Inissiisarfimmi nakkutiliisoq

Kalaallit Nunaanni Pinerluuteqarsimasunik Isumaginnittoqarfik

Kalaallit Nunaanni Pinerluuteqarsimasunik Isumaginnittoqarfiup eqqartuussut malillugu iliuuseqassalluni pingaarnertut suliassaraa. Suliassaq pingaarnerpaaq marluinngorlugu assigiimmik pingaarutilinnik suliassartaqarpoq. Taassuma affaa tassaavoq nakkutiginninneq isumannaatsuutitsinerlu kiisalu suliassap aappaa tassaavoq inissiisarfimmiittunik allanillu sullitanik pinerluffiunngitsumik inuuneqalernissaanik misilillugit ikiussallugit. Suliassaq naammassiniarlugu ikioqatigiittarpugut aamma suliassap suliarineqarnissaanut kikkut tamarmik pingaaruteqarput.

Pineqartut tassaapput inuit

Pinerluuteqarsimasunik Isumaginnittoqarfiup eqqartuussutit aqutassai tassaapput soorlu inissiisarfiit pillugit imaqartut, inuiqattigiinni sulisitaanerit taavalu nakkutilliinerit. Inissiisarfimmi betjentitut inissiisarfimmi inissinneqarsimasut sullitassaraatit. Pinerluuteqarsimasunik Isumaginnittoqarfimmi sulisut sinneri allat peqatigalugit inuiaqatigiinni pinerluttarnerit killilersimaarnissaannut suleqataassaatit.

Suleqatitit uniformillit uniformeqanngitsullu tamaasa suleqatissaraatit. Suleqatit uniform-eqanngitsut tassaasinnaapput inunnik isumaginninnermik siunnersortit, ilinniartitsisut, katsorsaasut aamma susassaqartitsisut. Inuiaqatigiit iluanni sulisuusut allat peqatigalugit soorlu politiit eqqartuussiviillu kiisalu suleqatitit ilittulli suliassallit peqatigalugit suliassaraat pillaatisiap atuutinneqarnissaa peqatigitillugulu inissiisarfimmiittup inuunermut pinerluffiunngitsumut kajumilersinniarnissaa. Inuiaqatigiiit inuuffigisatta katititigaaneratulli ippugut taamaattumik aamma Pinerluuteqarsimasunik Isumaginnittoqarfimmi sulisut assigiinngitsorpassuarnik tunuliaqutaqartuupput. Tulluussimaarutigaarput suliffik assigiinngisitaartoqarfiusinnaammat.


Suliffik pissanganartoq aamma allanngorartoq

Inissiisarfimmi betjentitut allatulli inuuvutit peqatigitillugulu oqartussaassusilik/pisortat sinnerlugit sulisoq. Ulluinnarni akisussaallutit isumagisassaraat immikkoortortami suliffigisanni eqqissisimanissaq torsersuunissarlu. Inissiisarfimmiittunut qanoq pisinnaanermik maleruaqqusat killigititaasut malillugit killiliisassaatit. Inissiisarfimmiittut akornanni isumaqatigiinnginnerit pisut aquttussaavatit kiisalu inissiisarfimmiittut sulisullu akornanni aamma taamatut. Misissuissaatit nakkutilliillutillu. Saniatigullu aamma pingaaruteqarpoq inissiisarfimmiittumik pillaatisiaminik atuinera pillugu oqaloqateqartarnissaq siunissami sunik kissaateqarnersoq/takorluugaqarnersoq ilanngullugit.

Inissiisarfimmi inuuneq avataani inuunermut assingusorpassuaqarpoq. Ingerlanneqartartut tassaasinnaapput nerisassiorneq, suliffik, atuarneq, eqqiaaneq sunngiffeqarnerlu. Akisussaaffigaat inissiisarfimmiittup ulluinnarni inuunera toqqissisimasuussasoq, isumannaatsuulluni siumullu nalunanngitsuussalluni.


Asissuinngitsumik aamma inuppalaartumik isummertartoq

Inissiisarfimmiittut pillaatisiaminnik atuinerinut atatillugu suliassartaanik suliaqartassaatit. Immikkoortortami suliffigisanni inissiisarfimmiittunut arlalinnut inuttut attaveqaataassaatit illit immikkut ittumik akisussaassuseqarfigisassannut. Oqaloqatigiinnermi inissiisarfimmittut sunik periarfissaqarnersut aamma sunik pisinnaatitaaffeqarnri pillugit ilitsersuuttassavatit. Inissiisarfimmi pisortat suleqatigalugit aalajangigassanik saqqummiisassaatit soorlu anisinnaanermut aamma misiligummik iperagaanissamut tunngassutilinnik.

Inissiisarfimmiitunut ilakkuminartumik inuttullu qanoq ittuunerannut ataqqinnittumik pissuseqassaatit aamma nammineerlutik pigisaat ilanngullugit. Misiginneqataasinaassuseqassaatit iliuutsitillu oqaasertalersinnaassallugit. Suleqatinnut aamma malittarisassanut inatsisinullu suliannut atuuttunut tatiginartuussaatit.

Ineriartornissamut angusaqarnissamullu periarfissaqarneq

Inissiisarfimmi betjentitut sulininni ineriartornissannut immikkullu ittumik ukkataqaleriartornissamut periarfissaqarputit. Ilinniarnerit naammassigukku immikkut ittumik ilinniagaqaqqinnissannut periarfissaqarputit. Soorlu assersuutigalugu, eqimattami aqutsisutut, suliap naammassinissaanut siuttoq (indsatsleder), suliassani meeqqanut tunngasuni akisussaalluni suliaqartoq imaluunniit akerleriittoqartillugu aaqqiiissuteqarniarluni aqutsinissamut ilitsersuisoq. Aamma pisortatut qaffassinnaavutit.

Ilinniagaq
Ilinniartuujutigalutit ”misiligummik tjenestemanditut” atorfeqarputit. Ilinniarnerup aallarnisarnerani tassa misiliilluni sulinerup siulliup nalaani ulluni siullerni/sapaatit akunnerini atorfiit pigineqareersut avataanni inissisimassaatit suliassanillu assigiinngitsunik il.il. nassuiaanneqarlutit ingerlassaatit. Taamaattoqareerpat atorfiit akuerineqareersimasut akornanniilissaatit taakkunatulli suliassat amerlanersaat betjentit allat assigalugit suliarilissallugit – kisianni ilinniartuunermi piumasaasut mianeralugit.Ilinniartuuninni suliassat suut illit peqataaffigisassagitit pillugit malittarisassaqarpoq, suut pisariaqartinneritit apeqqutaatillugu. Iliniartuuneq naammassisimagaanni angusisimallunilu taava kingornagut inissiisarfimmi betjentitut atorfinitsitaanissat qularissanngilat.

Ilinniarnerup imarisai

Atuagarsorluni ilinniarneq Nuummi ingerlanneqartarpoq tassani ilaatigut atuartitsissutigineqassallutik:

Isumannaatsuunissamut tunngasut sammineqarlutik, makku ilanngullugit:

 Akerleriissuteqartoqartillugu aqutsineq, imminut illersorneq aamma pissaanermik atuineq
 Pissaanermik aamma navianaallisaanermik periaatsit/aqqutit.
 Allakkatigut nalunaarsuineq/uppernarsaaneq
 Ikiueqqaarneq

Pinerluuteqarsimasunik Isumaginnittoqarfiup suliassaannut tunngasut, makku ilanngullugit:

 Inissiisarfimmi suliassanik suliaqarneq
 Pisortaqarfittut suliassanik piginnaatinneqarluni suliarinninneq
 Inissiisarfimmiittunut tunngasunik suliassanik piviusunik suliaqarneq
 Pisinnaatitaaffiit aamma pisussaaffiit

Inuiqatigiinnut tunngassuteqartunik sulineq, makku ilanngullugit:

 Pinerluuteqarsimasunik Isumaginnittoqarfiup inuiaqatigiinni inissisimanera
 Oqartusaasunik/pisortanik allanik suleqateqarneq
 Atornerluineq aamma katsorsarneqarnissamut periarfissat
 Pinerluttarnermut pissutaasut

Piffissat suliamik misiliiffissat
Ilinniartuunerup ingerlanerani pingasoriarluni ilinniartuulluni sulisarnissat ilaapput, illit

1. Ilinniartuuninni inissiisarfimmut aalajangersimasumut attaveqassaatit tassanilu praktikkerninni siunnersorteqassaatit taassumalu inissiisarfimmi pisortaq peqatigalugu teoriimi modulini ilinniarsimasatit sungiusassavatit assigiinngitsunik suliassinneqartarlutit taamaalilutillu inissiisarfimi betjentitut sulinermi piumasaasut ilikkarlugit.

2. Inissiisarfimmi illoqarfimmi allamiittumi ilinniartutut suliartortassaatit

3. Pinerluuteqarsimasunik Isumaginnittoqarfimmi Ammasumi (KIF) sulissaatit

Atuarfimmiittarneq ilinniartutullu sulineq nunami illoqarfinni assigiinngitsuni pisinnaammata piareersimaffigissavat piffissap ilaatigut ilinniarninnut atatillugu ilaquttat qimassimasariaqartassammata.

 21-nik ukioqalereersimassasutit
 Minnerpaamik meeqqat atuarfianni soraarummeernertalimmik naammassinnissimassasutit

Saniatigut naatsorsuutigaarput:

 Marluinnik oqaaseqassasutit imaluunniit qallunaatut/kalaallisut pikkorissarnissannut kajumissuseqassasutit
 Inuup ineriartorsinnaaneranik soqutiginnittuussasutit
 Tarnikkut nukittuujusutit
 Eqqissisimasoq aamma akerleriittoqartillugu aalajaatsumik periaasilik
 Holdikkuutaartuni peqataasinnaasoq/suleqataasinnaasoq

Inissiisarfimmi betjentinngorniarlutit qinnuteqaruit pinerluuteqarsimasunik nalunaarsuiffimmi misissorneqassaatit. Pinerluuteqarsimasunik Isumaginnittoqarfimmi inunnik sakkortuumik pinerluuteqarsimallutik eqqartuunneqarsimasunik tigusaqarneq ajorput. Qinnuteqaatinut tamanut atatillugu taamaattoq tamatigut piviusumik naliliisoqartarpoq pissutsit misissorneqarlutik.

Atugassarititaasut
Illoqarfimmi allami atorfinissaguit angalanissat akilerneqassaaq. Atorfimmut atatillugu inissaqartitsisoqassaaq.
Misiligummik tjenestemanditut atorfinitsinneqassaatit. Ilinniarnerit naammassigukku tejenestemanditut atorfeqalissaatit soraarnerussutisiaqarsinnaallutit.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Qinnuteqaateqarniaruit
Skema imersugassaq aalajangersimasoq immersussavat. Skema downloadersinnaavat krfo@krfo.gl – mullu nassiullugu. Qinnuteqaatit akuerineqarpat misilitsinnissannut apersorneqarnissannullu aggersarneqassaatit. Misilitsininni akisinnaassuseqarnerit qajannaatsuunerillu aamma inissiisarfimmi betjentinngorniarnernut sunik tunngavilersuisinnaanersutit pillugit oqaloqatigissavatsigit. Misilitsinnginnerni ilitsersorneqarumaarputit.

Uani skema qinnuteqarfissaq downloaderuk: Ansøgningsskema
Word-inngorlugu; Kriminalforsorgen ansøgning word

 

Qinnuteqaatitit Kalaallit Nunaanni Pinerluttunik isumaginnittoqarfimmiit suliarineqartussaapput, ingerlaavartumik akissutisisarumaarputit. Ilinniarnerup aallartinnissaanut sapaatip akunneri pingasut inulersimappagit illillu suli akissutisinak, ilinniarfimmut saaffiginnittariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq

Neqeroortoq
Pinerluttunik isumaginnittoqarfik

Aningaasaqarneq
Ilinniartuuninni tjenestemanditut misiligummik atorfinitsitatut atorfinissaatit aamma suliffinnut atatillugu malittarisassat atuuttut malillugit inissaqartinneqassaatit.
Atorfininnermut atatillugu illoqarfimmi allami atorfinissaguit angalanissaq kiisalu pigisanik nuussineq malittarisassat sukkulluunniit atuuttut malillugit akilerneqassapput.
Ilinniarnerit naammassigukku tjenestemanditut soraarnerussutisiaqarsinnaallutillu atorfinitsinneqassaatit. Atorfininnerup aallaqqaataani ullukkut unnuakkullu nikittaartunik piffissani suleqqaassaatit sapaatip akunnerata ingerlanerani piffissani assigiinngitsuni pigaartuusarlutit. Ullaap-tungaatigut, ualikkut unnuakkullu pigaartuusarnerit ilanngullugit. Suliffiit arlallit ulloq unnuarlu tamaat suliffiupput.
Piffissat suliffigisartagassavit affai ualikkoorfiullutik, unnukkoorfiullutik unnuarsiorfiullutillu suliffiupput.

Inissiisarfimmi betjentitut ilinniartuunerup nalaani akissarsianut assersuut:

 Ilinniartuunermi grundlønni: 17.710 kr qaammammut
 Naligiissaarinermut tapeq: 4.123 kr qaammammut
 Piffissani nikerartuni suliffeqartarnermut tapeq: 2.500 kr missaa qaammammut
 Qaammammut katillugit missigissavaa: 24.333 kr.

Ukiuni pingasuni inissiisarfimmi betjentitut sulereerluni akissarsianut assersuut:

 Inissiisarfimmi betjentimut ukiuni pingasuni sulereersimasup grundlønneraa: 19.346 kr qaammammut
 Naligiissaarinermut tapeq: 7.417 kr qaammammut
 Piffissani nikerartuni suliffeqartarnermut tapeq: 2.500 kr missaa qaammammut
 Katillugit: 29.263 kr missai qaammammut

Saniatigut inuutissarsiummik allamik ilinniagaqarsimanermut uppernarsaateqaruit tapinik pissarsisoqarsinnaavoq feeriap nalaani, napparsimanermi qitornartaarnermilu akissarsiat allanngussanngillat kiisalu soraarnerussutisiaqarnissamut katersisoqassaaq.

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.
Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 3 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit. Ingerlaqqiffiusumik inersimasunik ilinniartitaanermi piginaasat qaffasissusaat

Siunissami periarfissat / Suliffiusinnaasut
Inissiisarfimmi betjentitut sulininni ineriartornissannut immikkullu ittumik ukkataqaleriartornissamut periarfissaqarputit. Ilinniarnerit naammassigukku immikkut ittumik ilinniagaqaqqinnissannut periarfissaqarputit. Soorlu assersuutigalugu, eqimattami naalakkatut, suliap naammassinissaanut siuttoq (indsatsleder), suliassani meeqqanut tunngasuni akisussaalluni suliaqartoq imaluunniit akerleriittoqartillugu aqutsinissamut ilitsersuisoq. Aamma pisortanngorniarlutit qaffassarsinnaavutit.

Ilinniarnermik aaqqissuussineq
Uani atuagaaraq aasinnaavat:
https://kriminalforsorgen.gl/gr/job-uddannelse-2/om-arbejdet/

Suliap suliarineqarneranut imaluunniit allat pillugit naammagittaalliutissaqaruit krfo@krfo.gl attaveqarfigissavat.