Imarsiornerup isumannaatsuunissaa – Siunnersuutit aamma piumasaqaatit

Imaaniitilluni ikiortissaq assut ungasittarpoq. Taamaattumik tamatigut akisussaassuseqartumik imarsiortassaatit. Tamanna isumaqarpoq ajutoornerit pinngitsoorniarlugit sapinngisamik iliuuseqartassasutit, taamaakkaluartorli ajutoorneq pissagaluarpat qanoq iliuuseqarnissat peqatigisaanik piareersimaffigilluartariaqarit.

Ajutoornerit pinngitsoorumallugit taakkulu qanoq ilisamik pineranni annertussusaat annikinnerpaatikkumallugit, imaaliortariaqarputit:

• Umiatsiat motoorialu paarilluartariaqarpatit
• Sillimaniarnermut atortunik nassataqartariaqarputit
• Nalunneq ilinniartariaqarpat
• Aallartinnak sila misissortariaqarpat
• Tamatigut sumunnalernerlutit ilisimatitsissutigisassavat
• Atisanik oqortunik nassarnissat eqqaamasassavat
• Imarsiorneq ilinniartariaqarpat
• Umiatsiap iluani aalaninni mianersortassaatit
• Umiatsiaq kinngussagaluarpat tamatigut eqqaaniittassaatit
• Imigassartorsimatillutit umiatsiamik aallanngisaannarit

Imigassartorsimallutit umiatsiamik aallaruit tamatumani assigiinnarpaa biilinik akisussaassuseqanngitsumik ulorianartumillu ingerlatitsineq. Imigassartorsimallutit akornusiiguit, pinerluttulerinermi inatsimmut naapertuuttumik pineqaatissinneqassaatit. Tassa imaappoq ajoqusiinerit qanoq annertutiginersoq aallaaviulluni, akiliisitaaneq aamma piaarinani inummik toqutsisutut eqqartuunneqarnermik pineqaatissiisoqarsinnaavoq.

Ajutoornerit pinngitsoorumallugit, taakkulu qanoq ilisamik pineranni annertussusaat annikinnerpaatikkumallugit, makku aamma nassatarisassavatit:

• VHF
• GPS
• Immap assinga
• Ajutuulernermi qummoroortaatit, ikumatittakkat, pujuliortittakkat aamma tarrarsuut
• Qallut imaluunniit imaarsaat
• Atisat attallaat puttaqutit qaamanermut akisuttartullit
• Qallersaat folie-mik sanaaq atisallu oqortut
• Iputit
• Tissukarnaveeqqutit, kitsat allunaasallu
• Issimasunut tamanut annanniutit aaqanngitsut

Umiatsianni ilaasunut tamanut annanniutinik aaqanngitsunik peqarnissannut pisussaaffeqarputit. Taakku piginngikkukkit akiliisitaasinnaavutit.

Malugiuk
Akisussaassuseqanngitsumik imarsiorneq pineqaatissiivigineqarsinnaavoq.

Umiatsiamik angalanermi maleruagassat aamma atortut suut pigineqassanersut pillugit Danmarkimi Søfartsstyrelsen-ip nittartagaani annertunerusunik paasisaqarsinnaavutit.