Qimmit uumasuutitut pigineqartut

Qimmiutilittut eqqumaffigissasarpassuaqassaatit aamma apeqquterpassuit takussuussinnaapput. Nunatsinni uumasuutitut qimmiuteqassagaanni ilisimasariaqakkatit pingaarnerit uani sammineqassapput.

Nunatsinni qimmiuteqarnermut paasissutissat quppersakkami "Kalaallit Nunaanni Qimmeqarneq"-mi atuarsinnaavatit.

Qimmit pitsaasumik uumasuutigineqassagunik uagutsitulli nerisassat eqqortut nerisariaqarpaat. Qimmit nerisassaanik pitsaasunik nerukkaasarnikkut nappaatinut oqimaappallaalernermulluunniit pinngitsoortitsisinnaavutit, qimmiutillu sivisuumik peqqissumillu uumatissallugu.

Qimmit nerukkaatissanik aalajangersimasunik ullut tamaasa nerisinnaalluarput, taamaattorli mamarisaminnik tamulugassinneqarsinnaanertik aamma nuannaarutigisarpaat. Taamaattorli ilisimaviuk qimmit tamulugassanik kaloriat 10%-it sippussanngikkaat?

Qimmiutivit panertunik paninngitsuniillu nerisassaat pitsaasuussapput.

Inuit nerisaasa sinnikuinik nerisaqarnissaq tunngaviusumik qimminut peqqinnanngilaq. Taamaattorli qimmerpit pualavallaalinnginnissaa eqqarsaatigalugu, nerisaasa saniatigut allanik ilaatigut nerukkarniarukku, annikinnerulaartunik ulloq taanna nerisinneqartarnissaa pingaaruteqarpoq.

Qimmit nerukkaatissaasa puuani tamani qimmiutivit qanoq annertutigisumik nerisinneqartarnissaanik ilitsersuutit allassimasarput. Qimmiutivit ullormut nerisassai ullaakkut uuttortariarlugit, ullup ingerlanerani arlalinngorlugit immikkoortitereerlugit tunniunneqartarsinnaanerat isumassatsialaavoq.

Qimmip aalalluartarnissaa pingaaruteqarpoq. Tamanna ima isumaqarpoq ullormut arlaleriarluni aneersinneqartassaaq.

Qimmerpassuit piginnittortik arpaqatigissallugu, sikkileqatigissallugu imaluunniit arlaanik assinganik sammisaqaqatigissallugu nuannarisorujussuusarpaat. Taamaattorli qimmerpit ukiuinut, sussusaanut, (race) nalinginnaasumillu peqqissusaanut naleqquttumik timimik aalatitsinissaa eqqaamassavat.

Aamma pingaaruteqarpoq qimmerpit pissuserissaarnermik ilinniartinneqarnissaa. Qujanavissumillu qimmit amerlanersaat sungiusarneqarnertik nuannarisarpaat. Taakkullu ilutigisaanik qimmip qasusarnissaanut periusitsialaavoq!

Ilitsersuineq suusinnaavorluunniit. Inginnissaanut, nallarnissaanut taamatullu eqqagassanik katersisinnaanissaanut sungiusaasoqarsinnaavoq.

Qimmimut eqqarsartaatsikkut timitsigulluunniit qanoq iliornikkut sungiusaasinnaanerlutit nalornissutigigukku, ikiuutaasinnaasunik internetimi qanoq aallartissanersutit isumassarsiorfippassuusinnaasunik ulikkaarpoq.

Qimmeq timimik aalatitsilluni aneersimaguni qasulertarpoq. Ilaqutariiullusi qimmeq sumi sinissinnaanersoq isumaqatigiissutigisiuk. Qimmip eqqissilluni siniffissaqarnissaa pingaaruteqarpoq.

Qimmerpassuit maavaartumi imaluunniit piginnittumi eqqaani sininnissartik nuannarisorujussuuaat! Qimmeqarporli natermi ilaatigullu silami sininnissaminnut iluarisaqartartunik. Tamatigorluinnaq qimmip panertumik innangaffissaqarnissaa eqqaamaneqassaaq.

Nunatsinni qimmit tamarmik perlerornermut, qimmit nappaataanut parvovirusimullu akiuussutissamik tunineqassapput. Tamanna uumasut nakorsaanit qimminilluunniit nakkutilliisumit isumagineqartarpoq. Eqqaamassavat, qimmerpit inatsisit malillugit akiuussutissamik tunineqarnissaa illit akisussaaffigigakku.

Qimmit aamma napparsimalersinnaapput. Nunatsinni uumasunut nakorsiartarfik kisiartaavoq, tassa Donnas Dyreklinik Nuummiittoq. Ajoqusertoqassagaluarpat imaluunniit uumasuut nappaataanut tunngasumik apeqqutissaqaruit qimmiutinnut tunngasumik uumasut nakorsaanit ikiortissinnaavutit.

Nuup avataani najugaqaraluaruilluunniit attavigineqarsinnaapput. Uumasut nakorsaat oqarasuaatikkut nakorsiartitsisinnaavoq nakorsaatissanillu pisariaqartitanik nassiussisinnaalluni.

Qimmiuteqartutut qimmiutivit naalliunnginnissaa eqqumaffigissavat. Qimmiutit napparsimalerpat naalliuuteqarpalluunniit uumasut nakorsaanit eqqortumik passunneqarnissaa toqunneqarnissaaluunniit illit akisussaaffigivat. Qimmiutinnut eqqortoq sunaanersoq nalugukku, uumasut nakorsaat attaviginnissinnaavat apeqquteqarlutillu.
Uani paasisaqarnerugit ”Uumasut nakorsaat nappaatillu”.