigiissitat taamaattut meeqqerisumik, meeqqavit ilinniartitsisussaanik aammalu perorsaasumik imaluunniit isumaginninnermut siunnersortimik inuttaqarsinnaapput. Taakkua peqatigalugit illit meeqqannut tapersersuineq pitsaanerpaaq anguniassavarsi.