Uumasuutitut qitsuuteqarneq mikisunillu uumasuuteqarneq

Qitsuuteqarnermi pingaaruteqarpoq eqqaamajuaannassallugu uumasoq illersorsinnaanissaanut, anniartinnginnissaanut ajoqusinnginnissaanullu piginnittutut pisussaaffeqaravit. Pisussaaffik suli atuutissaaq qitsuk silamiippat sivisuumilluunniit silamiissimaluarpat.

Qitsuup imigassaqarnissaa, nerisassaqarnissaa panertumillu siniffissaqarsinnaanissaa illit akisussaaffigivat.

Taamaammat qitsuutitaannginninni eqqarsaatigeqqaassavat qitsuk silamiutaassanersoq illumiutaassanersorluunniit. Qitsuit amerlasuut silamiinneq nuannarisarpaat tamarmilli silami nillertumiissinnaaneq ajorput. Silamut anisinnaatillugu ajoqusernissaminut qanillattuutaasarportaaq.

Qitsuutit silamiutaatinniarlugu aalajangersimaguit piaqqiorsinnaajunnaartinnissaa pingaaruteqarpoq. Ima paasillugu, mannissaqarfii issuiluunniit peertillugit taamaasilluni naartusinnaajunnaarluni arnavissanilluunniit naartutitsisinnaajunnaasssaq.

Nalunngiliuk qitsuit marluk ukiut tallimat ingerlanerini 12.000 missaanik amerlassusinissinnaammata?

Qitsuk illumiutaassappat inuunerinnissaa eqqarsaatigalugu, eqqarsartaatsikkut timitsigulluunniit qanoq iliornikkut sungiusartarnissaa pingaaruteqarpoq. Eqqaamajullu qitsuit angalaarsinnaassammata sivisuumillu ungaluniitinneqartassanngimmata.

Qitsuit silamiutaappata illumiutaappataluunniit pingaaruteqarpoq qanoq paarilluarsinnaanissaat misissussallugu. Qitsuutit nerisassaqarluartinneqassaaq napparsimalersimappallu naalliutsinnginnissaa qulakkiissavat.

Nunatsinni uumasunut nakorsiartarfik namminersortoq Donnas Dyreklinik kisiartaavoq taamaammat Nuuk ungasikkukku uumasut nakorsaannit ikiorneqarnissat qulakkeersinnaanngilaq. Uumasut nakorsaat akiliuteqarnikkut oqarasuaatikkut nakorsiartitsisinnaavoq taamaattumik sianernissannut tikilluaqqusaavutit. Quppernermi uani paasissutissat annertunerusut atuarsinnaavatit: Nappaatit aamma Nunatsinni Uumasut Nakorsaat

Inuttaminnut asanninnermik nuannaarnermillu pilersitsisinnaasunik allanik mikisunik uumasuuteqartoqarsinnaavoq soorlu kaniinat, kikkaasut (marsviinit hamsterillu).

Uumasut mikisut ungaluisa angissusaat naammattuunissaa pingaarnerpaat ilagaat. Nalunngiliuk kaniinaq minnerpaamik 2,75 miiterisut2 angissusilimmik pangaliffissaqarsinnaasussaq?

Kaniinat uumasullu mikisut arlallit uumasoqatigiittussiaammata ajunngitsumik pineqassappata minnerpaamik ataatsimik race-qatiminnik "kammaqartariaqarput".

Uumasunut mikisunut nerisassat tulluartut aamma pisassavaat. Kaniinat uumasullu mikisut allat pingaarnertut nerisarisariaqagaat tassaapput ivikkat pitsaasut. Nerisaasa 10%-ii nerukkaatissat panertuninngaanneersuussapput (kaniinanut iisartakkat) taamatullu 5%-ii kisiat naatitaneersuussallutik. Naak kaniinat uumasullu mikisut allat naatitartorusunnerusaraluartut.

Uumasut mikisut napparsimalersinnaammata iliuusissatit suunersut ilisimanissaa pingaaruteqarpoq. Uumasuutilittut uumasuutivit anniannginnissaa anniarpallu naalliulluni toqunneqannginnissaa illit akisussaaffigaat. Quppernermi uani paasissutissat annertunerusut atuarsinnaavatit: Nappaatit aamma Nunatsinni Uumasut Nakorsaat