Nunatsinnut uumasunik angallassineq

Angerlarsimaffimmi uumasuutit sa.ak. 12-iniit utoqqaanerusut nunatsinnut eqqussinnaaniarpata piumasaqaatit uku anguneqarsimassapput:

• Piujuartussamik nalunaaqusiineq: Uumasoq chippimik nalunaaquserneqarsimassaaq
  
  
• Perlerornermut kapitissimaneq: Qimmit qitsuillu eqqortumik kapitissimassapput. Nunatsinnukarnermi kapitissimaneq minnerpaamik ullunik 30-nik sivikinnerpaaffeqassaaq annerpaamillu ullunik 365-nik (ukioq ataaseq) sivisussuseqassalluni.
  
  
• Qimmit nappaataannut parvovirusimullu kapitissimaneq: Qimmit nappaataannut parvovirusimullu atuuttumik qimmit kapitissimassapput. Tamanna DHP-vaccination atorlugu anguneqakkajuttarpoq.
  
  
• Kapitissimanermut uppernarsaatit: Qimmivit qitsuutivilluunniit eqqortumik kapitissimanera uppernarsarsinnaasariaqarpat. Kapitinnermut uppernarsaat EU-pas atorlugu imaluunniit uumasut nakorsaannit pisinnaavatit.
  
  
• Peqqissutsimut uppernarsaat: Uumasuutivit nunatsinnut angalannginnerani siusinnerpaamik ullut 14-nit uumasut nakorsaata peqqissutsimut uppernarsaat suliarisimassavaa. Peqqissutsimut uppernarsaat uani nassaarisinnaavat
  
  Assersuut aajuna: Qaammatip ulluisa 14-ianni angalaniarsimaguit peqqissutsimut uppernarsaat qaammatip ulluisa aallaqqaataata kingorna sananeqassaaq.
  
  
• Miluuffigisaminnit ilanngartuisunit akiuussuserneqarneq: Qimmit qitsuillu nunatsinnukannginnerini siusinnerpaamik ullut 14-it sioqqullugit uumasut nakorsaannit qumanut miluuttunullu katsorsarneqassaaq.
  
  Assersuut aajuna: Qaammatip ulluisa 14-ianni angalaniarsimaguit siusinnerpaamik qaammatip ulluisa aallaqqaataata kingorna qumaarsussusarnut miluuttunullu katsorsarneqassaaq. Nalinginnaasumik peqqissutsimut uppernarsaat suliarineqarnerani isumagineqartarpoq.
  
• Uumasoq mattusimatinneqassaaq: Peqqissutsimut uppernarsaat suliarineqarneranit uumasuutivillu katsorsaammik tunineqarneraniit aallarnissaata tungaanut mattusimatinneqassaaq. Tamanna piginninnermut uppernarsaammut uppernarsarlugu atsiussavat. Piginninnermut uppernarsaatip atsiugassartaa peqqissutsimut uppernarsaatip ataaniippoq.
  
  
• Najugarisami kommunimit akuersissut: Kommunimut qinnutigisimasannik angerlarsimaffimmi uumasuuteqarnissamut akuersissummik peqassaatit.
  
  
• Kinguaassiorsinnaajunnaarsitsineq: Qimmiutit arnaviaappat kinguaassiorsinnaajunnaarsitaasimassaaq. Uumasut nakorsaata qimmivit kinguaassiorsinnaajunnaarsitaasimaneranut uppernarsaat sanasinnaavaa.

Kalaallit Nunaata Sinniisoqarfianit akuersissut: Uumasuutillu piumasaqaatit tamaasa naammassisimagussigit paasissutissat Kalaallit Nunaata Sinniisuanut nassiutissavatit, uunga info@ghsk.dk. Kalaallit Nunaata Sinniisoqarfiata eqqussinissamut akuersissummik tunisussaavaatit. Kalaallit Nunaata Sinniisoqarfia pillugu uani paasisaqarnerusinnaavutit.

Nunani tamalaani uumasuutivit perlerornermut akiuussutissaata qanoq sivisutigisumik atorsinnaanera EU-pas-iani allaqqavoq. Nunatsinnukarniaruilli nunatsinni inatsisit, ullut 30 aamma 365-sit atuutsinneqartut malissavatit

Qimmiaqqat qitsuaqqallu qaammatit pingasut ataallugit utoqqaassusillit nunatsinnukarsinnaaniarpata uku piumasaqaatit naammassineqassapput:

• Piujuartussamik nalunaaqusiineq: Uumasoq piujuartussamik soorlu chippimik nalunaaquserneqarsimassaaq.

1. Perlerornermut kapitissimaneq: Uumasoq perlerornermut illersuuteqassaaq. Tamanna assigiinngitsutigut pisinnaavoq.
   
   Qimmiaqqap qitsuaqqalluunniit arnaa piaqqinissami ullut 30-t sioqqullugit annerpaamillu ullut 365-it sioqqullugit perlerornermut kapitissimappat tamannalu arnavissap kapitinneranut uppernarsaateqarpat taava piaraq illersuutissaqassaaq. Qimmiaraq qitsuararluunniit arnaminniit kisiat milutsinneqarsimassaaq. Uumasoq nunatsinnut pereernermi kingorna qaammatit sisamat arfinillillu missaani utoqqaassuseqalerpat kapiteqqissaaq.
   
   Assersuut: Qimmiaraatit ulloq 20/5-2022 piaqqiaappat, arnaa kingusinnerpaamik 19/4-2022 siusinnerpaamillu 20/5-2021 perlerornermut kapitinnikuusimassaaq.
   
   
2. Qimmiaraq qitsuararluunniit perlerornermut kapitissinnaapput. Taamaattorli kapitereernermiit ullut 30-t qaangiuppata aatsaat aallarsinnaavoq. Eqqaamajuk: Uumasutit sap. ak. 12-it ataallugit utoqqaassusillit EU-selskabsdyrspas-iminni perlerornermut kapitissimanermut uppernarsaammik pisinnaanngillat. Uani akiuussusertissimanermut uppernarsaat atussavat. Uumasoq nunatsinnut pereernermi kingorna qaammatit sisamat arfinillillu missaani utoqqaassuseqalerpat kapiteqqissaaq.

• Qimmit nappaataannut parvovirusimullu kapitissimaneq: Akiuussutissamik sanasut maleruagassaat malillugit qimmiaqqat qimmit nappaataannut parvovirusimullu kapineqarsimassapput. Nunatsinnut pereernermi kingorna nunatsinni piumasaqaatit malillugit kapitittassaaq.
  
  
• Akiuussusertissimanermut uppernarsaatit: Uumasuutit (immaqalu arnaa) eqqortumik akiuussusertissimanerat uppernarsarsinnaasariaqarpat. Tassani periusaasinnaasut marluupput:

o Arnaviaq eqqortumik kapitissimaneranut uppernarsaat: Uumasut nakorsaanniit akiuussutissinneqarsimanermut uppernarsaatit atortakkit. Uppernarsaammik perusullutit kinguaassiortitsisoq attavigiuk.
o Uumasuutivit iluamik kapitissimaneranut uppernarsaat: Uumasut nakorsaata kapitissimanermut uppernarsaatit sanasinnaasai imaluunniit kæledyrspas-it (EU-selskabsdyrspasset) atortakkit

• Peqqissutsimut uppernarsaat: Uumasuutivit nunatsinnut angalannginnerani siusinnerpaamik ullut 14-nit uumasut nakorsaata peqqissutsimut uppernarsaat suliarisimassavaa. Peqqissutsimut uppernarsaat uani nassaarisinnaavat.
  
  Assersuut: Qaammatip ulluisa 14-ianni angalaniarsimaguit peqqissutsimut uppernarsaat qaammatip ulluisa aallaqqaataata kingorna sananeqassaaq.
  
  
• Miluuffigisaminnit ilanngartuisunit akiuussuserneqarneq: Uumasoq nunatsinnukarnissami ullut 14-it sioqqullugit uumasut nakorsaannit teriannissap qumanut miluuttunullu akiuussutissamik kapineqarsimassaaq.
  
  Assersuut: Qaammatip ulluisa 14-ianni angalaniarsimaguit siusinnerpaamik qaammatip ulluisa aallaqqaataata kingorna uumasoq katsorsarneqassaaq. Nalinginnaasumik peqqissutsimut uppernarsaat suliarineqarnerani isumagineqartarpoq.
  
  
• Uumasoq mattusimatinneqassaaq: Peqqissutsimut uppernarsaat suliarineqarneranit uumasuutivillu katsorsaammik tunineqarneraniit aallarnissaata tungaanut mattusimatinneqassaaq. Tamanna piginninnermut uppernarsaammut uppernarsarlugu atsiussavat. Piginninnermut uppernarsaatip atsiugassartaa peqqissutsimut uppernarsaatip ataaniippoq.
  
  
• Najugarisami kommunimit akuersissut: Kommunimut qinnutigisimasannik angerlarsimaffimmi uumasuuteqarnissamut akuersissummik peqassaatit.
  
  
• Kinguaassiorsinnaajunnaarsitsineq: Qimmiutit arnaviaappat kinguaassiorsinnaajunnaarsitaasimassaaq. Uumasut nakorsaata qimmivit kinguaassiorsinnaajunnaarsitaasimaneranut uppernarsaat sanasinnaavaa.
  
  

Kalaallit Nunaata Sinniisoqarfianit akuersissut: Uumasuutillu piumasaqaatit tamaasa naammassisimagussigit paasissutissat Kalaallit Nunaata Sinniisuanut nassiutissavatit, uunga info@ghsk.dk. Kalaallit Nunaata Sinniisoqarfiata eqqussinissamut akuersissummik tunisussaavaatit. Kalaallit Nunaata Sinniisoqarfia pillugu uani paasisaqarnerusinnaavutit.

Nunani tamalaani uumasuutivit perlerornermut akiuussutissaata qanoq sivisutigisumik atorsinnaanera EU-pas-iani allaqqavoq. Nunatsinnukarniaruilli nunatsinni inatsisit, ullut 30 aamma 365-sit atuutsinneqartut malissavatit.

Qimuttunik qimmeqarfik
Qimmit qimmit qimuttoqarfiisa avataannut taamaallaat eqqussinnaavatit. Qimuttunik qimmeqarfik kujataani avannarpasissutsip 66-ip avannaani aamma kippasissutsip 44-p kangiani sumiiffik, tassunga ilanngullugu Nuna Allanngutsaaliugaq, taamaattorli Kommune Kujalliup avannamut kangimut killeqarfiata kangianiippoq. Tassani pineqarput Avannaata Kommunia, Qeqertalik Kommunia, Qeqqata Kommuniata ilamernga Sermersuullu Kommuniata ilamernga.

Qimuttunik qimmeqarfiusut avataanni piffiit ilaanni Nuuk ilaavoq.

Kangerlussuup mittarfiani utaqqiisaa uninnganeq
Naak Kangerlussuaq qimmit qimuttoqarfiugaluartoq qimmit aqusaarnermi Kangerlussuup Mittarfianiissinnaatitaapput. Qimmilli unnueqatigisinnaanngilat taamaattumik ulloq taanna Kangerlussuarmut tikikkussi ulloq taanna aallaqqissaasi.

Taassuma saniatigut maleruagassat ilisimasariaqakkatit:

Qimmit perusuersarniassammat pitoqqaannaavilluni sivikitsumik mittarfimmiit anisinnaatitaavoq. Qimmip anaa puussiaaqqamut pooriarlugu toqqaannaq eqqaavimmut igissavat.

Kalaallit qimmii nappaatinut illersorniarlugit maleruagassat atuupput maleruaqqusallu malinngikkukkit akiligassitsissinnaavutit.

Kinguaasiorsinnaajunnaarsitaaneq
Malugiullu arnaviaatit nunatsinnut ilagerusukkukku taava kinguaassiorsinnaajunnaarsitaasimassammat.

Nunatsinniit uumasuutit nassarlugu angalassaguit inatsisit ilisimasassat pingaarutillit amerlasinnaapput.

Nunatsinniilli aallarniaruit nunani allani tigusisussap nunami inatsisai atuutissapput. Imatut paasillugu, nuna tikitassassi piumasaqaatai aallaavigissavasi.

Assersuutigalugu uumasuutit Danmarkiliaqatiginiarukku taava Fødevarestyrelsen Danmark attaveqarfigissavatit.

Islandimukarniaruit paasissutissat amerlanerit uani atuarsinnaavatit: Iceland Food and Veterinary Authority.

Nunanut EU-jusunut angalassaguit paasissutissat amerlanerusut uani atuarsinnaavatit: Travelling with pets and other animals in the EU.