Atlantikup Avannaani Ilinniarnertuunngorniarfik (NGK)

GUX sunaava?
Ilinniarnertuunngorniarfik, GUX, inuusuttunut ilinnigaqaqqinnissaminnut piareersarluni atuagarsorluni ilinniarfiuvoq. GUX Aasianni, Sisimiuni, Nuummi Qaqortumilu kiisalu internetsikkut neqeroorutaavoq.

Ilinniarnertuunngorniarfimmi, GUX, ukiuni pingasuni aamma ukiuni marlunni kiisalu atuartitsissutini ataasiakkaani ilassutitullu atuartitsissutinik ilinniartoqarsinnaavoq.

Sooq GUX qinissaviuk?
GUX ilinniakkatigut sammivinnik assigiinngitsunik illit soqutigisannut, ilinniaqqinnissannullu angorusutannut tulluarsakkanik arlalinnik neqerooruteqarpoq.
Soqutiginartumik ilinniagaqarnissaq ineriartornermut aqqutissaavoq: Taanna ilinniarsimagukku suliffissartaarnissannut periarfissaqarnerujussuussaatit. Suliffiit amerliartortut piumasarisarpaat ilinniagaqarsimanissaq.
Aningaasarsiaqarnerunissannut periarfissaqarnerulissaatit: Suliassatigut kisianni aamma inuttut annertuumik ineriartussaatit.

Ilinniakkap sammivia sunaava?
Ilinniakkap sammivia aalajangersimasumik sammisamik ilinniagaqarusukkuit ilinnut naleqquttuuvoq. Assersuutigalugu ilinniakkap sammivissaa qinersinnaavat
ilinniartitsissutit nutaaliorfiusut amerlasuunik ilallit, soorlu nipilersornermik, assilialiornermillu.

Ilinniagassat qaffasissusii
Ilinniartitsissutit assigiinngitsunik qaffasissusillit neqeroorutigineqartarput, A-tut, B-tut aamma C-tut. Ilinniakkat A-t qaffasinnerpaajupput, C-miittullu appasinnerpaajullutik.

Atlantikup Avannaani Ilinniarnertuunngorniarneq Danmarkimit, Savalimmiunit, Islandimit Kalaallillu Nunaanniit atuartunut nalinginnaasumik ilinniarnertuunngorniaatigisunut (STX) Atlantikup avannaani misigisassarsiorusuttunut neqeroorutaavoq immikkuullarissoq.
Atlantikup Avannaani Ilinniarnertuunngorniarneq (AAI) Atlantikup Avannani Nunanit sisamanit ilinniartunit ukiuni pingasuni ilinniaqatigiittussanit peqataaffigineqarpoq.
AAI immikkut ittumik pinngortitalerinermik sammivilimmik ilinniarfeqarpoq, tassaasut uumassusilerinermi teknologi, issittumi teknologi, matematik aamma fysik.
AAI-mi 1.g Danmarkimi Gribskov Gymnasiumimi ingerlatsissavat. 2.g-imi ukiup affaa siulleq Savalimmiuni Miðnám á Kambsdalimi ingerlanneqassaaq ukiullu affaa tulliuttoq Islandimi Verzlunarskolimi ingerlanneqassalluni. 3.g-mi STX-imik ilinniarneq Kalaallit Nunaanni GUX Sisimiuni ingerlanneqassaaq.

AAI-mi ilinniarneq nunagisanni ingerlanneqarpat ilinniarnertuunngorniarfiullu pineqartup qanigisaanni najugaqaraanni angerlarsimaffimmi najugaqartoqarsinnaavoq.
1.g-imi Gribskov Gymnasium qanigisaanni najugaqanngikkuit inuussuttuaqqanut najugaqatigiiffimmi Studiebyenimi ilinniarnertuunngorniarfiup sanianiittumi najugaqarsinnaavutit. Inuusuttuaqqanut najugaqatigiiffik attaveqarfissamik sulisoqarpoq taasumalu ikinngutitit peqatigalugit avatangiisigissaarnissat angerlarsimaffillu qimallugu najugaqarnermi unamminartut pillugit ikiortassavaatit. Tamatumunnga atatilluguttaaq sap. ak. naanerini ilinniartunut sammisassaqartitsisartumik inersimasumik najuuttoqartarpoq.
2.g-imi Savalimmiuneeriarlutit Islandimiittussaaffinni ilaqutarsiani najugaqassaatit.
3.g-imi Kalaallit Nunaanni ilinniartunut angerlarsimaffimmut assingusumi najugaqassaatit.

AAI-mi nalinginnaasumik ilinniarnertuunngorniarnermi (STX) ilinniakkat uku ingerlatissavatit:
Uumassusilerinermi teknologi A
Issittumi teknologi C
Matematik A
Fysik B
Nalinginnaasumik oqaatsinik paasinninneq
Pinngortitalerinermi tunngaviusumik ilinniarneq
Danskisut A
Oqaluttuarisaaneq A
Tuluttut B
Timersorneq C
Inuiaqatigiilerineq C
Qanganisarsiorneq C
Upperisarsiorneq C
Tusagassiuutilerineq C
Kulturilerineq C


Ilinniartut savalimmiormiut, islandermiut kalaaliusullu Savalimmiusut A, Islandskisut A, Kalaallisut A ilitsoqqussaralugu oqaatsitik ilinniassavaat. Qallunaallu ilinniartuisa Franskisut B, Tyskisut B aamma Kalaallisut A ilinniassallugit toqqaasinnaassallutik.

Savalimmiunit Islandimiit Kalaallit Nunaanniillu ilinniartut imminut allaaseralutik qinnuteqaasiaminik mailimut uunnga nassiussissapput: post@gribskovgymnasium.dk

Ilinniarnertuunngorniarfiup siullertut qinersimasavit qinnuteqaatit makku aqqutigalugit nalilersussavai:

• Inatsisitigut piumasaqaatit
• immikkut akuersissut
• Ilinnialernissamut misilitsinneq

Inatsisitigut piumasaqaatit qanoq isumaqarpat?
Tulliuttut naammassisimagukkit inatsisitigut piumasaqaat naapertorlugu tigusaasinnaavutit. Tassa ima isumaqarpoq tigutinnissat qulakkeerneqartoq:

• suliniummik suliaqarnermi minnerpaamik E-mik karaktereqassasutit
• meeqqat atuarfianni 10. klassimi soraarummeernermi angusani tamani minnerpaamik E-mik karaktereqassasutit
• meeqqat atuarfianni pinngitsoorani naggataarutaasumik misilitsinninni tunngaviusumik karakterinni tamani minnerpaamik E-mik pissarsisimassasutit

Inatsisitigut piumasaqaatinut immikkut akuersissut sunaava?
Kalaallisut, danskisut, tuluttut matematikimilu inaarutaasumik soraarummeerutini pitsaasunik angusaqarsimavutit, kisiannili inaarutaasumik soraarummeerummi ataatsimi marlunniluunniit ANGUSINNGITSOORSIMALLUTIT. Taamatut pisoqarnerani rektorip, naak inatsisitigut piumasaqaatinik naammassinngikkaluartutit tiguneqarnissat IMMIKKUT AKUERSISSUTIGISINNAAVAA. Ilinniarnertuunngorniarfik inatsisitigut piumasaqaatinut immikkut ittumik akuersissuteqassappat inuttut suliatigulluunniit tunngavilersuutinik ilanngussissaatit.

Ilinniartunngornissamut misilitsinneq sunaava?
Ilinniartunngornissamut misilitsinneq apriilip qaammataani ingerlanneqartarput, atuartitsissutini arlalinni tassa kalaallisut, danskisut, tuluttut, matematikimi, pinngortitalerinermi, inuiaqatigiilerinermilu misilitsinnerupput. Misilitsinneq akunnermik ataatsimik sivisussuseqarpoq. Ilinniartunngornissamut misilitsinneq meeqqat atuarfiannik naammassereernerup kingorna siusinnerpaamik upernaakkut tiguneqarsinnaavoq. Ilinniartunngornissamut misilitsinnerit Majoriami, nunaqarfiit atuarfianni, Danmarkimiillu qinnuteqartunut Kalaallit Illuutaanni ingerlanneqartarput. Ilinniartunngornissamut misilitsinnernik angusisimallutik qinnuteqaateqartut, akueritinnissamut qulakkeerneqarsinnaanngillat, kisiannili atuarfinni inissaqarnersoq apeqqutaalluni tigutittoqartarpoq.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Savalimmiunit Islandimiit Kalaallit Nunaanniillu ilinniartut imminut allaaseralutik qinnuteqaasiaminik mailimut uunnga nassiussissapput: post@gribskovgymnasium.dk

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniartitsineq qaammammi augustimi aallartissaaq

Neqeroortoq
Atlantikup Avannaani Ilinniarnertuunngorniarfik (NGK)

Ilinniagaqarnersiutit:
Ilinniartunut Nunani sumiikkaluartunut 20-t inorlugit ukiulinnut Kalaallit Nunaanni Ilinniagaqarnersiutit pillugit Namminersorlutik Oqartussat nalunaarutaat§ 12, imm. 1, nr. 6 malillugit ilinniagaqarnersiuteqartitsisoqassaaq. Ilinniagaqarnersiutit pillugit Namminersorlutik Oqartussat nalunaarutaat nr. 9, ulloq 19. juli 2017-meersumi:
§ 12. Aningaasanut inatsimmi annertussutsit aalajangersarneqarsimasut naapertorlugit makkununnga stipendiaqartitsisoqartarpoq:
...
6) Ilinniagaqartunut 20-t inorlugit ukiulinnut Danmarkimi ilinniarnertuunngorniarfinni aamma inuutissarsiutinik ilinniarfinni ilinniagaqartunut.
Aningaasanut inatsimmi ima allassimasoqarpoq:
Qallunaat Nunaanni ilinniartunut 20-it ataallugit ukiulinnut ilinniagassaminnut atatillugu piareersaataasumik ilinniartunut imaluunniit inuussutissarsiutigilersinnaasaminnik ilinniagalinnut 4.800 kr.
Ilinniartut 20-nik ukioqalerunik Danmarkimiikkaluarunik, Savalimmiuniikkaluarunik Islandimiikkaluarunik Kalaallit Nunaanniikkaluarunilluunniit danskit ilinniagaqarnersiutinut inatsisaat malillugu
ilinniagaqarnersiuteqassapput.

Nunami allami ilinniarnermut tapi:
Ilinniartunut Kalaallit Nunaata Danmarkillu avataani ilinniartunut kisimi Nunami allami ilinniarnermut tapiissutigineqartarpoq. Ilinniartut AAI-miittut ilinniarnertik tamakkerlugu Danmarkimi ilinniartitaanerup ataani inissisimasussaagamik Nunami allamiinermut tapeqassanngillat.

Immikkut tapiissutit
Ilinniagaqarnersiutit pillugit Namminersorlutik Oqartussat nalunaarutaat nr. 9, ulloq 19. juli 2017-imeersumi kapitali 6 malillugu immikkut tapiissutit Danmarkimi ilinniartitaanerup ataani ilinniaqqinnissamut piareersarnertut tunniunneqartassapput. Tamatumunnga ilaatigut ilinniarnerup aallartinnerani naammassineranilu angalaneq, takuuk Ilinniagaqarnersiutit pillugit Namminersorlutik Oqartussat nalunaarutaat § 35, Akiliunneqarluni angalanerit aamma § 39 il.il.

Nunani angalanerit
Ilinniartup Nunat ilinniarfiusut akornanni angalasinnaatitaavoq. Tamanna ilinniagaqarnersiutit pillugit Namminersorlutik Oqartussat nalunaarutaani § 35, imm. 4-mi takuneqarsinnaavoq:
”Ilinniarfinni assigiinngitsuniinnermut, ilinniarfimmiillunilu sungiusarluni sulinernut aamma sungiusarluni suliffiit assigiinngitsut paarlaannerinut atatillugu akiliunneqarluni angalasoqarsinnaavoq,
ilinniarnerup aaqqissuunnerata tamanna pisariaqalersippagu, nikinnissarlu aqqutissiuisumit allakkatigut akuerineqarsimappat"

Aningaasaqarneq
18-inik ukioqalernissavit tungaannut ilinniagaqarnersiuteqarnissaq qinnutigisinnaavat. Ilinniartut Kalaallit Nunaanneersut Savalimmiuneersullu AAI-mi ilinniarnissamik qinnuteqarsimasut 18-inik ukioqalerunik Danmarkimi ilinniagaqarnersiuteqarnissamut qinnuteqassapputtaaq.

Ilinniarninni nerisaqarneq ineqarnerlu akilertassavatit.
Danmarkimi inuusuttunut inissiat qaammammut 4.000kr. miss. akeqarput. Savalimmiuni Islandimilu angajoqqaarsiaqarneq qaammammut 2.500 – 4.000 kr. miss. akeqarpoq. Kalaallit Nunaanni kolligiami ineqarneq qaammammut 3.000 kr. miss. akeqartarpoq.

Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 3 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit. Ingerlaqqiffiusumik inersimasunik ilinniartitaanermi piginaasat qaffasissusaat.

Siunissami periarfissat/Suliffiusinnaasut
Ilinniakkavit ilinniaqqinissannut ilinniagassanut qaffasinnerusunut periarfissiissaaq

Ilinniarnermik aaqqissuussineq
https://nordatlantisk.dk/

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.