Meeqqat tamarmik tallimat missaannik ukioqaleraangamik meeqqerivimmiikkunik angerlarsimaannarunilluunniit, atualernissamut piukkunnassuseqarnermut misilitsittarput. Taanna meeqqap atuarfimmi aallartinnissaminut piareersimaneranut paasiniaaneruvoq.
Misilitsinnermi paasiniagassat ilaatigut tassaapput, meeqqap:
- Oqaasii
- Kisitsisinik paasinnittarnera
- Eqqaamasinnaanera
- Ilinniariaaseqarnera
Meeqqap misilitsinnera meeqqerivimmi perorsaasumit atuarfimmiluunniit siunnersortimit ingerlanneqartarpoq. Meeraq ataasiaannarluni misilitsissaaq.
Misilitsinnerup takutippagu meeraq ilisimasassami ilaanik ajornartorsiuteqartoq imaluunniit meeraq immikkut pisariaqartitaqartoq, taava atualinnginnerani ajornartorsiutit anigorniarlugit suleqatigiittoqalissaaq. Angajoqqaattaaq namminneerlutik imaluunniit ilisimasallit peqatigalugit aalajangersinnaavaat meerartik atualernissaminut ukioq ataaseq utaqqisariaqarnersoq.
Meeraq arfinilinnik ukioqaleraluaruniluunniit tamatigut imaattariaqanngilaq atualernissaminut piareersimasoq. Meeraq atualernissaminut piareersimanngitsoq pinngitsaalillugu atualersikkaluaraanni tamanna ajornartorsiuterpassuarnik kinguneqarsinnaavoq.