Isumannaallisaanermi sulisoq

Sillimaniarnermut suleqataasutut ilinniarit takunnillaqqissillutillu

Sillimaniarnermut suleqataasutut ilinniarsimaguit mittarfiit, timmisartut timmisartumullu ilaasut sillimaniarnerannik qulakkeereqataasinnaavutit. Mittarfinni sillimarniarneq tassaalersimavoq mittarfinnik ingerlatsinermi pingaarutilerujussuaq. Mittarfeqarfiit A/Smi sulisugut nunani tamalaani piumasaqaatit sakkortunerpaat atorlugit ilinniartittarpagut.
Sillimaniarnermi suleqataasut eqqummaarilluinnartussaavutit. Suulluu pasinarsinnaasut scannerikkoortinneqartut tappiffigissavatit pigaartunullu peqataasarlutit.

Ilinniarnerpit ingerlanerani makku ilinniassavatit:
Piffissaq sivikitsoq atorlugu nassatat amerlasuut misissornissaat, timmisartumut ilaasussat misissornissaat mittarfimmullu isertussat misissornissaat ilinniassavatit. Oqartussat allat qanimut suleqatigissavatit, soorlu politiit aamma Trafikstyrelsen. Tamakkua saniatigut makkua ilinniassavatit:

• Pigaartuuneq
• Timmisartumut ilaasussanik nassatassanillu misissuineq
• Timmisartumut ikisussanik misissuineq
• Nassatanik scannerineq

Ilinniagaq pillugu paasissutissat:
Ilinniarneq suleqatit avataaneersut, soorlu politiit aamma Trafikstyrelsen peqatigalugit ingerlanneqartarpoq.
Sillimaniarnikkut sullissinerup iluani ilinniaqqinnissamut periarfissaqarpoq.

Naatsorsuutigaarput ima ittuussasutit:
Suliavit annerpaartaa piginnaasatit attatiinnarniarlugit nutarsartuassavatit sillimaniarnermullu tunngasut ukiuni makkunani sukkasuumik ineriartortut malinnaaffigalugit – tamatumani malittarisassanut teknologiimullu nutaamut tunngatillugu. Ilinniarneq timikkut peqqissuunissamik ataatsimullu isiginnissinnanermik piumasaqaatitaqarpoq.

Taakkua saniatigut ukunannga piumasaqarfigissavatsigit:

• Politiinit sillimaniarneq pillugu akuerisaanissat
• Sulilerlaanut ilisaritsitsilluni pikkorissarnermut peqataasimanissat
• Qalipaatinik immikkoortitsisinnaanermut misiliut angusimassagit
• Nutaanik ilinniarnissannut kajumissuseqartutit

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatitit Mittarfeqarfiit / Greenland Airports suliarineqassapput, ingerlaavartumik akissutisisarumaarputit. Ilinniarnerup aallartinnissaanut sapaatip akunneri pingasut inulersimappagit illillu suli akissutisinak, Air Greenland saaffiginnittariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq

Neqeroortoq
Mittarfeqarfiit / Greenland Airports

Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.

Suliffimmik misiliinermi pissutsit
Suliffimmik misiliissanngilatit.

Siunissami periarfissat / Suliffiusinnaasut
Timmisartortitseqatigiinni angalatsitsisuni imaluunniit timmisartuni attartukkani sulinissamut periarfissaqassaatit.

Ilinniarnermik aaqqissuussineq
https://www.mit.gl/gl/atorfiit-ilinniarfiillu/ilinniarfissat-allattorsimaffiat/isumannaallisaanermi-sulisoq/

Suliap suliarineqarneranut imaluunniit allat pillugit naammagittaalliutissaqaruit Mittarfeqarfiit / Greenland Airports attaveqarfigissavat.