Tips- aamma lotto-mit aningaasaliissutit (pulje B)

Ukiut tamaasa Tipsernermiit Lottornermiillu imaluunniit eqqoriaasarnerniit allanit Danske Spil-ineersunit sinneqartoorutit tamanut iluaqutaasussamik siunertanut assigiinngitsunut tunniunneqartarput.

Aningaasat Danske Spil-ineersut Tipsernermiit Lottornermiillu aningaasanik taaneqartarput, inatsillu Aningaasanoorutit ilaannit iluanaarutinit agguaassisarneq pillugu Inatsisartut inatsisaat nr. 10, 22. november 2011-meersoq naapertorlugu puljenut pingasunut agguaanneqartarput, taakkununngalu ilaapput meeqqat inuussuttullu pillugit suliniaqatigiiffinnut pulje. Aningaasat taakku pulje B-tut taaneqartarput.

Pulje B-mi timersornerup iluani meeqqanut inuusuttunullu peqatigiiffiit ilanngunneqanngillat, taakkumi pulje A-mi timersornermut immikkut pulje-mi ilanngunneqarsimammata.

Aningaasat Pulje B-miittut Sorlak pillugu inatsit naapertorlugu agguaanneqartarput, Sorlaallu meeqqanut inuusuttunullu peqatigiiffinnut agguaasseqqinnissaq isumagisarpaa.

Naalakkersuisulli inatsimmi erseqqissarneqarlutik piumasarineqartut malillugit puljemiittunik agguaaqqinnissaq isumagisinnaavaat, taamatullu Naalakkersuisut iliorput. Taamaammat pulje B aqqutigalugu tapiissuteqartoqarnissaanut qinnuteqaatit naalakkersuisoqarfimmut pinnguaatit assigiinngitsut pillugit inatsimmik oqartussaaffittut akisussaasumut nassiunneqassapput. Matumanilu Ilinniartitaanermut, Kultureqarnermut Ilageeqarnermullu Naalakkersuisoqarfik pineqarpoq.


Nuna tamakkerlugu suliniaqatigiiffiit peqatigiiffiillu pulje B-mit tapiiffigineqarnissamik qinnuteqarsinnaapput.

Pulje B-mit tapiissuteqariaatsinit marlunnit qinnuteqartoqarsinnaavoq:

Pilersaarutinut tapiissutit ukunannga qinnuteqarfigineqarsinnaasut:

• Nuna tamakkerlugu suliniaqatigiiffiit peqatigiiffiillu.

Ingerlatsinermut tapiissutit ukunannga qinnuteqarfigineqarsinnaasut:

• Nuna tamakkerlugu suliniaqatigiiffiit peqatigiiffiillu sulisunut, ininut, allaffimmiunut, siulersuisut sulinerinut, paasititsiniaanernut assigisaannullu ingerlatsinermut tapiiffigineqarnissamik kissaateqartut. 

Ingerlatsinermut tapiissutit ilaatigut tunngaviusumik tapiissutitut ilaatigullu ilassutitut tapiissutitut tunniunneqartarput.

Tunngaviusumik tapiissutit ilaasortat amerlassusaat imaluunniit suliniaqatigiiffiit ilaasortaasa amerlassusaat imaluunniit najukkani peqatigiiffiit tunngavigalugit naatsorsorneqartarput.

Ilassutitut tapiissutit suliniaqatigiiffinnut peqatigiiffinnullu suliniaqatigiiffinnut najukkaniluunniit peqatigiiffinnut tallimat sinnerlugit ilaasortalinnut tunniunneqartarput, taakkualu amerlassusii tunngavigalugit naatsorsuisoqartarluni.

Aallaaviatigut makkununnga tapiissuteqartoqarneq ajorpoq:
1) Akiliutsilluni feeriarnernut, paasisassarsiorluni angalanernut, angalanernut pikkorissarnernullu sulisitsisumit akilerneqartussatut naatsorsuussaanut.
2) Sakkussanik/nipilersuutinik, hardware aamma sofwarenik, atortussanik, atortunik allanillu pisinissanut.
3) Præmianut, tassa pokalinut aningaasanngorlugulu præmianut imaluunniit suugaluartunut aningaasanik nalilinnut.
4) Illuutinut nutaanut aserfallatsaaliuinernullu.
5) Tunisassianut iluanaarutigisassanut
6) Sammisassanut qinnuteqarnerup nalaani aallartereersimasanut
7) Amigartoorutinut akiliussinernut.
8) Pisortani atorfillit peqataatinnerinut aningaasartuutit akilernissaannut

Malugiuk
Aaqqissuussinernut imaluunniit aaqqissuussinerit ilaannut immiaaqqanik, viinninik imaluunniit imigassanik sakkortuunik sassaallerfiusunut tapiissuteqartoqarsinnaanngilaq.

Pilersaarutinut tapiissutit:
• Pilersaarutinut tapiissutit qummut annertussusiligaanngillat.

Ingerlatsinermut tapissutit:
• Ingerlatsinermut tapiissutit ukiup siuliini naatsorsuutit kiisalu ukiumut tulliuttumut missingersuutit sammisassanullu pilersaarut tunngavigalugit tunniunneqartarput.

Pilersaarutinut qinnuteqartumut piumasaqaatit:
• Nuna tamakkerlugu suliniaqatigiiffiit peqatigiiffiillu Kalaallit Nunaanni najugalittut allassimassapput. Tamatumanili Avalak pineqanngilaq, taannami inatsimmi piumasarineqartunut ilaanngilaq.
• Ikinnerpaamik ilaasortaasut affaat 30-it ataallugit ukioqassapput.
• Nuna tamakkerlugu suliniaqatigiiffiit peqatigiiffiillu timersornermut attuumassuteqassanngillat. Imatullu paasisariaqarpoq: pineqartoq timersornermik pingaarnertut siunertaqaranilu sammisaqassanngilaq imaluunniit allatigut timersoqatigiiffittut kattuffimmut peqatigiiffimmulluunniit attuumassuteqaranilu tapersersuisuussanngilaq.
• Nuna tamakkerlugu suliniaqatigiiffiit peqatigiiffiillu killilimmik ilaasortaatitaqassapput peqataanermut sunniuteqarnissamut isumannaarneqarsimasunik.
• Nuna tamakkerlugu suliniaqatigiiffik peqatigiiffilluunniit nalilinnik sinneqartoorutinilluunniit inunnut ataasiakkaanut tunniusseqqusaanngilaq aammalu suleqatigiiffinnik peqatigiiffinnilluunniit ingerlatsinermut malittarisassanik nalinginnaasunik malinnissalluni, soorlu ileqqoreqqusanik akuersissutigineqartunik peqassaaq, siulersuisoqassaaq, ilaasortanik nalunaarsuissaaq ataatsimeersuartarlunilu.

Tapiissutinik qinnuteqartumut piumasaqaatit:
• Nuna tamakkerlugu suliniaqatigiiffiit peqatigiiffiillu nuna tamakkerlugu atuutissapput
• Nuna tamakkerlugu suliniaqatigiiffiit peqatigiiffiillu nammineq ingerlataassapput, tamannalu isumaqarpoq suliniaqatigiiffinnut peqatigiiffinnullu allanut naalakkersuinikkut aningaasaqarnikkullu attuumassuteqassanngitsut
• Nuna tamakkerlugu suliniaqatigiiffiit peqatigiiffiillu inuiaqatigiinni atituumik siunertaqassapput
• Peqatigiiffiit ilaasortaqarnermut akiliuteqartartunik tallimanik sinnerlugilluunniit ilaasortaqassapput.
• Nuna tamakkerlugu suliniaqatigiiffiit peqatigiiffiillu ilaasortaanermut akiliuteqartoqartarneranut akiliisimanernut uppernarsaat imaluunniit giro kontuluunniit aqqutigalugit uppernarsaasinnaasariaqarput.
• Nuna tamakkerlugu suliniaqatigiiffiit kommunini assigiinngitsuni minnerpaamik marlunnik ilaasortatut immikkoortoqassapput.

Suliniaqatigiiffik ilaasortaqarfiusoq imaluunniit najukkami peqatigiiffiup ilaasortaat kommunimi suliniaqatigiiffiup ilaasortaqarfiusup imaluunniit najukkami peqatigiiffiup angerlarsimaffigisaani aalajangersimasumik najugaqartussaapput.

Nuna tamakkerlugu suliniaqatigiiffik peqatigiiffilluunniit ilaasortanut kattuffeqanngitsoq imaluunniit najukkami peqatigiiffeqanngitsoq kommunini ikinnerpaamik pingasuni 15-inik tamakkiisumik ilaasortaqassaaq.

Piumasaqaatit allat:
• Pilersaarutit ataasiakkaarlugit qinnuteqarfigineqassapput, taakkununngalu tapiissutit pillugit qinnuteqartoqassaaq.
• Missingersuut ilanngullugu nassiunneqassaaq
• Sammineqartussap aningaasalersornissaanut pilersaarut ilanngullugu nassiunneqassaaq
• Ileqqoreqqusat akuersissutigineqarnikut
• Ilaasortanut akiliuteqartartunut uppernarsaatissat
• Ukiumoortumik naatsorsuutit kingulliit

Pulje B aqqutigalugu pilersaarummut ingerlatsinermulluunniit tapiissutinik qinnuteqarniaruit/-russi qinnuteqarnissamut immersugassaq immersorneqassaaaq.

Pilersaarummut tapiissutit pulje B (word-inngorlugu)
Pilersaarummut tapiissutit pulje B (pdf-filinngorlugu)

Pulje B Nuna tamakkerlugu suliniaqatigiiffinnut peqatigiiffinnullu ingerlatsinermut tapiissutit

Qinnuteqarnissamut immersugassamut missingersuut immersugassaq (excel-inngorlugu)
Qinnuteqarnissamut immersugassamut missingersuut immersugassaq (pdf-fil-inngorlugu)

Qinnuteqaat Ilinniartitaanermut, Kultureqarnermut Ilageeqqarnermullu Naalakkersuisoqarfimmut nassiunneqassaaq.

Qinnuteqaativit minnerpaamik sapaatit akunneri pingasut atorlugit suliarineqartariaqarnissaa naatsorsuutigissavat. Taamaattumik qinnuteqaatinnut tunngatillugu apeqquteqarfigineqarnissat naatsorsuutigissavat aammalu aningaasanik atuinissaq eqqarsaatigalugu qinnuteqaativit piffissaagallartillugu nassiunnissaa isumagissavat.

Qinnuteqaammut tunngatillugu apeqqutissaqassaguit Ilinniartitaanermut, Kultureqarnermut Ilageeqqarnermullu Naalakkersuisoqarfimmut saaffiginnissinnaavutit.

Tapiissutit akuerineqartut tapiissuteqarnissamut qinnuteqaammiittut saniatigut siunertanut sammisassanullu allanut atorneqaqqusaanngillat. Pilersaarummut tapiissutinik tunineqarsimaguit, kinguneratigullu pilersaarummi allanngortoqarpat Ilinniartitaanermut, Kultureqarnermut, Ilageeqqarnermullu Naalakkersuisoqarfimmut saaffiginnissaatit.

Pilersaarutinut tapiissutit:
• Piffissami marsip 15-ianiit oktobarip 14-ianut pilersaarutinut kingusinnerpaamik februaarip 15-iani qinnuteqartoqassaaq.
• Piffissami oktobarip 15-ianiit marts-ip 14-ianut pilersaarutinut kingusinnerpaamik septembarip 15-iani qinnuteqartoqassaaq.

Maluginiaruk: Qinnuteqaatit qinnuteqarnermi ullorititap kingorna nassiunneqartut nalilersuinermi ilaatinneqassanngillat.

Ingerlatsinermut tapiissutit:
• Ingerlatsinermut tapiissutinut ulloq qinnuteqarfissaq kingulleq ukiut tamaasa decembarip aallaqqaataasarpoq.

Naalakkersuisoqarfiup tapiissutit pillugit aalajangiinera aqutsinikkut oqartussaasunut allanut naammagittaaliuutigineqarsinnaanngilaq. Suliap suliarineranut atatillugu isumaqaruit naalakkersuisoqarfimmi kukkusoqarsimassasoq suliap sullinneqaqqinnissaa pillugu naalakkersuisoqarfimmut qinnuiginnissinnaavutit (suliaq suliareqqillugu).
Emailimut uunga saaffiginnissinnaavutit: ikin@nanoq.gl imaluunniit allakkatigut uunga saaffiginnillutit: Ilinniartitaanermut, Kultureqarnermut, Ilageeqarnermullu Naalakkersuisoqarfik , Postboks 1029, 3900 Nuuk.

Naalakkersuisoqarfiup aalajangigaa eqqartuussivinnut aamma suliassanngortinneqarsinnaavoq.