Tapersersuisutut ilinniarneq

Innuttaasup inuunerata naleqassusaa pitsaanerpaaffissaminiissinnaaqqullugu, ulluinnarni imminut ikiorsinnaanerata attatiinnarnissaa ineriartortinnissaalu anguniarlugit, susassaqartillugulu tapersersussavat. Ulluinnarni innuttaasup saatassaanik ikiuisinnaanissannut ilinniartitaassaatit.

Tapersersorti sulerisuua?
Tapersersortitut, innuttaasup tarnimigut nappaatillip ulluinnarni sapinngisaq tamaat nalinginnaasumik inuusinnaanissaanut tungiuisuuvutit, suliassatigut ikiuisuullutit tapersersuisuullutillu.

Tapersersortit inersimasunik tarnimikkut nappaatilinnik sullissisuupput ulluinnarni nammineersinnaanerannik sapinngisamillu
ineriartorfiusumik inooriaaseqarsinnaanerannik tapersersuillutillu inerisaaqataasussat. Tarnimikkut nappaatillit angerlarsimaffianni, ornittagaanni innuttaasullu nammineq angerlarsimaffiani sullissisuupput.
Tapersersortitut suliniaraanni nammineq inuttut tarnikkut timikkullu peqqissuunissaq pisariaqarpoq. Pisinnaasat aallaavigalugit inuunermik ingerlatsinermik tapersersuinermi aamma pisariaqarpoq pisariaqartitanik assigiinngitsunik takunnissinnaaneq iliuuseqarsinnaanerlu.

Ilinniarneq ukiup aappa affaanik sivisussuseqartoq, sap. ak. 38-ini atuagarsornermik sap. akunnerinilu 35-ini sulinermik sungiusarnermik immikkoortortaqarpoq.

Atuagasornertaa Nuummi Peqqissaanermik Ilinniarfimmi ingerlanneqassaaq. Atuagarsornerit immikkoortut pingasuusut kingullersaat naggataarutasumik soraarummeerneruvoq.

Sulinermik sungiusarneq najukkanni tarnimikkut nappaatilinnik inuttut atukkatigut ikorfartuiffimmi ingerlanneqassaaq. Sulinermik sungiusarnerup nalaani sungiusaasoqartinneqassaatit Peqqissaanermillu Ilinniarfimmi attavigisartagaqassallutit.

• Meeqqat atuarfiannit minnerpaamik E (02 ) kisitsinermi/matematikkimi kiisalu minnerpaamik D (4 ) kalaallisut qallunaatullu oqaasilerinermi angusaralugit soraarummeersimaneq,
• Qassinik ukioqalereersimanissaq: 18
• Ukiut sulinermik misilittagaqarfiit: 2
• Ilinnialersinnaanissaq pillugu oqaloqatigiinneq
• Pinerluuteqarsimannginnermut uppernarsaat

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq 

Neqeroortoq 
Peqqissaanermik Ilinniarfik (PI)

Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.

Suliffimmik misiliinermi pissutsit
Suliffimmik misiliiffissamik aallartitsinnak nassaarsimassaatit.

Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 3 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit. Ingerlaqqiffiusumik inersimasunik ilinniartitaanermi piginaasat qaffasissusaat

Siunissami periarfissat/ Suliffiusinnaasut
ilinniarnermik naammassereeruit ukunani atorfininniarsinnaavutit ulluunerani paaqqinnittarfiit aamma ulloq unnuarlu paaqqinniarfiit.Ilinniakkavit ilinniaqqinissannut ilinniagassanut qaffasinnerusunut periarfissiissaaq.

Ilinniarnermik aaqqissuussineq
Uani atuagaaraq aasinnaavat: https://pi.sps.gl/ka/ilinniakkat/siunnersuinermi-ikiortitut-ilinniagaq/

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.