AFIS-operatørinngorit

AFIS-Operatøri:

• Timmisartortartup isumannaatsumik pitsaanerpaamillu timmisartuussinerminik suliaqarnerminut atugassaanik paasissutissanik pilersuisuuvoq.
• Mittarfimmi anoreqarneq silamilu pissutsit pillugit timmisartortartunut ikiorsiisarpoq, kiisalu mittarfimmi miffigisassami pissutsit pillugit paasissutissiisarpoq. Sumiiffimmi silaannakkut angallannerit allat pillugit timmisartortartumut operatøri ilisimatitsisarpoq.
• AFIS-ip napasuliaani atuuffinnik suliarinnittuuvoq.
• Silasiortarpoq, timmisartornissamut pilersaarutit nalunaarutissallu allat isumannaatsumik timmisartuussinermut attuumassutillit nalunaarutigisarpai.
• Mittarfiup ingerlatarinerani qitiusumi inissisimaffimmi ilaasuuvoq.

Pimoorussisarneq akisussaaffeqassuserlu illit pissuseraatit, naatsorsuutigaarpullu

• ullormi unnuamilu qaqugukkulluunniit, aammalu ilaatigut artukkersimaffigisap nalaani suleqatigiinni, aammali namminersuutigisannik sulisinnaanerit,
• anguniagaqartuunerit – aammalu allaat piffissani ulapaarfiunngitsuni imminik suliassaqartissinnaanerit,
• akisussaasuunerit, aamma atuagarsuutit piviusunngortinnissaannut piginnaasaqarluarnerit,
• allattariarsornikkut oqaluttariarsornikkullu inissisimaffimmi qaffasissumi oqaatsit danskisut tuluttullu sapersaatiginngilluinnassagitit, ajornanngippallu aamma kalaallit oqaasii,
• kisitsisilerillaqqissuullutillu matematikkimik piginnaasaqarluassasutit,
• pitsaasumik timikkut nukittuujussasutit, aammalu AFIS-operatørinut peqqissutsikkut piumasaqaatit artorsaatigissanngikkitit,
• politiinit isumannaallisaanikkut akuerineqarsinnaasutit – pineqaatinneqarsimannginnermut uppernarsaat piumasaqaataavoq,
• ilinniagaqarnerup naammassinerata kingorna Kalaallit Nunaanni mittarfimmi sorlermiluunniit, suliffissannik innersuussiffigineqarfinni sulilissasutit, kiisalu mittarfeqarfinni assigiinngitsuni tulleriiaarillutit suliaqarnissamut piareersimassasutit.

Ilinniagaqarnerup ingerlanera:

Ilinniagaqarneq tamarmi, oktobarip qaammataani aallartiffeqartoq Kalaallit Nunaanni ingerlanneqarpoq, aammalu GATE Aviation Training, tassaasoq ATS-imik ilinniagassaqarfiusumi Mittarfeqarfiit suleqatigisaa qanimut suleqatigalugu pisarpoq. GATE Aviation Training tassaavoq ilaatigut Danmarkimi sakkutuut timmisartunut timmisartortitsinermik aqutsisunik, aammalu nunarsuarmi sumiiffippassuarni mittarfinni timmisartortitsinermik aqutsisunik ilinniagaqartitsilluni Danmarkimi Kastrupimi qullersaqarfeqarluni nunat tamalaanit akuerisaasutut ATS-imik ilinniagaqartitsisarfik.

Kangerlussuarmi pisutut ilinniagaqarnermi sap. akunneri 11-t missaat siulliit (ATS-imik tunngaviusumik ilinniagaqarnerup) imarivai atuagarsornikkut ilinniagassaqarfiit arlallit. Juullimi sulinngiffeqarfiup kingornatigut qaammatit marluk missaannik ingerlassaq pissaaq, tassanilu ilinniartut silasiortutut ilinniagaqarneq, kiisalu AFIS-operatøritut atuagarsornikkut ilinniagaqarneq naammassissavaat, tamatumunnga nangillugu 3D-mik napasuliami alapernaarsuisarfiusuusaarfimmi sungiusarneq ingerlanneqassaaq, AFIS-imik ilinniartutut uppernarsaammik angusaqarniarluni inaarutaassallutik misilitsinnerit, aamma oqaatsitsigut misilitsinnerit. Ilinniagaqarnermi qaammatit 5-8-t missaat kingulliusut tassaassapput ”On The Job Training” (“Suliffimmiilluni Sungiusarneq”), tamannalu Kalaallit Nunaanni mittarfiit anginerit ilaanni, Narsarsuarmi, Nuummi imaluunniit Ilulissani ingerlanneqassaaq.

Ilinniartitaaneq taamaallaat danskisut aamma tuluttut ingerlanneqassaaq, ilinniusiallu amerlanerpaartaat tuluit oqaasiinik imaqassapput.

Ilinniakkami tiguneqarnissat sioqqullugu tunngavilersukkamik qinnuteqaat, danskisut aamma tuluttut oqaasertaligaq tigusimassavarput. Qinnuteqaatit tigusat tunngavigalugit misissuilluni oqaloqatigiinnermut, Skype imaluunniit MS Teams ikiorsiullugit ingerlanneqartussamut qinnuteqartut arlallit toqqarneqassapput. Ilinniakkap naammassisinnaanissaanut piumasaqaataasutut illit qanoq oqaatsitsigut tunngaveqartuunerit qularnaarniarlugu oqaatsit pillugit nalilersuisartutut ilinniarsimasumit danskisut aamma tuluttut oqaatsitigut inissisimaffigisavit nalilersugarineranik misissuilluni oqaloqatigiinneq ilaqassaaq. Tamatuma kingornatigut ullut sisamat missaannik sivisussusilimmi, aggustip qaammataani pisumi Kangerlussuarmi tiguneqarnissamut misilitsinnissamut peqataanissamut qinnuteqartut piginnaanillit qaaqquneqarsinnaapput. Tiguneqarnissamut misilitsinneq sioqqutitsiarlugu, imaluunniit kinguninnguatigut Mittarfeqarfiit toqqagaannit timmisartortartunut nakorsamit misissortinneq angusaqarfigissavat.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatitit Mittarfeqarfiit / Greenland Airports suliarineqassapput, ingerlaavartumik akissutisisarumaarputit. Ilinniarnerup aallartinnissaanut sapaatip akunneri pingasut inulersimappagit illillu suli akissutisinak, Air Greenland saaffiginnittariaqassaatit.

Ilinniarnermik aallartiffik
Ilinniagaq ingerlaavartumik oktobari

Neqeroortoq
Mittarfeqarfiit / Greenland Airports

Aningaasaqarneq
Ilinniarnerup nalaani ilinniartutut aningaasarsiaqartitaassaatit. Ilinniarnermusiat ulloq 1. januaari 2021-mi tassaapput qaammatikkaanut kr. 20.000, taakkunaniillu inimik attartugaqarnermut (kollegiami inimut) kr. 850,- qaammatikkaartumik aalajangersimasumik ilanngaatigineqartassapput.

Ilinniagaqanermik naammassisaqarnissannik piumasaqaateqarluni kingornatigut Mittarfeqarfiit mittarfiisa ilaanni AFIS-operatøritut atorfinitsitaassaatit, aammalu RAF1917-ilu isumaqatigiissut atuuttoq malillugu aningaasarsiaqassallutit.

Mittarfeqarfiit iluani inuttaliinissamik pisariaqartitaqarnermik iluarsiiniarluni AFIS-imik ilinniagaqarnerup Mittarfeqarfinnit akilerneqartarnera sianigeqqussavarput. Mittarfeqarfiit iluani sulinissamik soqutigisaqartunik qinnuteqartut siullertut pingaarnertullu kissaatigaagut. Qinnuteqartut ilinniakkaminnik naammassinnillutillu uagutsinnik qimatsisartut ajoraluartumik misilittagaqarfigaagut. Ilinniagaqarnermut Kalaallit Nunaanni inuiaqatigiit aningaasaliissutaat akimorniarlugu ilinniartunut isumaqatigiissut atugarilersissimavarput. Isumaqatigiissummiippoq immikkut piumasaqaat, ilinniakkap naammassineratigut ukiuni 2 ½-ini suliffeqarnissamik pisussaaffiliisoq. Mittarfeqarfiit iluani qaammatikkaanut sulininni ’ilinniagaqarnermut taarsigassarsiarisatit’ aningaasanik aalajangersimasunik ikilisartassagitit immikkut piumasaqaatip nassataraa. Taamaattumik nammineq piumassutsit malillugu piffissaq eqqornagu suliffik qimassagukku aningaasat sinnerisa utertillugit akiliutiginissaannut pisussaaffeqassaatit.

Suliffimmik misiliinermi pissutsit
Suliffimmik misiliissanngilatit

Piginnaasat qaffasissusaat
-

Siunissami periarfissat / Suliffiusinnaasut
Timmisartortitseqatigiinni angalatsitsisuni imaluunniit timmisartuni attartukkani sulinissamut periarfissaqassaatit.

Ilinniarnermik aaqqissuussineq
https://www.mit.gl/job-uddannelse/uddannelser/afis-operatoer/#:~:text=En%20AFIS%2DOperat%C3%B8r%3A&text=Betjener%20funktionerne%20i%20et%20AFIS,central%20del%20i%20lufthavnens%20drift

Suliap suliarineqarneranut imaluunniit allat pillugit naammagittaalliutissaqaruit Mittarfeqarfiit / Greenland Airports attaveqarfigissavat.