Sanaartornermi maskiinanik ingerlatitsisoq aamma Qaarusummi sulisoq

Aqqusinniorlutit, umiarsualiviliorlutit imaluunniit mittarfiliorlutit sanaartornermi maskiinarsuarnik ingerlatitsisuullutit imminut takorloorsinnaavit? Aatsitassatigut pisuussutinik piiaanermi Kalaallit Nunaata siunissaanik pilersitseqataanissat anersaaqarfigaajuk? Taamaappat, taava ilinniagaq Sanaartornermi Maskiinanik ingerlatitsisoq aamma Qaarusummi sulisoq toqqagassaraat.

Ilinniarnerup ilaatigut imarai:

• Sanaartornermi maskiinat assigiinngitsut atornissaannut aserfallatsaalinissaannullu ilisimasaqarneq
• Kalaallit Nunaanni sanaartornermi pissutsinik ilinniarneq
• Sanaartornermi teknikkip iluani soorlu sanaartorfigiuminarsaaneq, aqqusinniorneq aamma tulattarfiliorneq/sapusiorneq pillugu atuagarsorneq aamma misilittaaneq
• Piiaaffinni nutaani misissueqqissaarneq
• Qaarsumi qillerineq aamma qaarsumik qaartiterineq
• Kalaallit Nunaanni saffiugassanik misissugassanik tigusinermi periaatsit
• Aatsitassarsiorfinni ammasuni sanaartornermi maskiinanik atuineq

Ilinniarneq

Ilinniarneq Aatsitassalerinermik Ilinniarfimmi ukiuni marlunni ingerlanneqartarpoq, tamatuma kingorna sungiusaatigalugu suliffimmi sulineq ukiuni marlunni. Naggaserneqartarpoq ”Svendinngornissamut innersuussinermik”, tamatuma kingorna soraarummeertoqartarpoq, angusigaannilu svenditut allagartaq uppernarsaat tunniunneqartarpoq.

Ilinniartut Aatsitassalerinermik Ilinniarfimmi ukiuni marlunni ilinniartarput. Semesteri siulleq tunngaviusumik ilinniarneruvoq, tassani sanaartornermi aatsitassarsiornermilu sulinermi pissutsit ilinniassavatit. Tunngaviusumik ilinniarneq angusiffigineqassaaq tuluttut, qallunaatut aamma matematikkimi soraarummeernermi karakteeri minnerpaaq “D” angugaanni kiisalu faagini naleqquttuni misilitsinnerni angusisimaneq.

Semesterini 2, 3 aamma 4 atuagarsorneruvoq aamma suliap naammassinissaanut misilittagaqalissaatit. Oqaatsitigut matematikkimilu piginnaasatit allisarnissaanut ingerlateqqissavat.

Semester 4 naggaserneqassaaq tuluttut, qallunaatut aamma matematikkimi soraarummeernermik, kiisalu suliamik aamma sanaartornermik pilersaarusiornermi projektiliorluni agguaqatigiissillugu karakteereqarluni “D”-mik. Qaartiterisartut pisortaatut pikkorissarneq tunngaviusoq angusiffigereerpat, aamma maskiinanut assigiinngitsunut akuerisanut atornissaannut piginnaasaqarnermut uppernarsaat pissarsiarereerpat.

Maanna sungiusaatigalugu sulinissamut piareerputit.

Sungiusaatigalugu sulineq

Semesterip 4-p ingerlanerani sungiusaatigalugu sulinissannut periarfissat misissornissaannut qinnuteqarnissamullu periarfissaqassaatit. Ilinniartitaanerup nalaani sungiusaatigalugu sulinerup anguniagai ersaripput, immaqali anguniakkanniippoq illoqarfimmi sumi sulerusunnerlutit imaluunniit aatsitassarsiorfik sorleq ilinnut soqutiginarnerpaanersoq. Kalaallit Nunaanni sungiusaatigalugu suliffissarpassuaqarpoq. Pingaaruteqartorujussuuvoq semesterip sisamaat naammassissagit ilinniartuunissamut atsiueqatigiilluni isumaqatigiissuteqarlutit.

Qaammatit 24-t sungiusaatigalugu sulereernermi mesterivit svendinngussalluni misilitsinnissamut innersuutissavaatit.

Akuerineqarnissamut piumasaqaatit

• Meeqqat Atuarfianni inaarutaasumik misilitsinnermi tuluttut, qallunaatut aamma matematikkimi angusisimanissat – pitsaaneruvoq faagini taakkunani karakteerigissaarneq.
• Ilinniarneq aallartinnginnerani 16-inik ukioqalereersimassaatit.
• Kørekorteqanngikkuit ilinniarfiup neqeroorutigaa sungiusaatigalugu sulineq aallartinnginnerani pissarsiarinissaanut periarfissinneqarnissat.
• Qasujaatsuussaatit.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq 

Neqeroortoq 
KTI Sisimiut 

Aningaasaqarneq
Sullissivik aqqutigalugu ilinniarnersianik ilinniarninni qinnuteqarsinnavutit

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.

Siunissami periarfissat/ Suliffiusinnaasut
Aatsitassalerinerup iluani sulisinnaassaatit 
Ilinniakkavit ilinniaqqinissannut ilinniagassanut qaffasinnerusunut periarfissiissaaq

Ilinniarnermik aaqqissuussineq
https://www.kti.gl/da/uddannelser/raastof/maskinentrprenoer-og-minesvend-uddannelseforloeb

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.