Aallarneq angerlarnerlu

Angalanerit angajoqqaanit aaqqissuussaasut
Ilissi angajoqqaatut atuartup angalanissaa aaqqissuussinnaavarsi, angalanerup angajoqqaanit aaqqissugaasumik taaneqartarpoq. Tamatumalu nassataanik ilissi nammineerlusi:

• Danmarkimut atuartup billetsissaa inniminnissavarsi akilerlugulu
• Tikinnermi atuartup aaneqarnissaa isumagalugu
• Atuartup efterskolimut apuunnissaa isumagalugu

Angalanermut aningaasartuutisi timmisartumut billetsit akikinnerpaat nalingisa annertoqutaat utertissinnaavarsi, taanna aamma taaneqartartoq billetsi allanngortinneqarsinnaanngitsoq. Aningaasartuutit utertinniarussigit atuartup angalaneranut akiliutip uppernarsaataa Ilinniartitaanermut Aqutsisoqarfik Efterskolelerisunut nassiutissavarsi, ilanngullugu atuartup inuuiata normua aamma bankimi konto normu utertitsivissatut atorneqartussaq paasissutissiissutigalugit.

Billetsinut akiliutinik utertitsiniarneq

Angalanerit Naalakkersuisoqarfimmit aaqqissuussaasut
Angalanerit Naalakkersuisoqarfimmit aaqqissuussaappata, nassataanik imaattoqassaaq:

• Danmarkimut billetsi Naalakkersuisoqarfimmit inniminnerneqarlunilu akilerneqassaaq, atuartoq Kalaallit Nunaanni suminngaanneeraluarpalluunniit
• Angalanerup aqqutaani unnuiffiusariaqartut nerisassallu aningaasartuutaaneri Naalakkersuisoqarfimmit akilerneqassapput

 

Kastrup mittarfiani niuffiorneqarneq
Angalaneq Naalakkersuisoqarfimmit aaqqissuussaatillugu, atuartut ataatsikkut amerlasuujutillugit angalatinneqartarput, atuarnerullu aallartinnissaanut ullut marluk sioqqullugit Kalaallit Nunaanniit aallartinneqartarlutik. Tamatuma saniatigut Kastrup-imut tikikkunik kalaallit illuanni sulisunit niuffiorneqartarput.

Ilaqutariinnik attaveqaataasunik suleqateqarneq
Atuartup efterskolimut apuunnissaa ilaqutariit attaveqaataasussaniit isumagineqartarpoq.

Kalaallit Illuisa ilaqutariit attaveqaataasartut isumaqatigiissuteqarfigisarpaat, ilaqutariit attaveqaataasartut namminneq Kastrupimi mittarfimmut atuartoq aaniarneraat imaluunniit naapiffissatut isumaqatigiissutigineqartumi allami aaniarneraat.

Ilissi akisussaasuussaasi
Atuartup atuariartortut allat angalaqatigigaluarai, atuartup aqqutit eqqortut atorlugit mittarfimmut qaninnerpaamut apuunnissaanut ilissi angajoqqaatut akisussaaffigaarsi.

Atuartoq kisimiilluni angalassappat, atuartup Kastrup-ip tungaanut aqqutit eqqortut atorlugit angalanissaa ilissi aamma angajoqqaatut akisussaaffigaarsi.

Atuartut nunaqarfimmeersut
Aallaaviatigut Naalakkersuisoqarfimmit nunaqarfimmiit illoqarfimmut angalanissamut billetsi inniminnerneqartarpoq, ilissili angajoqqaatut angalanissaq nammineq isumaginiarussiuk, angallatit oqartussanit akuerineqartut aqqutigalugit ingerlasimagussi aatsaat tassunga aningaasartuutaasimasut utertinneqarsinnaapput.

 

Angerlamut angalaneq kalaallit illuanni sulisumit efterskolimut attaveqartumit aaqqissuunneqassaaq.

Ilissi aamma nammineq tamanna aaqqissuussinnaavarsi, aallarnermisulli maleruagassat malillugit billetsinut aningaasartuutit utertissinnaallusigit.

Kissaatit immikkut ittut
Angerlamut angalanermut atatillugu immikkut ittunik kissaateqassagussi, immersuiffissaq ”Angerlarnermut qinnuteqaat” immersussavarsi, taannalu kalaallit illuannut atuartup attaveqartarfianut nassiullugu. Atuarunnaarnissaq qaammatit tallimat sioqqullugu immikkut kissaatisi nalunaarutigissavasi.

Immersuiffissaq 'Angerlarnermut qinnuteqaat' aajuk

Billetsit angajoqqaat e-mail-iinut kommunimilu sulisumut efterskolinut tunngasunik suliaqartumut nassiunneqassapput.

Kissaatisi allanngortissinnaavasi
Billetsip atulersinneqarnissaata tungaanut kissaatisi allanngortissinnaavasi. Billetsip atuutilersinneqarnerata kingorna allannguuteqarnermi aningaasartuutaanerusoqassappat, ilissi nammineerlusi taakku akilissavasi. Angalanermut kissaatini allannguuteqartitsissagussi Ilinniartitaanermut Aqutsisoqarfik efterskolelerisunut attaveqassaasi.

Angerlamut angalaneq
Atuartup angerlarluni angalanissaanut immikkut kissaateqassagussi, atuarunnaarnissamut qaammatit tallimat sioqqullugit kalaallit illuannut nalunaaruteqassaasi, aammalu atuartoq ilaqutariit attaveqaataasuni atuarfiup naaneranit angerlamut aallarnissap tungaanut najugaqarsinnaanersoq ilanngullugu nalunaarutigalugu.