Innaallagisserisoq Elektriker

Innaallagialerisunngorniarneq ilinniarfimmi ilinniarnertalimmik suliffimmillu misiliinertalimmik ingerlanneqartartoq immikkoortunut arlalinnut agguataarlugu aaqqissuussaavoq, ilinniagaqartut innaallagialerisutut ikkussuisartutullu suliaqarnissamut piginnaasaqarfigisariaqakkaminnik ineriartorfigisinnaasaannik. Ilinniarneq GF1-imut, GF2-mut H1-imullu agguataagaavoq inaarutaasumillu misilitsinnermik naggaserneqartarluni.

Tunngaviusumik ilinniarneq 1 (GF1)

GF1-imi sapaatip-akunnerini 15-ini ingerlanneqartartumi ilinniartitaanermik ilisarititsineq ingerlanneqartarpoq, ilinniartut tassani tunngaviusumik ilinniagassani piginnaanngorsarneqartarput, soorlu ukunani:

• Matematik (D-niveau)
• Dansk (E-niveau)
• Fysik, pingaartumik innaallagialerisunngorniartunut sammititaq
• IT suliffimmillu misiliiffissarsiorneq

Ilinniartut suliniummik oqaluttariarsorluni misilitsinnermik naggaserneqartussamik ingerlataqassapput. GF1-imi siunertarineqarpoq, ilinniartut ilinniakkaminnik ingerlatsiinnarnissamut suliffimmillu misiliiffissarsiornissamut tunngaviusunik piginnaasaqalernissaasa qulakkeerneqarnissaat.

Tunngaviusumik ilinniarneq 2 (GF2)

GF2 sapaatip-akunnerini 20-ni ingerlanneqartarpoq, tassanilu ilinniartut Ilinniarnerit inuussutissarsiornermut sammiveqartuni tunngaviusumik ilinniarnerminnik ingerlatsiinnarnissamut pisariaqartinneqartuni piginnaasaqalersinneqarnissaat siunertarineqarpoq. Ilinniagassat tassaapput:

• Matematik (D-niveau-mik nangitsineq)
• Tuluttut (E-niveau)
• Fysik (E-niveau)
• Ilinniagassat aalajangersimasut, soorlu innaallagialerinermik ilinniarneq, teknikikkut aamma ikkussuinermi tekniki, diagramminik paasinnissinnaaneq aqutsinerlu.

Ilinniarnerit misilitsinnermik naggaserneqassapput, ilinniartut tunngaviusumik ilinniarnermi ingerlaqqissagunik angusiffigisassaat.

Tunngaviusumik ilinniarneq 1 (H1)

H1 misilittagaqalernissamik teknikikkullu atuinermik paasisimasaqarnerunissamik anguniagaqarfiusussatut siunnerfiuvoq. Ilinniagassanut ilaapput:

• Ikkussueriaatsit 1 aamma 2 (misilittagalinnut)
• Attaveqaatit (misilittagalinnut)
• Atortut automatiskiusut
• Uuttortaariaaseq uppernarsaasiinerlu
• Sullitanik kiffartuussineq attaveqartarnerlu

Ilinniartut inaarutaasumik misilitsinnissamut pisariaqartitaannik piginnaasaqalersinniarlugit suliaqarnermik atuagarsornermillu misileraatinneqassapput.

Inaarutaasumik misilitsinneq

Suliaqarnermik atuagarsornermillu misilitsittarnerit marlunnut avitaapput:

• Allattariarsorluni misilitsinneq: Suliatigut ataatsimiititaliap prøvebankianit misilitsitsissutigeqquneqartut.
• Suliaqarnermik misilitsinneq: Ilinniartut sanaartukkamik ikkussuinissaq pilersaarusiorlugulu suliarissavaat, tassunga ilanngullugit atortussanik, ikkussugassanik uppernarsaatissanillu toqqaanissaq inniminniinissarlu.

Ilinniartut EL- og Vvs-Branchens Uddannelsessekretariatianit naliliiffigineqassapput, aamma piginnaasaqarfissatut anguniagassat aalajangersarneqarsimasut naammassinissaannut piginnaasaat misilinneqassapput.

 

Meeqqat atuarfianni 10. klassit annertusisamik soraarummeerneranni minnerpaamik danskisoornermi D-mik, matematikimi C-mik, fysikimi C-mik tuluttoornermilu D-mik angusisoqarsimassaaq imaluunniit taakkununnga naapertuuttumik piginnaasaqartoqassaaq.

GF1 piginnaanngorsarfiuvoq ilinniartut suliffimmik misiliiffigisariaqanngisaat, GF1-imilli ingerlatsinerminni suliffimmik sungiusarfissarsiortinneqassapput. GF2-mi ilinniagaqalissagaanni suliffimmik sungiusarfeqarnissaq piumasaqaataavoq. Ilinnialernissamut piumasaqaatit nalinginnaasut tamarmik GF1-imi aallartinnginnissamut tiguneqarnissamut misilitsinnermi naammassineqarsimassapput. Ilinniartut tiguneqarnissamut misilitsinnermi angusisut toqqaannartumik GF2-mi ilinniagaqalersinnaapput, tassanili suliffimmik misiliinissamut isumaqatigiissuteqartoqarsimassaaq.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq

Neqeroortoq
KTI

Aningaasaqarneq
Qanoq sivisutigisumik sulisimaneq ukiut, aamma tapit naapertorlugit ilinniartutut akissarsiaqassaatit.

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.

Siunissami periarfissat/ Suliffiusinnaasut
Illuliornerup sanaartornerullu iluini, ikkussuisartutut aserfallatsaaliisartutullu suliaqarnissamut periarfissaqassaatit, aamma innaallagialerisutut namminersortunngorsinnaavutit.
Ilinniakkavit ilinniaqqinissannut ilinniagassanut qaffasinnerusunut periarfissiissaaq

Ilinniarnermik aaqqissuussineq

https://www.kti.gl/kl/ilinniarfissat/saviminilerinermik-ilinniarfik/teknologi-attaveqatigiinnerlu/innaallagisserisoq-elektriker

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.