Socialassistentitut ilinniarneq

Socialassistentitut ilinniarneq ukiut tamaasa PI/SPS Ilulissani neqeroorutigineqartarpoq qaammatinillu qulingiluanik sivisussuseqarluni (sap. ak. 39-t). Holdimi aggustimi aallartittartumi 24-nik inissaqarpoq.

Ilinniarneq modulinut tallimanut avinneqarnikuuvoq fagit pingaarnernut pingasunut avinneqarnikuullutik; qallunaatut, pædagogik kiisalu psykologi, piorsarsimassutsimullu tunngasut marluk; Kultur- og samfundsfag kiisalu Kreative fag og bevægelse

Ilinniakkap pingaarnertut anguniagai marlunnik sammiveqarput. Aappaa ilinniaqqinnissamut siunertaqarpoq, aappaalu perorsaanermut tunngasuni sulilernissamut siunertaqarluni.

Taamaattumik ilinniarnermi oqaatsitigut qallunaatut pikkorissisoqarlunilu ineriartortoqarnissaa anguniarneqartarpoq perorsaanermut tunngasumik sulinermi atorneqartarmata.

Socialassistentitut naammassisimasoq perorsaanermut tunngasut nalinginnaasut, soorlu inulerisut perorsaasullu suliai suliarisinnaavai. Socialassistentip suliaanut ilaappput meeqqat inersimasullu sumiginnakkat, innarluutillit, inuusuttut, utoqqaaq kiisalu ilaqutariit aammalu meeqqat. Paaqqinnittarfinni, unnuakkut paaqqinnittarfinni allanilu suliarineqartarput. Aammalu socialassistentip atorfigivaa perorsaanerup iluani sulisut ineriartortinnissai.

Ilinniakkamut akuerisaanissamut piumasaqaataavoq qinnuteqartoq:

• Isumaginninnermi ikiortitut naammassinnissimassasoq imaluunniit meeqqat atuarfiata saniatigut ilinniagaqarneq aalajangersimasumilluunniit suliaqarniarluni ilinniarfimmi naammassinnissimaneq
Ilinniartut inissaanniit amerlanerusunik qinnuteqartoqarsimappat PI/SPS-ip:
• ilinniartup qallunaatut pisinnaasaanik ilinniarfiginikuusaannut piumasinnaavoq akuerisaanissamut tunngavilersuutaasinnaasunik
• qinnuteqartoq piumaffigisinnaavaa qallunaatut misilitsissasoq taannalu akuerisaanissamut tunngavilersuutaatillugu
• Immikkut akuerineqarnissamut qinnuteqaarnermut kajumissaarummik rektorimut allattoqarsinnaavoq sooq immikkut akueritikkusunnerluni. Uppernarsaat naleqquttoq ilinniarfiginikuusamiit kiisalu suliffiginikuusat ilanngunneqassapput

Meeqqamut pinerliisimannginnermut kiisalu pinerluttuliorsimannginnermut uppernarsaat socialassistentitut ilinniakkamut qinnuteqartunit tamanit akuerisaasunit pineqassaaq. Pinerlussimannginnermik allagartanik unioqqusitsisimannginneq pillugu nalilersuisoqartarpoq ilinniakkamut akuerisaanissaq eqqarsaatigalugu.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq 

Neqeroortoq 
Perorsaanermik Ilinniarfik (PI/SPS)

Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.

Suliffimmik misiliinermi pissutsit
Suliffimmik misiliiffissamik aallartitsinnak nassaarsimassaatit.

Siunissami periarfissat/ Suliffiusinnaasut
ilinniarnermik naammassereeruit ukunani atorfininniarsinnaavutit ulluunerani paaqqinnittarfiit aamma ulloq unnuarlu paaqqinniarfiit.Ilinniakkavit ilinniaqqinissannut ilinniagassanut qaffasinnerusunut periarfissiissaaq.

Ilinniarnermik aaqqissuussineq
Uani atuagaaraq aasinnaavat: https://pi.sps.gl/ka/ilinniakkat/siunnersuinermi-ikiortitut-ilinniagaq/

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.