Kølemontøri svendetut allagartaqanngitsoq

Køleteknikeri nillorsaatinik silaannarissaatinillu assigiinngitsunik suliaqartarput. Ilinniarnermi atortorissaarutit taakku qanoq ikkussornissaat, atuutilersinnissaat, aaqqissornissaat aserfatsaalinissaannillu ilinniagaqassaatit.

Atortorissaarutinik angissutsinik assigiinngiiaartunik nillataartitsivinniit suliffeqarfinni atugassianut annertuunut suliaqartassaatit. Suliami pingaarutillit ilagaat atortup nillerpallaanngitsumik kissarpallaanngitsumillu atuuteqarnissaanut aaqqissornissaa.

Køleteknikeritut sullitat pisariaqartitaannut akissaqartitaannullu naleqquttumik silaannarissaammik atortorissaaruteqarsinnaanissaannut siunnersorsinnaanissaannut ilinniagaqassaatittaaq.

Køleteknikerit amerlanertigut sullitanut ornigulluni atortorissaarutaannik aaqissuiartorluni anglaqattaarnerusarput. Ornittagaat pisiniarfiusinnaapput, kølebilit, illut qerititsisiusut imaluunniit neqinik pilattaaviit.

Køleteknikerisut ilinniarnerup tunngaviusumik nillorsaatinut, silaannarissaatinut kissartumillu supoorisunut ilisimasanik tunissavaatit.

Ilinniarfimmi ilaanni qerititsinissamut pisariaqartitsiviit aammali innaallagissamik atuinissaq nalilersorsinaannissaanut ilinniagaqassaatit. Sullitavit pisariaqartitaanut naleqquttumik nillorsaammik toqqaasinnaasariaqarputit, nerisassanut nillorsaanerit innaallagiartungaatsiarlutillu akisusinnaammata.

Nillorsaanermut periuutsit nutaat aamma ilinnarfigissavatit, taakku pillugit ilisimatusarneq annertusiartortuarmat. Ass. nillorsaatit kiassaatillu innaallagianik atuinermi mianerinnittut ilinniassavatit.

Ilinniarnermi alloriarfiit

Ilinniarnerit køleassistentitut (allorneq 1) imaluunniit køleteknikerisut naammassisinnaavat (allorneq 2):

• Køleassistenti: Nillorsaatinik minnerusunik ikkussuineq, nakkutilliineq aammalu isumannaallisaanermi suliffimmilu atugassarititaasunut tunngatillugu maleruagassat naapertorlugit uppernarsaasiornissaq ilinniassavat. Aammattaaq sullulinnik katiterisinnaanissaq aammalu nillorsaatinut nalilersueqqissaarsinnaaneq atortunillu nakkutilliineq ilinniassavat.
• Køleteknikeri: Nillorsaatit aningaasarsiutigalugu atortussiat pilersaarusiorlugillu ikkussornissaat aammalu nalilersorsinnaanissaannut nakkutiginissaanullu ilinniagaqassaatit. Køleteknikerit atuakkanik ilitsersuutinillu arlalinnik tuluttoortunik atugaqartarput, taamaammat oqaatsinik allanik atuisinnaanermut pikkorinnissaq pisariaqarpoq.