Anartarfiit imaarneqartarnissaannik imaarneqartarunnaarnissaannillu nalunaarneq

Anartarfilerineq tassaavoq pisortat aaqqissuutamik ingerlataasa ilaat, Eqqagassalerinermut ilaasoq. Eqqagassalerineq tassaalluni eqqagassaatitsinnik qanoq isumaginnittarnersugut, tassa pinngortitap eriaginissaa inoqatittalu peqqissuunissaat eqqarsaatigalugit.

Anartarfilerineq tassaavoq, anartarfiit imikullu suugaluilluunniit anartarfinneersut iginneqartarnerat.

Kikkulluunniit aaqqissuussaasumik anartarfeqarnermik peqataasut anartarfiisa imaarneqartarnissaat kommunip akisussaaffigivaa, illilli akisussaaffigivat aaqqissuussaasumik anartarfeqarnissat nalunaarutigissallugu imaarneqartarunnaarnissaanilluunniit nalunaartussaaneq.

Kuutsittagaanngitsumik anartarfeqaruit aaqqissuussaasumillu anartarfilerinikkut ilaarusullutit, anartarfik atugassat kommunimit akuerisaassaaq. Illit nammineq taamaattumik anartarfeqarnissat akisussaaffigissavat. Aammattaaq illit illumik piginnittutut attartortutul­luunniit, anartarfimmik anitsisussat anitsiartornerminni isersinnaanissaat akisussaaffigissagit.

Anartarfiit puuinut igitassanik allanik igitsisoqassanngilaq.

Kuutsittagaanngitsumik anartarfinnut igitsinerit tamaasa nutaamik puuliisoqartassaaq.

Illit kommunerisanniit akiligassannik nassinneqartassaatit.

Imaarneqartarnissaannik imaarneqartarunnaarnissaannillu nalunaarneq allannguinerlu
Anartarfiit imaarneqartarnissaannik imaarneqartarunnaarnissaannilluunniit nalunaarutiginiarukku imaluunniit allannguisitsiniaruit assersuutigalugu imaarsititsisarnerit amerlassusaannik immersugassaq immersussavat.

MitID-mik peqaruit, immersugassaq toqqaannartumik attaveqaatitigoortumik immersorsinnaavat nassiullugulu.

MitID-mik peqanngikkuit, immersukkat sumiiffinni innuttaasunut sullissivimmut imaluunniit nunaqarfiup allaffianut tunniutissavat.