Aallakaatitsinissamut akuersissut - Qinnuteqarneq

Radiokkut tv-kkullu aallakaatitsinissamut siullermik marlunnik akuersissuteqassaatit:

•    Aallakaatitsinissamut akuersissut, aallakaatitsiviusussanut allaaserineqartunut aallakaatitsinissamut akuersissutaasoq
•    Radiofrekvensimik atuinissamut akuersissut, frekvensimi aalajangersimasumi aallakaatitsinissamut akuersissutaasoq aamma aallakaatitsinermi atortunik akuersisoq

Aallakaatitsinissamut akuersissut ukiuni tallimani atuutissaaq, piffissaq sivikinnerusoq pillugit qinnuteqarsimanngikkuit.

Radiokkut tv-kkullu aallakaatitsinissamut akuersissut ukuninnga qinnutigineqarsinnaavoq:

•    Peqatigiiffiit
•    Pisortat suliffii/suliffeqarfiit
•    Inuit ataasiakkaat

Sumiiffimmi aamma kommuneqarfimmi:
1) Ingerlatseqatigiiffik, peqatigiiffik assigisaaluunniit Kalaallit Nunaanni angerlarsimaffeqassaaq.
2) Ingerlatseqatigiiffiup, peqatigiiffiup assigisaataluunniit qinnuteqaammi uppernarsaatissanut piumasaqaatit naammassisimassavai.
3) Aallakaatitassiat imarisaat inatsisinik malinnissorineqassapput.
4) Frekvensimik atuinissamut akuersissummut piumasaqaatit naammassineqarsimassapput.

Nuna tamakkerlugu:
1) Ingerlatseqatigiiffik, peqatigiiffik assigisaaluunniit Kalaallit Nunaanni angerlarsimaffeqassaaq.
2) Ingerlatseqatigiiffiup, peqatigiiffiup assigisaataluunniit qinnuteqaammi uppernarsaatissanut piumasaqaatit naammassisimassavai.
3) Aallakaatitassiat imarisaat inatsisinik malinnissorineqassapput.
4) Frekvensimik atuinissamut akuersissummut piumasaqaatit naammassineqarsimassapput.
5) Qinnuteqaateqartoq sumiiffiup aalajangersimasup iluani tassunga ilutigitillugu aallakaatitsisinnaanermut akuersissummik tunineqarsimanngippat.
6) Qinnuteqaateqartup aningaasaqarniarnikkut tunngavia naammaginartuuppat.
7) Qinnuteqaateqartup aallakaatitsinissamut periarfissai naammaginartuuppata.
8) Aallakaatitat annertussutsimikkut imarisamikkullu isumaqarfigineqarpata kulturikkut paasissutissiinikkullu innuttaasunut annertuumik tunniussisinnaasut.

Radiofrekvensimik atuinissamut akuersissut Radioforvaltningimi qinnutigineqarsinnaavoq.

Qinnuteqarneq akeqanngilaq.

Aallakaatitsinissamut akuersissut pillugu qinnuteqarnermi immersuiffissaq uani nassaarisinnaavarsi.

Qinnuteqaat ilanngussaasinnaasullu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut nassiutissavasi.

Qaammatip ataatsip missaani qinnuteqaatissinnut akissutissarsi naatsorsuutigisinnaavarsi.

Qinnuteqaatip tunniunnissaanut piffissaliisoqarsimanngilaq.

Qinnuteqaammut aalajangiineq imaluunniit aallakaatitsinissamut akuersissutip atorunnaarsinneqarnera pillugu naalakkersuisoqarfiup aalajangiinera allaffissornermi pisortanut / oqartussanut allanut naammagittaalliutigisinnaanngilarsi, eqqartuussivimmulli ingerlateqqissinnaavarsi.