Biilinik iluarsaasartoq (biili)

Biilinik iluarsaasartup nammineerluni angallatit soorlu aquuteralaat, inuinnaat biilii, assartuutit usisaatillu minnerit benzinatortut dieselitortullu aserfallatsaalillugillu iluarsaassinnaavai.

Ullutsinni bilit, mekaniskiinangajaanavissuusut, annertunerujartortumik atortorissaarutilersugaalersimapput, tamakkulu misissugassaasarput aserfallatsaalineqartussaallutillu.

ABS-bremsit, servostyring,bremsernermi sakkortusaatit, lambdasondit, silaanarmik sakkortusaatit (turbolader), innaallagiatortunik orsulersuineq ikitsinerlu, silaannarissaatit - suli amerliartortuarput.

Ilinniagaq
Ilinniartuuneq suliffimmi sungiusarluni imalt. Najukkami ilinniarfimmi aallarnisarluni aallartittarpoq. Tamanna pereerpat ilinniartut Saviminilerinermik Ilinniarfimmi sap.ak. 8-ni siullermeertumik ilinniariartortoqassaaq.

Ima ingerlasarpoq
Bilinik iluarsaasartutut ilinniarneq atuarfimmi sungiusaatigalugulu suliffimmi paarlakaattumik ingerlanneqartarpoq. Tunngaviusumi ingerlanermi ilinniarfimmiitarneq sap.ak. 8+ 20-nik sivisussuseqarpoq, taaguuteqarpullu GF1 aamma GF2. Ilinniarnerup ingerlaqqinnerani sisamariarluni ilinniarfimmiittarneq sap.ak. katillugit 35-nik sivisussuseqarpoq taaguuteqarlutillu H1, H2, H3 aamma H4.

Ilinniarfimmiittarneq
Saviminilerinermik Ilinniarfiup bilinik iluarsaasartutut ilinniarneq tamaat ingerlattarpaa.
Ilinniarneq aatsaat aallartinneqartarpoq ilinniartussat ikinnerpaamik arfiniliugaangata. Arfinilinnit ikinnerusut Danmarkimi ilinniarfimmut suleqatitsinnut nuunneqarsinnaapput, tassanilu ilinniartup ilinniarnermi sinnera ingerlatissavaat.

Atuarnermi ilinniagassat

Tunngaviusumik atuarnermi ilinniagassaapput motoorit benzinatortut dieselitortullu, innaallagiaqarneq, biilip qaavi saarngilu. Ilinniarnerup ingerlaqqinnerani tunngaviusumik makkua sammineqassapput; tuluttoorneq, atortussianik paasisimasaqarneq, avatangiisit, tuniniaaneq sullissinerlu, qarasaasialerineq aningaasaqarnerlu, taamatullu ilinniartup sammissavai sanaartukkanik pitsanngorsaaneq, sanaartorneq sullissinerlu.

Ilinniarnerup ingerlaqqinnerani bremsit, aquutit, innaallagiatortunik ataqatigiissaarineq kiisalu motoorit benzinatortut dieselitortullu sammineqassapput. Bilinik iluarsaasartup aalajangersimasumik ilinniarnermi ingerlaqqiffiusumi ilinniartussaavaat: kaavittulerineq, innaallagiaqarneq motoori benzinatortoq dieselitortorlu.

Immikkut ilinniagassaapput: kaavittulerineq, motoori benzinatortoq dieselitortorlu, innaallagiaqarneq motoorip ingerlatsisutaanut tunngasut. Immikkut ilinniarneqarsinnaallutik qinigassaapput: qamutini innaallagiaqarneq elektronikkitigullu atortoqarneq, atortorissaarutit sillimaniarnermut kusassaatitullu atortut, ajoqutissarsiorneq misissueriaatsillu imalt. nunakkut angallatinik iluarsaasinnaanermut immikkut piginnaaneqarnissamut piumasaqaatit. Taakkua saniatigut ilaapput fagit immikkut nammineq qinikkat.

Ilinniartunngorniaraanni Najukami ilinniarfimmiit imalt. kommunep kulturikkut ilinniartitaanermullu allaffeqarfikkut (KUF) imalt. suliffissarsiuussisarfimmiit qinnuteqartoqassaaq.

Karakteerinik 13 skala atorlugu misilitsinnikunut piumasaqaatit
Meeqqat atuarfianni 11. klassemi soraarummersimanissaq piumasaqaataavoq minnerpaamik karakterigalugit qallunaatut 6 aamma kisitsinermi 7.

Karakteerinik ECTS-skala atorlugu misilitsinnikunut piumasaqaatit
Meeqqat atuarfianni 10. klassimi soraarummeernissaq piumasaqaataavoq minnerpaamik karaktereralugit qallunaatut E aamma kisitsinermi D.

Ilinniartutut tigusanissamut piumasaqaataavoq suliffimmik sungiusarfeqarneq. Suliffimmik sungiusarfissaqarnissaq ilinniartup namminneq akisussaaffigaa, ilinniarfiup Najukkamilu ilinniarfiup ilinniartup sungiusarfissaamik nassaarniarnerani ikiorsinnaavaa. Ilinniartoq sungiusarfissaqanngikkuni, atuarfimmi sungiusarnissaminut qinnguteqarsinnaavoq.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq

Neqeroortoq
KTI

Aningaasaqarneq
Qanoq sivisutigisumik sulisimaneq ukiut, aamma tapit naapertorlugit ilinniartutut akissarsiaqassaatit.

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.

Siunissami periarfissat/ Suliffiusinnaasut
Biilinik niuerfinni biilileriffinnilu sulisinnaassaatit
Ilinniakkavit ilinniaqqinissannut ilinniagassanut qaffasinnerusunut periarfissiissaaq

Ilinniarnermik aaqqissuussineq
https://www.kti.gl/kl/ilinniarfissat/saviminilerinermik-ilinniarfik/mekanikki/biilinik-iluarsaasartoq

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.